വിശുദ്ധരും മനുഷ്യദൈവങ്ങളും

കേരളത്തിലെ കത്തോലിക്ക സഭക്ക് രണ്ട് വിശുദ്ധരെ കൂടി കിട്ടി. സ്വാഭാവികം. ഇന്ത്യയില്‍ കത്തോലിക്ക സഭക്ക് നല്ല രീതിയില്‍ വളര്‍ച്ചയുള്ള സ്ഥലം കേരളമാണ്‍. അപ്പോള്‍ ഇടക്കിടെ വിശുദ്ധരെ കിട്ടാതിരുന്ന് വിശ്വാസത്തിന്‍ മങ്ങലേല്‍ക്കാതിരിക്കാന്‍ ഇത് ആവശ്യമാണ്‍. ദൈവസഹായം പിള്ളയെ കൂടി എത്രയും പെട്ടെന്ന് വിശുദ്ധനാക്കാനുള്ള അത്ഭുത പ്രവൃത്തികള്‍ എവിടെ നിന്നെങ്കിലും വീണ്ടും റിപ്പോര്‍ട്ട് ചെയ്യപ്പെടാന്‍ സാധ്യത കാണുന്നുണ്ട്. അതിനു ശേഷം ഗോവ, കല്‍ക്കത്ത, മുംബൈ, ബാംഗളൂറ് മുതലായ ആള്‍ത്തിരക്കുള്ള അതിരൂപതകള്‍ക്കും കുറച്ച് വിശുദ്ധരെ കൊടുക്കാവുന്നതാണ്‍. കൂടെ സഭ വളര്‍ന്നു വരുന്ന ഇടങ്ങളിലും ഇടക്ക് ഒന്നു രണ്ട് വിശുദ്ധരെ പ്രഖ്യാപിക്കാവുന്നതാണ്‍.

അതൊക്കെ സഭയുടെ കാര്യം. ഇനി മറ്റുള്ളവരുടെ രസകരമായ ചില കാര്യങ്ങള്‍ കണ്ടു. കത്തോലിക്ക സഭ വിശുദ്ധരെ പ്രഖ്യാപിച്ചതില്‍ കളിയാക്കിയവര്‍ ധാരാളമുണ്ട്. പ്രത്യേകിച്ച് മറ്റു സഭക്കാരും മറ്റു മതക്കാരും. ഇന്നലെ പല പോസ്റ്റുകളിലും കണ്ടത് ഈ പ്രഖ്യാപനത്തിനെ പറ്റിയും അതിന്റെ പിന്നാമ്പുറ കഥകളെ പറ്റിയും അതിലെ ആള്‍ദൈവ കല്പ്പനകളെയും പറ്റിയുള്ള ചര്‍ച്ചകളാണ്‍.

അതില്‍ മറ്റു സഭകളെ എടുത്തു നോക്കിയാല്‍ എല്ലാ സഭകളും ഏതെങ്കിലും പുണ്യാളന്റെ പിന്തുടര്‍ച്ച അവകാശപ്പെടുന്നവയാണ്‍. അപ്പോള്‍ അവര്‍ക്ക് ഇതിനെ എതിര്‍‌ക്കാന്‍ എന്തവകാശം?. പറഞ്ഞു വരുമ്പോള്‍ ക്രിസ്ത്യന്‍ മതം തന്നെ യേശു എന്ന മനുഷ്യ ദൈവത്തിന്റെ പിന്തുടര്‍ച്ചയാണല്ലോ. അപ്പോള്‍ അവരെ നമുക്ക് ഒരു വശത്തു കൂടി വിടാം.

ഇനിയുള്ളത് മറ്റു മതസ്ഥരാണ്‍. മരിച്ചവരെ ആരാധിക്കുന്നവര്‍ എന്ന അര്‍ത്ഥത്തിലാണെന്ന് തോന്നുന്നു, "പ്രേതദൈവങ്ങളെ പൂജിക്കുന്നവരെന്ന്" കൃസ്ത്യാനികളെപറ്റി ഒരാള്‍ എഴുതിക്കണ്ടു. എഴുതിയ ആള്‍ ഹിന്ദുമത വിശ്വാസിയാണ്‍. ഇത് വളരെ രസകരമായ സംഗതിയായി തോന്നി. ജീവിച്ചിരിക്കുന്നവരും മരിച്ചവരുമായ അനേകം "വിശുദ്ധരെ" പൂജിക്കുന്നവരാണ്‍ ഹിന്ദുക്കള്‍. അമ്മയെന്നും ബാബയെന്നും സ്വാമിയെന്നും വിളിപ്പെരു മാറുമെന്നു മാത്രം. ലക്ഷക്കണക്കിന്‍ ഭക്തര്‍ വന്ന് ദര്‍ശനം തേടുന്ന ശബരിമല അയ്യപ്പന്‍ പോലും ജീവിച്ചിരുന്ന മനുഷ്യനാണ്‍ എന്നാണ്‍ കഥകള്‍ നമുക്ക് പറഞ്ഞു തരുന്നത്. അതെ പോലെ തന്നെ ഹിന്ദുക്കളുടെ ആരാധനാ പുരുഷന്മാരെല്ലാം തന്നെ  ജീവിച്ചു മരിച്ചവര്‍ തന്നെ. ഒരു കണക്കിന്‍ പറഞ്ഞാല്‍ മനുഷ്യ ദൈവങ്ങള്‍ തന്നെ. എന്നിട്ടും കൃസ്ത്യാനികളുടെ ആള്‍ദൈവങ്ങളെ കളിയാക്കാന്‍ നില്‍ക്കുന്നവരെ എന്തു പറയും?

