ഇന്നത്തെ തീയതി :

Saturday, May 16, 2009

അനിവാര്യമായ പരാജയം

വിജയിച്ച സ്ഥാനാര്‍ത്ഥികള്‍ക്ക് അഭിനന്ദനങ്ങള്‍
അനിവാര്യമായ പരാജയം ഇടതുപക്ഷം ഏറ്റുവാങ്ങി. സ്വയം ശവക്കുഴി തോണ്ടി അതില്‍ കയറി കിടന്ന് സ്വയം മണ്ണിട്ട് മൂടുന്നപോലെയായി ഇടതു മുന്നണിക്ക് ഈ ഇലക്ഷന്‍. ഇത് ഇങ്ങനെയേ വരൂ എന്ന് ഒരു വിധത്തില്‍ പറഞ്ഞാല്‍ പാര്‍ട്ടി പ്രവര്‍ത്തകര്‍ക്കും (എന്നെ പോലെയുള്ള) സാധാരണ അനുഭാവികള്‍ക്കും നേരത്തെ തന്നെ അറിയാമായിരുന്നു എന്ന് തോന്നുന്നു.

ഈ പരാജയത്തിന്റെ കാര്യത്തില്‍ എനിക്ക് തോന്നിയ ചില കാരണങ്ങള്‍ ഇവയാണ്.

1. പിണറായിയുടെ തന്‍ പ്രാമാണിത്വം : ഈ പരാജയത്തിന്റെ ഏറ്റവും പ്രധാന കാരണം ഔദ്യോഗിക വിഭാഗത്തിന്റെ ഏകാധിപത്യപരമായ തീരുമാനങ്ങള്‍ തന്നെയാണ്. താന്‍ ഇല്ലെങ്കില്‍ പ്രളയം എന്നോ മറ്റോ മനസ്സില്‍ കണ്ട് എല്ലാം സ്വയം തീരുമാനിച്ച ഏകാധിപത്യ പ്രവണതയോടെയുള്ള തീരുമാനങ്ങള്‍‍ക്കേറ്റ തിരിച്ചടി എന്നു പറയാം.

2. മദനിയെ (പരോക്ഷമായെങ്കിലും) മുന്നണിയുടെ ഭാഗം എന്ന നിലയില്‍ പൊക്കി കൊണ്ടു നടന്നതിന്റെ പരിണിതഫലം. പൊന്നാനിയിലും മലപ്പുറത്തുമുള്ള ഫലങ്ങള്‍ ഇത് ശരിക്ക് മനസ്സിലാക്കി തരുന്നു എന്നു വേണം കരുതാന്‍. അതുപോലെ തന്നെ മലബാറിലെ മറ്റു മണ്ഡലങ്ങളിലും ഈ തീരുമാനത്തിന്റെ ഫലം കാണാം.

3. സീറ്റ് വിഭജന ചര്‍ച്ചയില്‍ ഘടക കക്ഷികളെ പോലും പിണക്കി സ്വന്തം താല്പര്യം സം‌രക്ഷിക്കുവാന്‍ കാട്ടിയ ശുഷ്കാന്തിയ്ക് ഘടക കക്ഷികള്‍ നല്‍കിയ മറുപടി.

4. ജനദാ ദളിന്റെയും സി.പി. ഐ-യുടെയും മറ്റ് ഘടക കക്ഷികളേയും വില കുറച്ച് കണ്ട് മുന്നണി രാഷ്ട്രീയത്തിന്റെ എത്തിക്സ് പോലും മറന്ന രാഷ്ട്രീയ അജണ്ടയുടെ പരാജയം.

5. ലാവ്‌ലിന്‍ കേസില്‍ പിണറായി കുറ്റക്കാരനല്ലെന്ന് പാര്‍ട്ടി നേതാക്കള്‍ക്കറിയാമെങ്കിലും താഴേത്തട്ടിലുള്ള സാധാരണക്കാര്‍ക്ക് അതറിയില്ല, അവര്‍ക്കത് മനസ്സിലാകില്ല.

6. സ്ഥാനാര്‍ത്ഥി നിര്‍ണ്ണയത്തിന്റെ പോരായ്മ : ചില മണ്ഡലങ്ങളില്‍ ഗ്രൂപ്പ് കളിയില്‍ മറന്ന പൊതു സമ്മതരായ സ്ഥാനാര്‍ത്ഥികള്‍. അവരെ മറന്ന് സിന്ധു ജോയിയെ പോലെയുള്ളവരെ സ്ഥാനാര്‍ത്ഥിയാക്കിയതില്‍ വന്ന പാളിച്ച.

ഐക്യ ജനാധിപത്യ മുന്നണിയുടെ വിജയത്തെ കുറച്ച് കാണുന്നില്ല എങ്കിലും, ചുരുക്കി പറഞ്ഞാല്‍ ഇത് ഐക്യ ജാനാധിപത്യ മുന്നണിയുടെ വിജയം എന്നതിനേക്കാളുപരി സി.പി.എം-ന്റെ പരാജയം എന്ന് കാണാനാണെനിക്കിഷ്ടം. അതില്‍ തന്നെ ഈ ഇലക്ഷന്‍ മുഴുവന്‍ നിയന്ത്രിച്ച ഔദ്യോഗിക പക്ഷത്തിന്റെ പരാജയം. വടക്കന്‍ കേരളത്തിലെ ഉറച്ച സീറ്റുകള്‍ പോലും നഷ്ടമായത് അതാണല്ലോ കാണിക്കുന്നത്.

ഇടതു മുന്നണിയില്‍ പണ്ടില്ലാതിരുന്ന, എന്നാല്‍ കോണ്‍ഗ്രസില്‍ പുകഞ്ഞു കൊണ്ടിരുന്ന ഗ്രൂപ്പുകളിയില്‍ സാധാരണക്കാരായ ജനങ്ങള്‍ക്ക് ഒരു താല്പര്യവുമില്ല എന്ന് കോണ്‍ഗ്രസ് കഴിഞ്ഞ തെരെഞ്ഞെടുപ്പോടെ മനസ്സിലാക്കി എങ്കില്‍, ഈ തെരെഞ്ഞെടുപ്പോടെ ഇടതു മുന്നണിക്കത് മനസ്സിലായാല്‍ അവര്‍ക്ക് കൊള്ളാം.



മുന്‍‌കൂര്‍ ജാമ്യം

ഞാനൊരു രാഷ്ട്രീയ നിരീക്ഷകനല്ല. ഒരു പക്ഷേ പരാജയത്തിന്റെ കാരണങ്ങളില്‍ ഇതൊന്നും കാണില്ലായിരിക്കാം. മറ്റു പല കാരണങ്ങളും കാണാം.

27 comments:

അനില്‍ശ്രീ... said...