മുഹമ്മദ് എന്ന മനുഷ്യന്‍ പറഞ്ഞ വെളിപ്പെടുത്തലുകളില്‍  നിന്ന് ഉത്ഭവിച്ച ഇസ്ലാം മതത്തില്‍ വിശ്വസിക്കുന്നവര്‍, ആള്‍ ദൈവങ്ങളില്‍ വിശ്വാസമില്ല എന്നു പറയുമ്പോഴും അനേകം കബറുകളില്‍  പോയി പ്രാര്‍ത്ഥിച്ചു മടങ്ങുന്നതു കൊണ്ടാകാം  ഈ കോലാഹലങ്ങളില്‍ വലിയ താല്പര്യമൊന്നും പ്രകടിപ്പിച്ചു കണ്ടില്ല. (അതോ ഞാന്‍ കാണാഞ്ഞതോ?). സ്വര്‍ഗ്ഗം എന്ന മിഥ്യയിലൂന്നിയ ഒരു ചിന്താധാര ഉണ്ടാക്കുകയും താന്‍ അവിടെ പോയിട്ടുണ്ടെന്ന് വിശ്വസിപ്പിച്ച് ആള്‍ക്കാരെ തന്നിലേക്കും തന്റെ കാഴ്ചപ്പാടുകളിലേക്കും ആകര്‍ഷിക്കുകയും ചെയ്ത മുഹമ്മദ് നബിക്കും ഇതെ പരിവേഷമാണുള്ളതെന്നും (അങ്ങനെയല്ല എന്നു അദ്ദേഹത്തിന്റെ ആരാധകര്‍ പറയുമ്പോഴും) കാണാം.

പറഞ്ഞു വന്നത് എല്ലാ മതങ്ങളും നില നില്‍ക്കുന്നത് ഇത്തരം ആള്‍ദൈവങ്ങളുടെ ബലത്തിലാണ്‍. ഏതെങ്കിലും മനുഷ്യന്റെയോ, അല്ലെങ്കില്‍ മനുഷ്യരുടെയോ സൃഷ്ടിയാണ്‍ എല്ലാ മതങ്ങളും അവയിലെ ദൈവ സങ്കല്പ്പങ്ങളും. മരിച്ചവരും ജീവിച്ചിരിക്കുന്നവരുമായ മനുഷ്യ ദൈവങ്ങളിലും അവര്‍ പറഞ്ഞ സൂക്തങ്ങളിലോ മന്ത്രങ്ങളിലോ വാക്യങ്ങളിലോ ഒക്കെ വിശ്വസിക്കുക മാത്രമാണ്‍ എല്ലാ വിശ്വാസികളും ചെയ്യുന്നത്.

ഒരു മതത്തിലെ ആള്‍ദൈവങ്ങളെ അല്ലെങ്കില്‍ മനുഷ്യ ദൈവങ്ങളെ വിമര്‍ശിക്കുമ്പോള്‍ തന്നെ, സ്വന്തം മതത്തിലെ ഇതേ ഗണത്തിലുള്ളവരെ അതെ കണ്ണു കൊണ്ട് കാണാനും തയ്യാറാകണം. അത് ദൈവീകഭാവമുണ്ടെന്ന് പറയുന്ന 'മനുഷ്യ'രാണെങ്കിലും വിശുദ്ധപദവി കൊടുത്ത പുണ്യാളര്‍ ആണെങ്കിലും!

മനുഷ്യര്‍ എല്ലാം മനുഷ്യര്‍ തന്നെ. അവരെ, ദൈവീക പരിവേഷമുള്ളവരാക്കി, ദൈവത്തിന്റെ സ്വന്തം ഭാഗമാക്കി, പുത്രനാക്കി, പ്രവാചകരാക്കി ഉയര്‍ത്തിക്കാട്ടുകയെന്നത് എല്ലാ മതത്തിന്റെയും നിലനില്‍പ്പിന്റെ ആവശ്യമാണ്‍. സ്വന്തം ആള്‍ദൈവങ്ങളെ തള്ളിപ്പറയാതെ ഒരാള്‍ക്കും മറ്റൊരു മതത്തിലെ ആള്‍ദൈവങ്ങളെ ഇകഴ്ത്തിക്കാണിക്കാന്‍ ധാര്‍മികമായ അവകാശമില്ല എന്നു വേണം കരുതാന്‍. അതല്ലയെങ്കില്‍ ആള്‍ദൈവങ്ങളും വിശുദ്ധരും സൃഷ്ടിക്കപ്പെട്ടു കൊണ്ടേയിരിക്കും.