ഇത് ഐക്യ ജാനാധിപത്യ മുന്നണിയുടെ വിജയം എന്നതിനേക്കാളുപരി സി.പി.എം-ന്റെ പരാജയം എന്ന് കാണാനാണെനിക്കിഷ്ടം. അതില്‍ തന്നെ ഈ ഇലക്ഷന്‍ മുഴുവന്‍ നിയന്ത്രിച്ച ഔദ്യോഗിക പക്ഷത്തിന്റെ പരാജയം. വടക്കന്‍ കേരളത്തിലെ ഉറച്ച സീറ്റുകള്‍ പോലും നഷ്ടമായത് അതാണല്ലോ കാണിക്കുന്നത്.

ഇടതു മുന്നണിയില്‍ പണ്ടില്ലാതിരുന്ന, എന്നാല്‍ കോണ്‍ഗ്രസില്‍ പുകഞ്ഞു കൊണ്ടിരുന്ന ഗ്രൂപ്പുകളിയില്‍ സാധാരണക്കാരായ ജനങ്ങള്‍ക്ക് ഒരു താല്പര്യവുമില്ല എന്ന് കോണ്‍ഗ്രസ് കഴിഞ്ഞ തെരെഞ്ഞെടുപ്പോടെ മനസ്സിലാക്കി എങ്കില്‍, ഈ തെരെഞ്ഞെടുപ്പോടെ ഇടതു മുന്നണിക്കത് മനസ്സിലായാല്‍ അവര്‍ക്ക് കൊള്ളാം.

കനല്‍ said...

ഈ ജനവിധി ഇടതുപക്ഷത്തിന് ഒരു പാഠം പടിക്കാന്‍ നല്‍കിയെന്ന് പറഞ്ഞാല്‍ മതിയല്ലോ? ഇനിയവര്‍ നന്നാകുമോ എന്ന് നോക്കാം.
ജനവിധി മറിച്ചായിരുന്നേല്‍ ഒരിക്കലും അവര്‍ നന്നാവാന്‍ പോകുന്നില്ലായിരുന്നു.

{{ തല്‍കൊള്‍ }} said...

5. ലാവ്‌ലിന്‍ കേസില്‍ പിണറായി കുറ്റക്കാരനല്ലെന്ന് പാര്‍ട്ടി നേതാക്കള്‍ക്കറിയാമെങ്കിലും താഴേത്തട്ടിലുള്ള സാധാരണക്കാര്‍ക്ക് അതറിയില്ല, അവര്‍ക്കത് മനസ്സിലാകില്ല.( ? )

അനില്‍, ഇതൊട്ടും മനസ്ലിലായില്ലല്ലൊ.

പാര്‍ട്ടി നേതാക്കള്‍ക്കും പാര്‍ട്ടിക്കും പങ്കില്ലേ. പിന്നെയെന്തിന്‌ അനുഭാവികളെ പഴിക്കണം ?

അനില്‍ശ്രീ... said...

തല്ലുകൊള്ളി,
ഞാന്‍ പറഞ്ഞത് ഇതാണ്. പിണറായി കുറ്റക്കാരനല്ല എന്ന് പാര്‍ട്ടി നേതാക്കളും അണികളും പറയുന്നുവെങ്കിലും, അത് അത്രക്ക് മുഖവിലക്കെടുക്കാന്‍ നിഷ്‌പക്ഷരെന്ന് പറയുന്ന വിഭാഗവും താഴേ തട്ടിലുള്ള അനുഭാവികളും തയ്യാറായിട്ടില്ല എന്ന് തോന്നുന്നു. അവരുടെ മുമ്പില്‍ ഇപ്പോഴും അത് ചീഞ്ഞു നാറുന്ന ഒരു വിഷയമാണ്.

എന്തെക്കൊയോ കള്ളക്കളി നടന്നു, അല്ലെങ്കില്‍ നടക്കുന്നു, എന്നാണ് 'നെറ്റ് വായിക്കാത്ത', പാര്‍ട്ടി ക്ലാസുകള്‍ അറ്റന്റ് ചെയ്യാത്ത, സാധാരണ ഭാഷ മാത്രം മനസ്സിലാകുന്ന അടിസ്ഥാന വര്‍ഗ്ഗത്തിന് തോന്നിയിരിക്കുന്നത്. (ഇലക്ഷന്‍ കഴിഞ്ഞാണെങ്കിലും) പിണറായിയെ പ്രോസിക്യൂട്ട് ചെയ്യണ്ട എന്ന തീരുമാനം പോലും ഈ വിഭാഗം ആള്‍ക്കാര്‍ സംശയദൃഷ്ടിയോടെയേ കാണൂ എന്നര്‍ത്ഥം.

അനില്‍ശ്രീ... said...

ഒരു ജാമ്യം കൂടി.... ഞാന്‍ അച്ചുതാനന്ദന്‍ ഫാന്‍ ഒന്നുമല്ല. തല്ലുകൊള്ളിയുടെ ചോദ്യത്തില്‍ അങ്ങനെയൊരു സംശയമുണ്ടോ എന്നൊരു സംശയം. അതുകൊണ്ടാണിങ്ങനെ ഒരു ജാമ്യം കൂടി എടുത്തത്.

paarppidam said...

താങ്കളുടെ നിരീക്ഷണങ്ങൾ ശരിയാണ്‌.മദനിയെ സെക്യുലറാക്കി മാന്യനാക്കുവാനും അതുവഴി വോട്ടുപിടിക്കുവാനും ശ്രമിച്ചതിലൂടെ നഷ്ടപ്പെട്ടത്‌ തീർച്ചയായും പാർട്ടിയുടെ വിശ്വാസ്യതയാണ്‌. സാധാരണക്കാരിൽ നിന്നും പാർട്ടി അനുഭാവികളിൽ നിന്നും ഉള്ള ശക്തമായ പ്രതിഷേധം ആണിതിൽ പ്രതിഫലിച്ചത്‌.
മദനി വിവാദത്തിലൂടെ മാധ്യമ ശ്രദ്ധ ലാവ്ലിൻ വിഷയത്തിൽ നിന്നും മാറ്റുവാൻ കഴിഞ്ഞു എങ്കിലും അതു കൂടുതൽ പാരയായി മാറി.

ഘടകക്ഷികളെ പിണക്കിയതും ഒരു പരിധിവരെ മദനി ബാന്ധവത്തിനു വേണ്ടിയാണ്‌. എന്തായാലും വി.എസ്സ്‌ മുന്നോട്ടുവെച്ച ആശയങ്ങൾ ആണ്‌ ശരിയെന്ന് വന്നിരിക്കുന്നു.ജനം വി.എസ്സിനൊപ്പം തന്നെ എന്ന് പറയാം.പാർട്ടിതലത്തിൽ ഔദ്യോഗികപക്ഷം വി.എസ്സിനെ നിശ്ശബ്ദനാക്കുമ്പോൾ ജനം പാർട്ടിയെ നിശ്ശബ്ദമാക്കുന്നു....ചെട്ടിയെ ജനം പറ്റിക്കും എന്നാണല്ലോ?

വാഴക്കോടന്‍ ‍// vazhakodan said...

പാര്‍ട്ടിയെ ശവക്കുഴിയിലേക്ക് തള്ളി വിടുന്ന നേതാക്കന്മാര്‍ ഇപ്പോഴും മൂഡസ്വര്ഗ്ഗത്തിലാണെങ്കില്‍ ഇനിയും ആ പാര്‍ട്ടിക്കു ഒരു ഉയിര്‍ത്തെഴുനെല്‍പ്പ് ഉണ്ടാകില്ല. തെറ്റ് തിരുത്താന്‍ തയ്യാറായില്ലെങ്കില്‍ ഇനിയും ഈ പാര്‍ട്ടിയുമായുള്ള അനുഭാവം പുനഃപരിശോധനയ്ക്ക് വിധേയമാക്കേണ്ടി വരും! (ചുമ്മാ!:))

മുക്കുവന്‍ said...

ലാവ്‌ലിന്‍ കേസില്‍ പിണറായി കുറ്റക്കാരനല്ലെന്ന് പാര്‍ട്ടി നേതാക്കള്‍ക്കറിയാമെങ്കിലും താഴേത്തട്ടിലുള്ള സാധാരണക്കാര്‍ക്ക് അതറിയില്ല, അവര്‍ക്കത് മനസ്സിലാകില്ല.


thats correct .. all leaders got enough share from the deal.. but hte common comrades did not :)

ബയാന്‍ said...

അനില്‍ : തെരഞ്ഞെടുപ്പുഫലം പുറത്തുവന്നു, നാലു സീറ്റില്‍ വിജയിച്ചു എന്നകേട്ടപ്പോള്‍ തന്നെ ഔദ്യോഗിക പക്ഷം ചിരിച്ചു മണ്ണ് കപ്പിക്കാണും. ഇവര്‍ ഈ തിരഞ്ഞെടുപ്പിനെ അടുത്ത നിയസഭാ തെരഞ്ഞെടുപ്പിലേക്കുള്ള ഒരു നെറ്റ് പ്രാക്റ്റീസായിട്ടേ കണ്ടിട്ടുള്ളൂ, പിന്നല്ലേ ജയം. ഇപ്പോഴെങ്ങാനും ഇടതുപക്ഷം ജയിച്ച് പോയിരുന്നെങ്കില്‍ നിയസഭാ തെരഞ്ഞെടുപ്പില്‍ കൈവിട്ടുപോയേനെ. കൊക്ക് എത്ര കുളം കണ്ടതാ അത്രയേയുള്ളൂ ഈ തെരഞ്ഞെടുപ്പ് ഇടതുപക്ഷത്തിന്.


ഈ തെരഞ്ഞെടുപ്പ് നല്‍കുന്ന ഒരു വലിയ സന്ദേശം കേരളത്തിന്റെ മണ്ണ്‍ വര്‍ഗ്ഗീയ രാക്ഷ്ട്രീയത്തിന് പാകമായിരിക്കുന്നു എന്നത് മാത്രമാണ്. മുന്നണിരാക്ഷ്ട്രീയത്തിന്റെ നന്മ കേരളം അനനുഭവിച്ചിട്ടുങ്കില്‍ അതിന്റെ തിന്മ അനുഭവിക്കാനിരിക്കുന്നേയുള്ളൂ,ഒളിഞ്ഞും തെളിഞ്ഞും മതവര്‍ഗ്ഗീയതയായിരുന്നു ഈ തെരഞ്ഞെടുപ്പിന്റെ മുഖ്യചേരുവ ,
മുന്നണി രാക്ഷ്ട്രീയം കൊണ്ട് നടക്കുന്ന പ്രബുദ്ധസാക്ഷരകേരളത്തിന്റെ സാങ്കേതിക മെയ്‌വഴക്കം ഇനികാണാനിരിക്കുന്നേയുള്ളൂ.

കുഞ്ഞന്‍ said...

അനില്‍ശ്രീ മാഷെ,

ഒരു സാധരണ ഇടതുപക്ഷ ചിന്താഗതിക്കാരന്റെ കാഴ്ചപ്പാടുകളാണ് താങ്കള്‍ പറഞ്ഞത്. എന്നാല്‍ പോയന്റ് നമ്പര്‍ അഞ്ചിന് ചെറിയൊരു കല്ലുകടി തോന്നുന്നു.

2004 ലെ കോണ്‍ഗ്രസ്സിന് സംഭവിച്ച പാളിച്ചകളും തിരിച്ചടികളും കണ്ടിട്ടും, സ്വന്തം പ്രമാണിത്വം ഒന്നുകൊണ്ടുമാത്രം ചോരകൊടുത്തും പോരാടിയും വളര്‍ത്തിയ പാര്‍ട്ടിയെ ഇല്ലായ്മചെയ്യുന്നതു കാണുമ്പോള്‍ വിഷമം ഉണ്ടാവുന്നു. ഈങ്ക്വിലാബ് വിളിച്ചുപോയില്ലെ മാഷെ...

നിരക്ഷരൻ said...

അനില്‍ - ഞാനൊരു പാര്‍ട്ടിയുടേയും വക്താവല്ലെന്ന് പറഞ്ഞുകൊണ്ട് എന്റെ അഭിപ്രായം പറയട്ടേ ? ഇപ്പറയുന്നതെല്ലാം എന്റെ അഭിപ്രായം മാത്രം. ഒക്കെ തെറ്റാകാം, ചിലതൊക്കെ ശരിയുമാകാം. എന്റെ അഭിപ്രായം മാത്രമാണിത്.

ഏതെങ്കിലും ഒരു പാര്‍ട്ടിസ്ഥാനാര്‍ത്ഥിക്ക് വോട്ട് ചെയ്യുക എന്നതില്‍ നിന്ന് മാറിച്ചിന്തിക്കാന്‍ തുടങ്ങിയിരിക്കുന്നു ജനം. അടിയുറച്ച പാര്‍ട്ടി (ഏത് പാര്‍ട്ടിയുമാകട്ടെ)വിശ്വാ‍സികള്‍ തിങ്ങിനിറഞ്ഞ കുടുംബത്തില്‍ നിന്നുവരെ വികസനത്തിനും, സ്വന്തം മണ്ഡലത്തിനും പ്രയോജനപ്പെടാന്‍ സാദ്ധ്യതയുണ്ടെന്ന് കണ്ട വ്യക്തികളെ നോക്കി വോട്ട് ചെയ്ത സംഭവങ്ങള്‍ എനിക്കറിയാം.