ചുംബനത്തിലെ സാംസ്കാരിക ചര്‍ച്ചകള്‍ - ഒരു തിരിഞ്ഞു നോട്ടം

1985 ഏപ്രില്‍ മാസം. ആ അവധിക്കാണ് കുടുംബസമേതം ഞങ്ങള്‍ ബോംബേ കാണാന്‍ പോകുന്നത്. ആന്റി അവിടെ താമസിക്കുന്നുണ്ട്. അവരുടെ കൂടെ ഒരു ദിവസം ജൂഹുവിലും പോയി. ബീച്ചില്‍ ഒരു പ്രദേശം കഴിഞ്ഞപ്പോള്‍ അവിടെയുള്ള ആന്റി പറഞ്ഞു ഇനി അങ്ങോട്ട് പോകണ്ട. പലതും കാണും എന്ന്. അപ്പോള്‍ തന്നെ പലതും കണ്ടിരുന്നു.

1988-89 വര്‍ഷം. ഞാന്‍ കോട്ടയത്ത് പഠിക്കുന്ന സമയം. സെന്റ്റല്‍ ജങ്ഷനില്‍ ഉള്ള ഒരു വെജിറ്റേറിയന്‍ ഹോട്ടല്‍. അവിടെ ഫാമിലിക്കായി എ.സി മുറിയുണ്ട്. രാവിലെ വലിയ തിരക്കില്ല. കാപ്പി കുടിക്കാന്‍ കയറുന്ന ഫാമിലി(?)-കള്‍ അവിടെയിരുന്ന് ചുമ്പിക്കുന്നതും "അസ്ഥാനത്ത്"(?) പിടിക്കുന്നതും കണ്ടിട്ടുണ്ട്.

വര്‍ഷം കുറച്ചു കൂടി കഴിഞ്ഞു. 1994-95 സമയം. എറണാകുളത്ത് പോയി ടെസ്റ്റ് ഒക്കെ എഴുതി നടക്കുന്ന കാലം. രാവിലെ ടെസ്റ്റ് കഴിഞ്ഞാല്‍ വൈകുന്നേരം അഞ്ചു മണിക്കുള്ള വേണാടില്‍ ആണ് മടക്കം. ഉച്ച കഴിയുമ്പോള്‍ ജെട്ടിയില്‍ നിന്ന് ബോട്ടില്‍ കയറി ബോള്‍ഗാട്ടിയിലേക്ക്. ബിയര്‍ പാലറില്‍ കയറി ഹെയ്‌വാര്‍ഡ് 5000 സ്റ്റ്രോങ് കഴിക്കും. പിന്നെ കായലിനരികിലെ അരമതിലില്‍ പോയി ഇരിക്കും, ചിലപ്പോള്‍ കിടക്കും. അങ്ങനെ ഇരിക്കാന്‍ പോകുമ്പോള്‍ അവിടവിടെ കുറ്റിച്ചെടികളും, മുളങ്കാടുകളുമുണ്ട്, അതിന്റെ ചുവട്ടില്‍ കെട്ടിപ്പിടിച്ചും ഉമ്മവച്ചും കളിക്കുന്ന ധാരാളം മിഥുനങ്ങളെ കണ്ടിട്ടുണ്ട്.

1994-95-ലും 1995-96 -ലും രണ്ടു മൂന്നു തവണ ബാംഗ്ലൂര്‍ പോയിട്ടുണ്ട്. പിന്നെ 2010-ലും. ഈ പോയപ്പോള്‍ ഒക്കെ ലാല്‍ബാഗ് പാര്‍ക്കിലും ഒന്നു രണ്ടു തവണ കബ്ബന്‍ പാര്‍ക്കിലും പോയിരുന്നു. അവിടെ ചുംബനം മാത്രമല്ല, പലതും കാണേണ്ടി വന്നിട്ടുണ്ട്.

1997-98 കാലം. ചെന്നൈ-യില്‍ ജോലി ചെയ്തിരുന്ന കാലം. ഞായറാഴ്ചകളില്‍ ഒരു പണിയുമില്ല. രണ്ടു മൂന്നു കൂട്ടുകാരും ഞാനും മാത്രം. ചില ദിവസം സെന്റ് തോമസ് കുന്നില്‍ പോയി ഇരിക്കും. അല്ലെങ്കില്‍ വടപളനിയിലോ കെ കെ നഗറിലോ പോകും. ഇതൊന്നും തോന്നിയില്ലെങ്കില്‍ നേരെ  അണ്ണാ ചതുക്കം..മറീനാ ബീച്ച്. അവിടെയും കാണാം ഈ ചുംബന കൂട്ടയ്മ.