ഉദാഹരണം (1)- അടിയുറച്ച ഒരു കോണ്‍‌ഗ്രസ്സ് കുടുംബം മൊത്തം, വയനാ‍ട്ടില്‍ ഷാനവാസിന് വോട്ട് ചെയ്യാതെ മുരളീധരന് വോട്ട് ചെയ്തതായി നേരിട്ടറിയാം. മുരളീധരന്‍ ജയിച്ചാല്‍, കോണ്‍‌ഗ്രസ്സ് കേന്ദ്രത്തില്‍ അധികാരത്തില്‍ വന്നാല്‍, അദ്ദേഹം ഒരു മന്ത്രിയാകാന്‍ സാദ്ധ്യതയുണ്ടെന്നും, അങ്ങിനെ വന്നാല്‍ ഏറ്റവും ചുരുങ്ങിയത് ആ മണ്ഡലത്തിനെങ്കിലും ഗുണമുണ്ടാകുമെന്നും അത് തങ്ങള്‍ക്കും ഗുണം ചെയ്യുമെന്ന വളരെ പ്രാക്‍ടിക്കലായ ചിന്തയായിരുന്നു ആ വോട്ടിങ്ങിന് പിന്നില്‍.

ഉദാഹരണം (2)- അടിയുറച്ച മാര്‍ക്‍സിസ്റ്റ് കുടുംബം മൊത്തമായി പോയി ഡോ:ശശി തരൂരിന് വോട്ട് ചെയ്തതാ‍യും, അദ്ദേഹത്തിനുവേണ്ടി വോട്ട് പിടിച്ചതായും എനിക്കറിയാം. ആ കുടുംബത്തിന്റെ ഒരംഗം ഇപ്പോളിവിടെ എന്റെ മുന്നില്‍ ശശി തരൂരിന്റെ വിജയം ആഘോഷിക്കുന്നു. അങ്ങനെ വോട്ട് ചെയ്യാന്‍ ആ കുടുംബത്തെ പ്രേരിപ്പിച്ചതും ആദ്യത്തെ ഉദാഹരണത്തില്‍ പറഞ്ഞ കാരണമാകാം.

കേരളത്തില്‍ അങ്ങോട്ടും ഇങ്ങോട്ടും മത്സരിക്കുന്ന കക്ഷികള്‍ ഒരാവശ്യം വരുമ്പോള്‍ (അതിന്റെ പിന്നിലുള്ള കാരണങ്ങള്‍ എന്തൊക്കെയാണെങ്കിലും) കേന്ദ്രത്തില്‍ ഒരുമിച്ച് ചേര്‍ന്ന് മന്ത്രിസഭയുണ്ടാക്കിയില്ലേ ? എങ്കില്‍പ്പിന്നെ ഇങ്ങനെ വളരെ പ്രാക്‍ടിക്കലായി വോട്ട് ചെയ്യുന്നതില്‍ എന്താണ് തെറ്റ്, എന്നായിരിക്കാം അവര്‍ ചിന്തിച്ചത്. തങ്ങള്‍ക്ക് ഗുണമുണ്ടാകാന്‍ സാദ്ധ്യതയുള്ള സ്ഥാനാര്‍ത്ഥിക്ക് (പാര്‍ട്ടിക്കല്ല)അവര്‍ വോട്ട് ചെയ്യൂന്നു.

ഇത്തരം ചിന്താഗതിക്കാര്‍ ഇനിയുമുണ്ടാകും. അവരുടെ എണ്ണം കൂടിക്കൂടിവരും.(ഞാനും അത്തരത്തില്‍ ചിന്തിക്കുന്ന ഒരാളാണ്.) അങ്ങനെ വരുമ്പോള്‍ പരാജയത്തിന്റെ കാരണങ്ങള്‍ കണ്ടുപിടിക്കുന്നതും ഒരു പരാജയത്തില്‍ കലാശിക്കും. ശരിയായ കാരണം കണ്ടുപിടിക്കാനാകാതെ പാര്‍ട്ടിക്കാര്‍ വഴിമുട്ടും.

പാര്‍ട്ടിക്കല്ല ഗുണമുണ്ടാകേണ്ടത്, ജനങ്ങള്‍ക്കാണ്. പാര്‍ട്ടി നേതാക്കന്മാര്‍ക്കല്ല ഗുണമുണ്ടാകേണ്ടത് , നാടിനാണ്. രാഷ്ടത്തിനുവേണ്ടി പ്രവര്‍ത്തിക്കുന്നവരാകണം രാഷ്ടീയക്കാര്‍. സ്വന്തം പാര്‍ട്ടിക്ക് വേണ്ടി മാത്രം പ്രവര്‍ത്തിക്കുന്നവരാകരുത് രാഷ്ടീയക്കാര്‍. നല്ലത് ചെയ്യുന്നത് ഏറ്റവും വലിയ ശത്രുവായാല്‍പ്പോലും അംഗീകരിക്കാന്‍ പറ്റണം. സ്വന്തം പാര്‍ട്ടിക്കെതിരായി എന്തെങ്കിലും ശത്രുപക്ഷത്തുള്ളയാള്‍ പറഞ്ഞാല്‍പ്പോലും അത് രാഷ്ടത്തിന് അനുകൂലമായതാണെങ്കില്‍ അതിനെ അനുക്കൂലിക്കാന്‍ പറ്റണം. അത്രയൊക്കെ വിശാലമായ മനസ്സ് നിലവിലുള്ള നമ്മുടെ സോ കോള്‍ഡ് രാഷ്ടീയക്കാര്‍ക്ക് ഉണ്ടായാല്‍ നമ്മുടെ കൊച്ചുകേരളം മാത്രമല്ല, ഇന്ത്യാരാജ്യവും അക്ഷരാര്‍ത്ഥത്തില്‍ ദൈവത്തിന്റെ സ്വന്തം നാടായി മാറിയെന്നുവരും.

അങ്ങനൊക്കെ നടക്കണമെങ്കില്‍ മറ്റെന്തെങ്കിലും ഒരു വിപ്ലവം തന്നെ ഉണ്ടാകേണ്ടി വരും. അപ്പോഴേ‍ ഈങ്ക്വിലാബ് സിന്ദാബാദ്(വിപ്ലവം ജയിക്കട്ടെ)എന്ന മുദ്രാവാക്യത്തിന് ഒരു അര്‍ത്ഥമുണ്ടാകൂ.

രാമചന്ദ്രൻ വെട്ടിക്കാട്ട് said...

പിണറായി, ലാവ് ലിനില്‍ നിന്ന് ശ്രദ്ധതിരിക്കാന്‍ തന്ത്രപൂര്‍വ്വം പിഡിപി യെയും കൂട്ടി പ്രചാരണങ്ങളെ മൊത്തത്തില്‍ ഹൈജാക്ക് ചെയ്ത് ലാവ് ലിന്‍ പ്രശ്നം തിരഞ്ഞെടുപ്പില്‍ ഒരു വിഷയമേ അല്ലാതാക്കി. അപ്പൊള്‍ കുറഞ്ഞത് പത്ത് സീറ്റെങ്കിലും എല്‍ ഡി എഫിന് കിട്ടിയാല്‍ തന്റെ കാര്യം പോക്കാണെന്ന് മനസ്സിലാക്കിയ വി എസ്സ് അനുയായികളെ കൊണ്ട് മാറ്റി കുത്തിച്ചു. ഫലം യു ഡി എഫ് തൂത്തു വാരി. അതാണ് ഇന്നത്തെ വി എസ്സിന്റെ ചിരിയില്‍ നിന്ന് മനസ്സിലാവുന്നത്. രണ്ട് പേരും കൂടി സി പി എമ്മിനെ ഒരു വഴിക്കാക്കി. ഇത് യു ഡി എഫിന്റെ വിജയത്തേക്കാള്‍ സി പി എമ്മിന്റെ കാട്ടിക്കൂട്ടലുകളുടെ പരാജയമാണ്.