അന്നും അവിടെ ഇരുന്നു ചുംബിച്ചവര്‍ ആരുടെയോ പെങ്ങളോ മകളോ ഒക്കെ ആയിരിന്നു. ഒരു പക്ഷേ ഇന്നവരുടെ കുട്ടികള്‍ വളര്‍ന്നു വലുതായിട്ടുണ്ടാകാം. ചിലപ്പോള്‍ അവര്‍ക്ക് വിവാഹം കഴിക്കാനായില്ലായിരിക്കാം. ചിലര്‍ താല്‍ക്കാലിക പ്രലോഭനങ്ങളില്‍ പെട്ട് വന്നവരായിരിക്കാം. ചിലരാകട്ടെ ആ ചുംബനസുഖം നുകരാന്‍ മാത്രം എത്തിയവരാകാം. എന്തായാലും ആ നിമിഷങ്ങള്‍ അവര്‍ ആസ്വദിച്ചിരുന്നു എന്ന് വ്യക്തം.  കാരണം അവര്‍ക്ക് ആ സ്ഥലങ്ങളില്‍ അന്ന് അത്ര വലിയ എതിര്‍പ്പുകള്‍ നേരിടേണ്ടി വന്നിട്ടില്ല. പരിസരം പോലും മറന്നപോലെയായിരുന്നു പലരുടേയും ഇരുപ്പ്.

ഇവിടെയൊന്നും കണ്ടതിലും വലുതൊന്നുമല്ല ഞാന്‍ കഴിഞ്ഞയാഴ്ച ജയ്‌ഹിന്ദ് ടി.വി-യില്‍ കണ്ടതെന്നതാണ് സത്യം. പക്ഷേ ഈ ചുംബനങ്ങളില്‍ വര്‍ഷങ്ങള്‍ക്ക് മുമ്പ് പോലും ആള്‍ക്കാര്‍ കാണാത്ത തെറ്റ് ഇപ്പോള്‍ കേരളത്തിലെ ജനങ്ങള്‍ കാണാന്‍ തുടങ്ങിയിരിക്കുന്നു. അന്നൊന്നും ഇല്ലാത്ത സാംസ്കാരിക തകര്‍ച്ച ഈ ചുംബനത്തിലൂടെ ഇപ്പോള്‍ ഈ ഇരുപത് വര്‍ഷങ്ങള്‍ക്കു ശേഷം നമ്മുടെ നാട്ടില്‍ ഉണ്ടായിട്ടുണ്ട് എന്ന് എനിക്ക് വിശ്വസിക്കാനാകുന്നില്ല.ടി.വി-യിലും സമൂഹത്തിലും എത്രയെത്ര ചര്‍ച്ചകള്‍!
---------- ---------- ---------- ---------- ---------- ---------- ----------
അന്നത്തെ ആ കാലഘട്ടത്തില്‍ നിന്ന് നമ്മുടെ നാറ്റ് ഒത്തിരി മാറി. നാട്ടില്‍ ഇന്ന് കഥ മാറി. സമൂഹം "പുരോഗമിച്ചു". യുവാക്കളുടേയും യുവതികളുടേയും മധ്യവയസ്കന്റേയും മധ്യവയസ്കയുടേയും മൊബൈലുകളിലും കമ്പ്യൂട്ടറിലും പലതരം ചിത്രങ്ങളും സിനിമകളും ക്ലിപ്പുകളും വന്നു നിറഞ്ഞു. അതൊന്നും കാണുന്നത് തെറ്റല്ല എന്ന് പലരും പറയാന്‍ തുടങ്ങി. പണ്ടൊക്കെ വളരെ രഹസ്യമായി കുറെ പേര്‍ കൂടി പിരിവു നടത്തി ടി വിയും വിസിപിയും വാടകക്കെടുത്ത് ഒഴിവുള്ള വീടുകളിലിരുന്ന് കണ്ടിരുന്ന ബ്ലൂഫിലിമുകള്‍ ഇന്ന് സി ഡി-യിലാക്കി അങ്ങോട്ടും ഇങ്ങോട്ടും കൈമാറാന്‍ കോളേജ് കുട്ടികള്‍ക്ക്, എന്തിന് സ്കൂള്‍ കുട്ടികള്‍ക്ക് വരെ മടിയില്ലാതായി.