അനില്‍@ബ്ലോഗ് // anil said...

അനില്‍ശ്രീ,
അത്ഭുതകരമായ എന്തെങ്കിലും നടന്നു എന്നു കരുതേണ്ട കാര്യമില്ല. കഴിഞ്ഞ പ്രാവശ്യം 19 സീറ്റില്‍ ജയിച്ചതാണ് അത്ഭുതമായിരുന്നത്. ഇവിടുത്തെ പാര്‍ട്ടി നിലപാടുകളുടെ സ്വാഭാവിക പരിണാമമാണ് ഈ റിസള്‍ട്ട്.
അഖിലേന്ത്യാ അടിസ്ഥാനത്തില്‍ യു.പി.എക്കുണ്ടായ മുന്നേറ്റം കേരളത്തിലും പ്രതിഫലിച്ചിട്ടുണ്ട്.
പശ്ചിമ ബംഗാളില്‍ പാര്‍ട്ടി നയിക്കുന്നത് പിണറായി അല്ലല്ലോ, എന്നിട്ടും പിന്നോട്ടി അല്ലെ നേരിട്ടത്. ചുരുക്കത്തില്‍ നയപരമായ കാര്യങ്ങളില്‍ വന്ന പരാജയമാണിതിനു കാരണം.

ഓഫ്ഫ്:
ഇനി രണ്ടു വര്‍ഷം കഴിയുമ്പോള്‍ തദ്ദേശ സ്വയം ഭരണ സ്ഥാപനങ്ങളിലേക്ക് തിരഞ്ഞെടുപ്പുണ്ട്, അവിടുന്ന് ഒരു വര്‍ഷത്തിനുള്ളില്‍ നിയമ സഭയിലേക്കും.

പാര്‍ത്ഥന്‍ said...

എനിയ്ക്ക് ഈ കക്ഷിരാഷ്ട്രീയത്തില്‍ ഒരു താല്പര്യവും ഇല്ലെങ്കിലും, ഇന്ന് എഫ്.എം. റേഡിയോയില്‍ ഒരു നേതാവിന്റെ അഭിപ്രായം ശ്രദ്ധിച്ചിരുന്നു.
എല്‍ഡിയെഫ്ന്റെ പരാജയ കാരണം, സി.പി.എം. ന്റെ ഉള്ളിലെ അഭിപ്രായവ്യത്യാസങ്ങളാല്‍ ഉണ്ടായ ചേരിപ്പോരുകളാണെന്നും, അതില്‍ നേതാക്കളുടെ കൈകള്‍ എത്രത്തോളം ഉണ്ടായിരുന്നെന്ന് അന്വേഷിക്കണമെന്നും വിദ്വാന്‍ അഭിപ്രായപ്പെട്ടിരുന്നു.

എനിയ്ക്ക് ഇതിനെക്കുറിച്ച് ഒരു അഭിപ്രായം മാത്രമെ ഉള്ളൂ. ജനഹിതമറിയാതെ പാര്‍ട്ടിയുടെ മുഖച്ഛായ രക്ഷിക്കാനെന്നും പറഞ്ഞ് കാട്ടിക്കൂട്ടുന്ന കാര്യങ്ങളിലൊന്നും സാമാന്യ ജനത്തിന്‌ ഒരു കാര്യവുമില്ല. മുഖച്ഛായ നോക്കേണ്ടത് ജനങ്ങളുടെ കര്‍ത്തവ്യമല്ല. ജനങ്ങള്‍ക്കുവേണ്ടി നല്ലകാര്യങ്ങള്‍ ചെയ്ത പാര്‍ട്ടി ഭൂരിപക്ഷം ആകുമ്പോള്‍ അതാണ്‌ ജനങ്ങള്‍ കൊടുക്കുന്ന പാരിതോഷികം. ചുവന്നകൊടി മാത്രം കണ്ണില്‍ പെടുന്ന ജനങ്ങളുടെ തലമുറ അവസാനിച്ചുകൊണ്ടിരിക്കുന്നു എന്ന തിരിച്ചറിവ് ഇനിയെങ്കിലും ഉണ്ടാകട്ടെ.

Joker said...

കഴിഞ്ഞ ലോകസഭാ ഇലക്ഷനില്‍ നിന്നും വ്യത്യസ്ഥമായി എന്തല്‍ഭുതമാണ് ഇപ്പോള്‍ ഉണ്ടായിട്ടുള്ളത്. ദേശീയ തലത്തില്‍ കോര്‍പറേറ്റ് മാധ്യമ മറ്റ് ബിസിനസ് മാഫിയകളുടെയും കൂടെ വിജയമാണിത്. തൂടങ്ങി വെച്ച പല പ്രോജക്ടുകളും പൂര്‍ത്തിയാക്കാന്‍ ഈ വിജയം കോണ്‍ഗ്രസ്സിനും മറ്റ് ബിസിനസ്സ് കങ്കാണിമാര്‍ക്കും ഉപകാരപ്പെടും.

20 ല്‍ 1 നേക്കാള്‍ എത്രയോ ഭേദമാണ് 20 ല്‍ 4 എന്ന് കണക്കറിയുന്നവര്‍ക്ക് മനസീലാക്കാന്‍ ബുദ്ധിമുട്ട് അനുഭവപ്പെടേണ്ടതില്ല.അന്നില്ലാത്ത സിപി എം സ്നേഹം ഇപ്പോള്‍ കാണിക്കുന്നവര്‍ വരും തെരെഞ്ഞെടുപ്പുകളും ഫലങ്ങാളും വരും എന്ന് മറക്കാത്രിക്കുക. എല്ലാവരും ഈ പരിസരത്ത് എല്ലാം കാണാണം.

സാധാരണായായി ഉണ്ടാവാറുള്ള ഭരണാ വിരുദ്ധ വികാരം ഈ തെരെഞ്ഞെടുപ്പില്‍ പ്രതിഫലിച്ചു എന്നുള്ളത് പുതിയ കാര്യമല്ല. സാധാരണ ജനങ്ങളെ ബാധിക്കുന്ന കാര്യങ്ങള്‍ ഇനിയും ബാക്കൊ നില്‍ക്കുന്നു. കഴിഞ്ഞ അഞ്ച് വര്‍ഷത്തെ ഭരണം കൊണ്ട് തന്നെ പൊതു മേഖലയടാക്കം കോര്‍പറേറ്റുകള്‍ക്ക് തീറെഴുതി കൊടുത്ത മന്‍മോഹന്‍ സര്‍ക്കാര്‍ അത് തുടാരുന്നത് നമുക്ക് കാണാം. വോട്ടു കുത്തിയ ദരിദ്ര നാരായണന്‍ മാര്‍ക്ക്. എല്ലാം വേദനയോടെ കണ്ടു കൊണ്ണ്ടിരിക്കാം.