ദിവസവും കാണുന്ന സിനിമയിലും സീരിയലുകളിലും ചുംബനങ്ങളോ അതിലും കൂടുതലോ ആയ കാഴ്ചകള്‍ വീടുകളിലിരുന്ന് കാണാന്‍ അവസരങ്ങള്‍ ഏറെയാണിന്ന്. ആളൊഴിഞ്ഞു കിട്ടുന്ന വേളകളില്‍ ഒരു ചുംബനം കൈമാറുന്നത് തെറ്റല്ല എന്ന് യുവ തലമുറയിലെ കാമുകീ കാമുകന്മാര്‍ ചിന്തിക്കാന്‍ തുടങ്ങിയെങ്കില്‍ അതില്‍ അവരെ കുറ്റം പറയാനാവില്ല. അതിലും കടന്നു ചിന്തിച്ചാല്‍ കാമുകീ കാമുകന്മാരല്ലാത്ത കൂട്ടുകാര്‍ക്കിടയില്‍ പോലും ഒരു ചുംബനം അത്ര വലിയ പ്രശ്നമല്ലാതായി എന്നു വേണം കരുതാന്‍. ന്യൂ ഈയര്‍ ആഘോഷങ്ങളുടെ ഭാഗമായി ഉന്നതന്മാരും അവരുടെ മക്കളും വലിയ ഹോട്ടലുകളില്‍ നടത്തുന്ന പാര്‍ട്ടികളിലൊക്കെ നാം കാണുന്നത് ഈ പരസ്യ ചുംബനം തന്നെയല്ലേ? മഹാനഗരങ്ങളിലെ പബ്ബുകളില്‍ മദ്യവും കഴിച്ച് യുവതീ യുവാക്കള്‍ കൈമാറുന്നതും ചുംബനങ്ങളല്ലേ? അവരും കുടുംബത്ത് നിന്ന് വന്നവര്‍ തന്നെയല്ലേ?

ഒന്നു ചുംബിച്ചാല്‍ ഇടിഞ്ഞു വീഴുന്നതാണോ നമ്മുടെ സംസ്കാരം. അല്ല എന്ന് നമ്മളില്‍ ഭൂരിഭാഗം പേര്‍ക്കും അറിയാം. മറ്റുള്ളവരെ ബോധിപ്പിക്കാനാണ് നമ്മള്‍ ജീവിക്കുന്നത് തന്നെ, അപ്പോള്‍ പിന്നെ നാം ചുംബനത്തെയൊ ആലിംഗനത്തെയോ പിന്തുണച്ചാല്‍ മറ്റുള്ളവര്‍ എന്തു കരുതും എന്നതാണ് നമ്മുടെ ആദ്യ ചിന്ത. അതാണ് എല്ലാം തെറ്റാണ് എന്ന് ചിന്തിക്കാനും പ്രവര്‍ത്തിക്കാനും നമ്മളെ പ്രേരിപ്പിക്കുന്നത്. മറ്റുള്ളവരെ ബോധിപ്പിക്കാനല്ലാതെ സ്വന്തം മനസ്സിന്റെ വിളി കേട്ട് ജിവിക്കാന്‍ എന്ന് നമുക്ക് സാധിക്കുന്നോ അന്നേ നമ്മുടെ സമൂഹം നന്നാകൂ.
---------- ---------- ---------- ---------- ---------- ---------- ----------
പറഞ്ഞു വന്നത്, പ്രേമം എന്നത് തനിയെ വന്നു ചേരുന്നതോ സ്വയം എടുത്ത് തലയില്‍ വക്കുന്നതോ എന്തുമാകട്ടെ, പ്രേമിക്കുന്നവര്‍ക്കിടയില്‍ കടന്നു ചെന്ന് അവരുടെ 'സ്വകാര്യത'യില്‍ ഇടപെടാന്‍ സമൂഹത്തിന് ഒരധികാരവും ഇല്ല. (പബ്ലികിന്റെ മുമ്പിലാണെങ്കില്‍ അത് കാമോദ്ദിപകമാണെങ്കില്‍ നിങ്ങള്‍ക്ക് പരാതിപ്പെടാം)  അവരുടെ കുടുംബക്കാര്‍ക്ക് വേണമെങ്കില്‍ അവരെ ഉപദേശിക്കാം, പ്രായപൂര്‍ത്തിയകാത്തവരാണെങ്കില്‍ 'തക്കതായ' ശിക്ഷ കൊടുക്കാം. അത്ര തന്നെ.

ഞാന്‍ ആദ്യം പറഞ്ഞ ഭാഗങ്ങളിലുള്ള "പഴയ തലമുറക്ക്" കിട്ടിയിരുന്ന സ്വാതന്ത്ര്യം പോലും നിഷേധിക്കാന്‍ നമ്മുടെ കുട്ടികള്‍ എന്ത് തെറ്റാണ് ചെയ്തത്? ഞങ്ങളുടെ കാലത്ത് മാങ്ങയായിരുന്നു തേങ്ങയായിരുന്നു, ഞങ്ങള്‍ പഠിച്ച സമയത്ത് അങ്ങനെയായിരുന്നു ഇങ്ങനെയായിരുന്നു, കോളജിന്റെ പല മൂലകളും പഞ്ചാര മുക്കുകളായിരുന്നു, ലവേഴ്സ് കോറ്ണറുകള്‍ എല്ലാ കോളജിന്റെയും ഭാഗമായിരുന്നു എന്നൊക്കെ പറഞ്ഞ് വീമ്പിളക്കുന്ന "പഴയ തലമുറ" ഇന്നത്തെ കുട്ടികള്‍ക്ക് ആ ജീവിതം നിഷേധിക്കാന്‍ തുനിയുന്നുവെങ്കില്‍ ചികിത്സിക്കേണ്ടത് പുതിയ തലമുറയെ അല്ല മറിച്ച് ഈ പറഞ്ഞ പഴയ തലമുറയെ തന്നെയാണ്. 

ദേവസ്വം ബോര്‍ഡ് - രാജഭരണകാലത്തും ശേഷവും

കൊല്ലവര്‍ഷം 927 അതായത് എ.ഡി 1812 വരെ ഹിന്ദു ക്ഷേത്രങ്ങളുടെ ഭരണം അതാത് ദേവസ്വങ്ങളുടെ കീഴില്‍ ഹിന്ദുക്കള്‍ തന്നെ നടത്തിയിരുന്നു. ആ സമയത്താണ് മണ്‍റോ സായിപ്പ് റസിഡന്റായി വരുന്നത്. അന്നത്തെ "രാജ്ഞി" ലക്ഷീറാണി മൈനറായിരുന്നത് കൊണ്ട് അവരെ ഭരണകാര്യങ്ങളില്‍ സഹായിക്കാന്‍ മണ്‍റോയെ ദിവാന്‍‌ജി ആയി നിയമിച്ചു. അദേഹത്തിന്റെ ഉപദേശപ്രകാരം 378 അമ്പലങ്ങളും അവയുടെ സ്വത്തായ 65,000 ഏക്കര്‍ പുരയിടങ്ങളും 60 ലക്ഷപ്പറ നിലം ഇവയെല്ലാം കൂടി സര്‍ക്കാരിലേക്കെടുത്തു. അതിനു ശേഷം 1123 മൈനര്‍ ക്ഷേത്രങ്ങള്‍ കൂടി സര്‍ക്കാര്‍ ഏറ്റെടുത്തു.

മേല്പ്പറഞ്ഞ അമ്പലങ്ങള്‍ സര്‍ക്കാര്‍ അധീനതയില്‍ ആയതില്‍ പിന്നെ അവിടെ ശരിയായ രീതിയില്‍ പൂജകളോ കര്‍മ്മങ്ങളോ നടന്നിരുന്നില്ല. ഉടമസ്ഥന്മാര്‍ക്കു യാതൊരു അധികാരവും ഇല്ലാതായി. അവരുടെ അഭിപ്രായത്തെ അവഗണിച്ചു. ഇടിഞ്ഞു പൊളിഞ്ഞു കിടന്ന ക്ഷേത്രങ്ങള്‍ക്കായി ഒന്നും സര്‍ക്കാര്‍ ചെയ്തില്ല.ക്ഷേത്രക്കുളങ്ങള്‍ നന്നാക്കിയില്ല. പല്‍സ് ക്ഷേത്രങ്ങളും നാമാവശേഷമായി. കിഴക്കേ മലയോരത്തുണ്ടായിരുന്ന ക്ഷേത്രങ്ങളില്‍ ഭൂരിഭാഗവും മണ്ണിനടിയിലായി. അവയുടെ സ്വത്ത് മുഴുവനും അഹിന്ദുക്കളുടെ കൈവശമായി.

ഇരുപതാം നൂറ്റാണ്ട് ആയപ്പോള്‍ കൃസ്ത്യന്‍ സ്കൂളുകള്‍ക്കും മിഷണറി പ്രവര്‍ത്തനങ്ങളിക്കും ധാരാളം സഹായങ്ങള്‍ തിരുവിതാംകൂര്‍ രാജാവില്‍ നിന്നുണ്ടായി. തീര്‍ച്ചയായും അത് ബ്രിട്ടീഷുകാരെ സന്തോഷിപ്പിക്കാന്‍ തന്നെയാണ്‍. പത്മനാഭ സ്വാമിക്ഷേത്രത്തിനു സമീപം തന്നെ സ്കൂളു തുടങ്ങി.

(തിരുവിതാംകൂറില്‍) വിദേശികളായ ഒരു കൂട്ടം ബ്രാഹ്മണരുടെ വിളനിലങ്ങളായി മാറി ഈ ദേവസ്വം. നമസ്കാര ചോറും പലഹാരങ്ങളും ഉള്‍പ്പെടെ എല്ലാം കയ്യടക്കിയ, വിധിപ്രകാരം പൂജ ചെയ്യാനറിയാത്ത, മലയാളഭാഷ എഴുതുവാനും വായിക്കാനും അറിയാത്ത ഈ ബ്രാഹ്മണര്‍ ഒരു കാലത്ത് ദേവസ്വം ഉടമസ്ഥരായിരുന്ന നായന്മാരെ ദേവസ്വത്തില്‍ നിന്ന് അകറ്റി നിര്‍ത്തി. തീര്‍ത്ഥവും പ്രസാദവും പട്ടിക്ക് എച്ചില്‍ എന്ന പോലെ എറിഞ്ഞു കൊടുത്തു. (പല അമ്പലങ്ങളിലും ഇപ്പോഴും ഇങ്ങനെ തന്നെ). അബ്രാഹ്മണര്‍ക്ക് അമ്പലങ്ങളില്‍ മണി അടിക്കാന്‍ പാടില്ല, മണ്ഡപത്തില്‍ പ്രവേശിക്കാന്‍ പാടില്ല, ഊട്ടുപുരയില്‍ ചോറില്ല അങ്ങനെ നിരവധി വിലക്കുകള്‍.