ഇടത് പക്ഷത്തിനേറ്റതിരിച്ചടിക്കപ്പുറം മാഫിയാ സംഘങ്ങാളും , കോറ്പറേറ്റുകളും , മാധ്യമ മാഫിയകളുടെയും കൂടി മധ്യ വര്‍ഗ്ഗത്തിന്റെ വിജയമാണിത് എന്ന് വിലയിരുത്തുമ്പോഴാണ് ഈ തെരെഞ്ഞെടുപ്പ് വിലയിരുത്തല്‍ പൂര്‍ണമാകൂ.

ചില കാര്യങ്ങള്‍

1. പൊന്നാനിയില്‍ മദനിയെ ഉപയോഗിച്ച് കൊണ്ടുള്ള പ്രചാരണത്തില്‍ എന്താണ് പ്രശ്നമുണ്ടായിരുന്നത്. ഒരാള്‍ അയാളുടെ നിലപാടുകള്‍ മാറ്റിയാല്‍ പോലും അവരെയൊന്നും എന്നും തീണ്ടാപാടകലെ നിര്‍ത്തണമെന്ന് എന്തര്‍ഥത്തിലാണ് പറയുന്നത്. പരാജയത്തിനടിസ്ഥാനം ഇതൊന്നുമല്ല സിപി ഐ യുടെ പലം വലിയും, എന്‍ ഡീ ഫ് അടക്കമുള്ളവരുടെ ധ്രുവൂകരണവും കാരണാമായിട്ടുണ്ട്.

2. സിപി എം ലെ പാളയത്തില്‍ പട പരാജയത്തിന് കാരണാമായിട്ടുണ്ട്. എന്നാല്‍ സാധാരണയുണ്ടാകുന്ന ഭരണ വിരുദ്ധ വികാരം എന്നതിനേക്കാള്‍ അപ്പുറമല്ല ഇത്.

3. സിപി ഐ യെ ഇനിയും മുന്നണിയില്‍ വെച്ചിരുന്നാല്‍ സിപിഎം കൂടി കേരളത്തില്‍ കട്ടപ്പുറത്ത് കയറും എന്ന് ഈ തെരെഞ്ഞെടുപ്പ് ഒരു ഏറ്റവും വലിയ തെളിവാണ്.

4. ദേശീയ തലത്തില്‍ മോഡിയെ പോലുള്ള ഇന്ത്യന്‍ ഒബാമമാരെ (ഏഷ്യാനെറ്റ് ) പ്രധാനമന്ത്രിയായി വരുന്നതിനേക്കാള്‍ എത്രയോ ഭേദം നമ്മുടെ വണ്ടര്‍ ഫുള്‍ സിംഗ് തന്നെ.

5. ഇടത് പക്ഷത്തിന് കൂടി സ്വാധീനമുള്ള ഒരു ഭരണാമായിരുന്നു കേന്ദ്രത്തില്‍ ഏരെ ഗുണാം ചെയ്യുക എന്ന് നിക്ഷപക്ഷര്‍ക്ക് കൂടി അഭിപ്രായമുള്ളതായിരുന്നു. പണ്ട് മുതലേ ഒറ്റകക്ഷിയായി ഭരിച്ച കോണ്‍ഗ്രസ്സ് കാണിച്ച കൊള്ളരുതായ്കകള്‍ ഇനിയും തുടരുന്നത് കാണാം.

മൊത്തതില്‍ ഇന്ത്യന്‍ ജനാധിപത്യത്തിന്റെ അപചയം എന്നത് ഒരിക്കല്‍ കൂടി ഈ തെരെഞ്ഞെടുപ്പ് ഫലങ്ങള്‍ തെളിയിക്കുന്നു.




ഇനി സിപീ എം

കാപ്പിലാന്‍ said...

അതേ, അതേ . വാദഗതികള്‍ ഇനിയും അനേകം വരും .അടുത്ത നിയമസഭ തിരഞ്ഞെടുപ്പുവരെ .കണക്കു കൂട്ടലുകള്‍ എവിടെയോ പിഴച്ചിരിക്കുന്നു . നമുക്കിനി താഴെതട്ടില്‍ നിന്നും തുടങ്ങാം .അതുവരെ

ലാല്‍ സലാം സഖാവേ .

Suraj P Mohan said...

ഇത് ഐക്യ ജാനാധിപത്യ മുന്നണിയുടെ വിജയം എന്നതിനേക്കാളുപരി സി.പി.എം-ന്റെ പരാജയം എന്ന് കാണാനാണെനിക്കിഷ്ടം. എനിക്കും അങ്ങനെ തന്നെ കാണാനാണിഷ്ടം .
ജനങ്ങള്‍ക്കുള്ള വകതിരിവിന്‍റെ അല്പമെങ്കിലും നമ്മുടെ നേതാക്കള്‍ക്കുണ്ടായിരുന്നെങ്കില്‍ ... ലാല്‍ സലാം

സുനിൽ കൃഷ്ണൻ(Sunil Krishnan) said...

അനിലിന്റെ വിശകലനത്തോടുള്ള ബഹുമാനം വച്ച് ഒന്നു രണ്ടു കാര്യങ്ങൾ പറയട്ടെ.

ഔദ്യോഗിക വിഭാഗം എന്ന പ്രയോഗം തെറ്റാണു.പാർട്ടി ഒരു തീരുമാനമെടുത്തു കഴിഞ്ഞാൽ പിന്നെ അതിൽ ഉറച്ചു നിൽക്കുക്ക എന്നത് ഒരു കർത്തവ്യം ആയിരിയ്ക്കണം.അപ്പോൾ അതിനെ ന്യായീകരിച്ചു സംസാരിയ്ക്കാൻ പാർട്ടി സെക്രട്ടറി എന്ന നിലയിൽ പിണറായിയ്ക്കു ഉത്തരവാദിത്വം ഉണ്ട്.തെറ്റായാലും ശരിയായാലും അതു പിണറായി ഭംഗിയായി ചെയ്തിട്ടുണ്ട്.അതിനെ താൻ പ്രമാണിത്വം എന്ന് പറയുന്നതിൽ കാര്യമില്ല.പാർട്ടി കമ്മറ്റിയിൽ ഒരു തിരുമാനത്തെ അനുകൂലിയ്ക്കുകയും വെളിയിൽ വന്നു പത്രക്കാരുടെ മുന്നിൽ “ഞഞ്ഞാ പിഞ്ഞാ’ പറഞ്ഞ് പാർട്ടിയേയും മറ്റുള്ളവരേയും ഇകഴ്ത്തി സംസാരിയ്ക്കുകയും ചെയ്യുന്നത് ശരിയാണെന്ന് എനിയ്ക്ക്കു തോന്നുന്നില്ല.എടുത്ത തീരുമാനങ്ങൾ ശരിയോ എന്ന് ചിന്തിയ്ക്കുന്നതും ചർച്ച ചെയ്യുന്നതും മറ്റൊരു വിഷയം.പി.ഡി.പി ബന്ധം ആണെങ്കിലും,കോഴിക്കൊട് സീറ്റിന്റെ കാര്യമാണെങ്കിലും എല്ലാം പാർട്ടി ഒന്നിച്ചെടുത്ത തിരുമാനങ്ങൾ തന്നെ.അപ്പോൾ പുറത്തു നിന്ന് അതിനെതിരെ വന്ന എല്ലാ എതിർപ്പുകളേയും പിണറായി ശക്തിയായി എതിർത്തു എന്നത് ശരിയാണു.അതു അങ്ങനെ തന്നെ ആവുകയും വേണം.അപ്പോൾ തോൽ‌ക്കുന്നതും ജയിയ്ക്കുന്നതും വ്യക്തി അല്ല.പാർട്ടി ആണു.രാഷ്ട്രീയം എന്നത് ചലനാൽമകമാണ്.അതിൽ ഓരോ നിലപാടുകൾ ആ‍ാണു പ്രധാനം.അവയിൽ ചിലത് തെറ്റാവും,ചിലത് ശരിയാ‍വും.