മറ്റൊരു ആരോപണമാണ് ദേവസ്വം ഡിപ്പര്‍ട്ട്മെന്റിലെ ബ്രാഹ്മണമേധാവിത്വം. അവിടെയും നായന്മാര്‍ തഴയപ്പെട്ടു. ഭൂരിപക്ഷം ഉദ്യോഗസ്ഥരും ബ്രാഹ്മണന്മാരായി. ആണ്ടു തോറും 25 ലക്ഷം ചിലവു ചെയ്യുന്ന (1936-ലെ കണക്കാണ്) ദേവസ്വം ബോര്‍ഡ് ഒരു കമ്മീഷണറുടെ ഇഷ്ടത്തിനാണ് അന്നും നടന്നിരുന്നത്. ധര്‍മ്മക്കഞ്ഞിക്കു ചിലവാക്കുന്ന സംഖ്യ ശ്രീമൂലം ഷഷ്ട്യാബ്ദപൂര്‍ത്തി സ്മാരക ഹിന്ദുമഹിളാമന്ദിരത്തിനു കൊടുക്കാതെ കണ്ണമ്മൂല കൃസ്ത്യന്‍ മിഷനു കൊടുത്തു എന്നും പറയുന്നു.   1925-ല്‍ ദിവാന്‍ജിയെ ദേവസ്വം ഭരണത്തില്‍ നിന്ന് എടുത്തു കളഞ്ഞെങ്കിലും 1932 ആയപ്പോള്‍ വീണ്ടും ദിവാനു ഭരണ ചുമതല നല്‍കി. ദിവാന്‍‌ജിയുടെ ഭരണത്തില്‍ നായന്മാര്‍ക്കു എല്ലാ അധികാരങ്ങളും നഷ്ടമായി.

                     xx :::::::::::::::::::::::::::::::::::::::::::::::::::: xx
ഇതൊക്കെയാണ് 1936 വരെയുള്ള കാര്യങ്ങള്‍. അതുവരെ അവര്‍ണ്ണഹിന്ദുക്കള്‍ക്ക് ഈ ക്ഷേത്രങ്ങളില്‍ പ്രവേശനം ഇല്ലായിരുന്നു എന്നത് മറ്റൊരു കാര്യം. തര്‍ക്കങ്ങളും ഈ സവര്‍ണ്ണ മേധാവിത്വവുമൊക്കെ പറയുന്നത് നായരും അതിന് മുകളിലുള്ളവരും തമ്മില്‍ ആയിരുന്നു എന്നോര്‍ക്കുക. 1936 നവംബറിലാണ് മഹാത്മാഗാന്ധി ഉള്‍പ്പെടെയുള്ളവരുടെ സമ്മര്‍ദ്ദത്തിനും പല സമരത്തിനുമൊടുവില്‍ പ്രസിദ്ധമായ ക്ഷേത്രപ്രവേശനവിളംബരം ഉണ്ടാകുന്നത്.