പരാജയത്തിന്റെ കാരണങ്ങൾ അനിൽ പറഞ്ഞതിലും സങ്കീർണ്ണമാണു എന്നാണു എന്റെ വിലയിരുത്തൽ.അതിൽ പല ഘടകങ്ങൾ ഉണ്ട്.അനിൽ വിശദീകരിച്ച ഘടകങ്ങളേക്കാളേറെ വിശദീകരിയ്ക്കാത്ത ആ ഘടകങ്ങൾ ഏറെ സ്വാധീനം ചെലുത്തി എന്ന് വേണമെങ്കിൽ പറയാം.അതൊക്കെ സി.പി.എം.പരിശോധിയ്ക്കും എന്ന് കരുതാം.

എന്തായാലും ഇൻ‌ഡ്യയിൽ ഒട്ടാകെ ഇടതു പക്ഷ രാഷ്ട്രീയത്തിനു ഒരു തിരിച്ചടി നേരിട്ടിട്ടുണ്ട്.അത് എത്രമാത്രം “നല്ലതാണു” എന്ന് വരും കാലം തെളിയിയ്ക്കും.കോൺ‌ഗ്രസിനു ഇനി അതിന്റെ നയങ്ങൾ നടപ്പിലാക്കാം..കാത്തിരുന്നു കാണാം.

chithragupthan said...

കേളപ്പനെ ഓർമ്മയുണ്ടോ? ഗാന്ധിജിയുടെ കൂടെ കുറച്ചുകാലം നടന്നപ്പോളേക്കും കേരളക്കാർ അയാളെ കേരളഗാന്ധി എന്നു വിളിച്ചൂ. ആ വിദ്വാൻ പിന്നെ ഹിന്ദുഫാഷിസ്റ്റുകളുടെ കൂടെ കൂടി.അങ്ങനെ ജനങ്ങളെ ചതിച്ച കേളപ്പനെ വക വരുത്താൻ ഗൂഢാലോചന നടത്തിയെന്നു ഒരിക്കൽ സഗാവ് നായനാറ് ഒരിന്റർവ്യൂവിൽ വെളിപ്പെടുത്തിയിട്ടുണ്ട്. ഒരു പ്രത്യേക സ്ഥലത്തെ പരിപാടിക്കു ക്കേളപ്പൻ വരുമ്പോൾ കൊല്ലാനായിരുന്നു പ്ലാൻ. നായനാർ അവിട്യെത്തി.പക്ഷേ അസുഖം കാരണം അന്നു കേളപ്പൻ അവിടെ വന്നില്ല്. അങ്ങനെ ആ കൊല നായനാർക്കു ചെയ്യേണ്ടി വന്നീല്ല.
ഇന്ത്യയിലെ മുഴുവൻ മുസ്ലീങ്ങളും മാർക്ഷിസ്റ്റുകാരും വെറുക്കുന്ന അദ്വാനിയെ കൊല്ലാൻ ഗൂധാലോചന നടത്തി എന്നു മദനിക്കെതിരെ ത്തമിഴ്നാറ്റ് പോലീസെടുത്ത കേസുമായി സഹകരിച്ച് നായനാരുടെ പോലീസിനു മദനിയെ അറസ്റ്റു ചെയ്യേണ്ട കാര്യമെന്തായിരുന്ന് എന്നു കേരളത്തിലെ വലിയൊരു വോട്ട്ബാങ്ക് ചോദിച്ചപ്പോഴാണു പീഡിപിയോട് പിണറായിക്കു സ്നേഹം തോന്നിയത്.മദനിയെ മുസ്ലീങ്ങൾ ചതിച്കതുകൊണ്ടാണു നമ്മൾ പരാജയപ്പെതു,അല്ലാതെ പിണരായിയുടെ തെറ്റുകൊണ്ടല്ല്. മദനി സഖ്യംചെയ്യാൻ ഇങ്ങുവരുമ്പോൾ നാം മുഖ്സ്ം തിരിക്കണോ?
മദനി നമ്മുട് കൂടെ ചേർന്നപ്പോൾ, മുറുമുറുത്ത ചില നേതാക്കളൂണ്ട്.അവരെ ഒതുക്കാനാൺ രാമൻപിള്ളയെ പിണറായി ക്ഷണിച്ചത്.അതൊക്കെ തെറ്റെങ്കിൽ രാജിവക്കേണ്ടതു വീ,എസ്സ് ആണു, വിജയനല്ല്.

Anonymous said...

ബി.ജെ.പി വോട്ടുകൾ കോൺഗ്രസിനു കിട്ടി
അച്ചുതാനന്ദൻ പാലം വലിച്ചു
ഇസ്മായിലും വെളിയവും പാരപ്പണി ചെയ്തു
മദനി കാരണം ഹിന്ദുക്കൾ (ബിജെപിയല്ലാത്ത) യു.ഡി.എഫിനു വോട്ട് ചെയ്തു.
എൻ.ഡി.എഫ്. ജമാ അത്തെ ഇസ്ലാമി മുജാഹിദ് വിഭാഗങ്ങൾ പൊന്നാനിയിലും മലപ്പുറത്തും കാര്യമായൂം പ്രവർത്തിച്ചു

എന്നിട്ടും
കേരളത്തിൽ എൽ.ഡി.എഫ് തരംഗമുണ്ടായ അവസരത്തിലും ലീഗ് ലക്ഷങൽ വാരിക്കൂട്ടിയിരുന്ന്ന സ്ഥാനത്ത് തരംഗം ഉണ്ടായിട്ടില്ല

നോട്ട് ദ പോയന്റ്

ഇന്ത്യയിൽ ആകെ ബി.ജെ.പി വിരുദ്ധ വികാരം കോൺഗ്രസിനു അനുകൂലമായി

അനില്‍ശ്രീ... said...

സുനില്‍,

ഒരു പാര്‍ട്ടി പ്രവര്‍ത്തകന്റെ ഭാഗത്തു നിന്ന് നോക്കിയാല്‍ വിഭാഗീയത ഇല്ലെന്നും പാര്‍ട്ടിയുടെ നയമാണ് പിണറായി നടപ്പാക്കുന്നത് എന്നൊക്കെ പറയുന്നതില്‍ കുഴപ്പമില്ല. പക്ഷേ ഒരു സാധാരണക്കാരന് കൂടി അങ്ങനെ തോന്നുമ്പോഴേ അത് വോട്ട് ആയി മാറുകയുള്ളു. അക്കാര്യത്തില്‍ പരാജയം സംഭവിച്ചിരിക്കുന്നു. പുറമേ നില്‍ക്കുന്നവന് തോന്നുന്ന കാര്യമാണ് ഞാന്‍ പറഞ്ഞത്. ഓരോ പ്രസ്താവന വായിക്കുമ്പോഴും, ഓരോ തീരുമാനങ്ങള്‍ അറിയുമ്പോഴും ഒരു ജനകീയ പാര്‍ട്ടിയുടെ തീരുമാനങ്ങളാണെന്ന് സാധാരണക്കാരന് തോന്നിയില്ല. വര്‍ഷങ്ങളായി കൂടെയുള്ള ഘടക കക്ഷികളെ അവസാന നിമിഷത്തില്‍ പിണക്കുമ്പോഴും അതു വരെയില്ലാതിരുന്ന പി.ഡി.പി യെ ഉയര്‍ത്തി കൊണ്ടു നടക്കുമ്പോഴും സാധാരണക്കാരനും നിക്ഷ്പക്ഷമതികള്‍ക്കും അത് പൂര്‍ണ്ണമായി ഉള്‍ക്കൊള്ളാനാവില്ല എന്ന് ഒരു അടിസ്ഥാന വര്‍ഗ്ഗ പാര്‍ട്ടി നേതൃത്വത്തിന് മനസ്സിലാക്കാനാകുന്നില്ലെങ്കില്‍ അത് അവരുടെ തെറ്റല്ലേ?. പി.ബി അംഗം എന്ന നിലയില്‍ അച്ചുതാനന്ദനും ഈ നേതൃത്വത്തിന്റെ ഭാഗം തന്നെ.

സുനില്‍ പറഞ്ഞ പോലെ ഇടതു പക്ഷത്തിന് വ്യക്തമായ സ്വാധീനമുള്ള ഒരു ഗവണ്മെന്റ് ആയിരുന്നു വരേണ്ടിയിരുന്നത്. അതിന് വേണ്ടി ചെറിയ വിട്ടുവീഴ്ച്ചകള്‍ക്ക് തയ്യാറാകണമായിരുന്നു. കേരളത്തില്‍ ഒന്നോ രണ്ടോ സീറ്റ് ഘടക കക്ഷികള്‍ക്ക് വിട്ടു കൊടുത്താല്‍ പോലും ബാക്കിയുള്ള സീറ്റുകള്‍ കിട്ടിയിരുന്നെങ്കില്‍ അതാകുമായിരുന്നില്ലേ ഇതിലും നേട്ടം (കിട്ടുമായിരുന്നു എന്നല്ല പറഞ്ഞതിനര്‍ത്ഥം..)

വിഭാഗീയത ഇല്ലെന്നെ പറയുമ്പോഴും ജോസ് കെ മാണി "വരെ" ജയിച്ചില്ലേ? ചിന്തിച്ച് നന്നായാല്‍ പാര്‍ട്ടിക്ക് കൊള്ളാം.. പരാജയത്തിന്റെ കാരണങ്ങൾ ഞാന് ‍പറഞ്ഞതിലും സങ്കീർണ്ണമാണു എന്നെനിക്കറിയാം. അതിനെ പറ്റിയൊന്നും പറയാന്‍ ഞാന്‍ ആളല്ല. അതുകൊണ്ടാണ് മൂല കാരണങ്ങള്‍ എന്ന് ഒരു പാര്‍ട്ടി "അനുഭാവി" എന്ന നിലയില്‍ എനിക്കു തോന്നിയ കാര്യങ്ങള്‍ മാത്രം പറഞ്ഞത്.

അനില്‍ശ്രീ... said...

chithragupthan,

"മദനി സഖ്യംചെയ്യാൻ ഇങ്ങുവരുമ്പോൾ നാം മുഖ്സ്ം തിരിക്കണോ?"

ഒരിക്കലും വേണ്ട. പക്ഷേ മദനിയാണ് മലബാര്‍ മുഴുവന്‍ നേടിത്തരാന്‍ പോകുന്നത് എന്ന് കരുതി അദ്ദേഹത്തെ "ബൂസ്റ്റ്" ചെയ്തത് തെറ്റ്. ഇലക്ഷന്‍ സമയത്ത് മദനിക്കു വേണ്ടി മറ്റുള്ളവരെ പിണക്കിയത് തെറ്റ്.... അത്രയേ ഉദ്ദേശിച്ചുള്ളു.

Unknown said...

:)

Suraj P Mohan said...

chithragupthan,
കാലഘട്ടത്തിനനുസരിച്ചു നയങ്ങള്‍ മാറ്റിയില്ലെങ്കില്‍ ഒരു പാര്‍ടിക്കും നില നില്‍പ്പുണ്ടാവില്ല.
അന്നത്തെ കാലത്ത് നായനാര്‍ ഗൂഢാലോചന നടത്തിയത് അംഗീകരിക്ക പെട്ടേക്കാമായിരിക്കും.
ഇപ്പോള്‍ അങ്ങനെ ചെയ്‌താല്‍ അതും തീവ്രവാദവും തമ്മിലുള്ള വ്യത്യാസം എന്താണ്?
പിന്നെ
"മദനി സഖ്യംചെയ്യാൻ ഇങ്ങുവരുമ്പോൾ നാം മുഖ്സ്ം തിരിക്കണോ?"

മുഖം തിരിക്കേണ്ടവര്‍ക്ക് വേണ്ടി മുഖം തിരിക്കുക തന്നെ വേണം.
എങ്കില്‍ കുറച്ചു കൂടി അഭിമാനകരമായ പരാജയം ഏറ്റു വാങ്ങാമായിരുന്നു.

ഹന്‍ല്ലലത്ത് Hanllalath said...

കമ്യൂനിസ്റ്റുകളുടെ തൊഴുത്തില്‍ കുത്തിന്റെ ഫലം....

ചന്തു said...

PDP bandhavumaayi kootty vaayikan kollam

ചന്തു said...

Sorry here is the link
http://blog.ahamkaram.in/2009/04/orkut-sakkeer.html

Popular Posts

സന്ദര്‍ശകര്‍ വന്ന വഴി