വിളംബരത്തിന്റെ പൂർണ്ണരൂപം

“ശ്രീപദ്മനാഭദാസ വഞ്ചിപാലസർ രാമവർമകുലശേഖര കിരീടപതിമന്നേ സുൽത്താൻ മഹാരാജ രാമരാജ ബഹദൂർ ഷംഷെർ ജംഗ്,നൈറ്റ് ഗ്രാൻ‌ഡ് കമാൻഡർ ഓഫ് ദ് ഇന്ത്യൻ എം‌പയർ, തിരുവതാംകൂർ മഹാരാജാവു തിരുമനസ്സുകൊണ്ട് 1936-നു 12-നുക്കു ശരിയായ 1112 തുലാം 12-ന് പ്രസിദ്ധപ്പെടുത്തുന്ന വിളംബരം: “നമ്മുടെ മതത്തിന്റെ പരമാർത്ഥതയും സുപ്രമാണതയും ഗാഢമായി ബോദ്ധ്യപ്പെട്ടും ആയതു ദൈവികമായ അനുശാസനത്തിലും സർവവ്യാപകമായ സഹിഷ്ണുതയിലുമാണ് അടിയുറച്ചിരിക്കുന്നതെന്നു വിശ്വസിച്ചും, അതിന്റെ പ്രവർത്തനത്തിൽ അതു ശതവർഷങ്ങളായി കാലപരിവർത്തനത്തിന് അനുയോജിച്ചു പോന്നുവെന്നു ധരിച്ചും, നമ്മുടെ ഹിന്ദുപ്രജകളിൽ ആർക്കുംതന്നെ അവരുടെ ജനനമോ ജാതിയോ സമുദായമോ കാരണം ഹിന്ദുമതവിശ്വാസത്തിന്റെ ശാന്തിയും സാന്ത്വനവും നിഷേധിക്കപ്പെടാൻ പാടില്ലെന്നുള്ള ഉത്കണ്ഠയാലും നാം തീരുമാനിക്കുകയും ഇതിനാൽ പ്രഖ്യാപനം ചെയ്യുകയും നിയോഗിക്കുകയും ആജ്ഞാപിക്കുകയും ചെയ്യുന്നതെന്തെന്നാൽ, സമുചിതമായ പരിതസ്ഥിതികൾ പരിരക്ഷിക്കുന്നതിനും ക്രിയാപദ്ധതികളും ആചാരങ്ങളും വച്ചുനടത്തുന്നതിനും നാം നിശ്ചിയിക്കുകയും ചുമത്തുകയും ചെയ്യാവുന്ന നിയമങ്ങൾക്കും നിബന്ധനകൾക്കും വിധേയമായി, ജനനാലോ മതവിശ്വാസത്താലോ ഹിന്ദുവായ യാതൊരാൾക്കും നമ്മുടെയും ഗവൺ‌മെന്റിന്റെയും നിയന്ത്രണത്തിലുള്ള ക്ഷേത്രങ്ങളിൽ പ്രവേശിക്കുന്നതിനോ ആരാധന നടത്തുന്നതിനോ ഇനിമേൽ യാതൊരു നിരോധനവും ഉണ്ടായിരിക്കാൻ പാടില്ലെന്നാകുന്നു”

അതിനു ശേഷം മാത്രമാണ് അവര്‍ണ്ണരെന്നു പറയപ്പെടുന്ന താഴ്ന്ന ജാതി ഹിന്ദുക്കള്‍ക്ക് ദേവസ്വം വക ക്ഷേത്രങ്ങളിലെങ്കിലും പ്രവേശിക്കാനായത്. ഇങ്ങനെയൊക്കെയാണ് പ്രജാക്ഷേമ തല്പരരായ തിരുവിതാംകൂര്‍ രാജാക്കന്മാര്‍ നായന്മാര്‍ ഉള്‍പ്പെടെയുള്ള ഹിന്ദുക്കളെ പരിപോക്ഷിപ്പിച്ചിരുന്നത്. ചുരുക്കി പറഞ്ഞാല്‍ തിരുവിതാം‌കൂര്‍ ഗവണ്മെന്റിന്റെ ഒന്നര നൂറ്റാണ്ടോളം നീളുന്ന ദേവസ്വം ഭരണം കൊണ്ട് ഹിന്ദുസമുദായം ക്ഷയിച്ചു, നാട്ടിലെ നമ്പ്പൂതിരി സമൂഹം ക്ഷയിച്ചു, പകരം പരദേശബ്രാഹ്മണര്‍ കുബേരന്മാരായി തീര്‍ന്നു.

             xx :::::::::::::::::::::::::::::::::::::::::::::::::::: xx

ഇങ്ങനെ പലവിധത്തില്‍ നശിച്ചതും മണ്ണിനടിയിലായതും കഴിച്ചുള്ള, ക്ഷയിച്ച ക്ഷേത്രങ്ങള്‍ ഉള്‍പ്പെടെയുള്ള 1194 ക്ഷേത്രങ്ങളാണ് തിരുകൊച്ചി സംസ്ഥാനം രൂപം കൊണ്ടപ്പോള്‍ തിരുവിതാംകൂര്‍ കൊച്ചി ഹിന്ദു മതസ്ഥാപന ആക്റ്റ് (1950) പ്രകാരം സര്‍ക്കാര്‍ നിയന്ത്രണങ്ങളിലേക്കു വന്നതും തിരുവിതാംകൂര്‍ ദേവസ്വംബോര്‍ഡിന്റെ കീഴിലേക്ക് മാറ്റപ്പെട്ടതും. (പിന്നീട് ചില ക്ഷേത്രങ്ങള്‍ കൂടി ഇതിലേക്ക് കൂട്ടി ചേര്‍ത്തിട്ടുണ്ട്). അതായത് അന്നു വരെ തിരുവിതാംകൂര്‍ രാജവംശത്തിന്റെ നിയന്ത്രണത്തില്‍ ഉണ്ടായിരുന്ന ക്ഷേത്രങ്ങളാണ് ഇന്ത്യ എന്ന രാജ്യത്തിന് തത്വത്തില്‍ കൈമാറിയതെന്നര്‍ത്ഥം. അവയുടെ പുനരുദ്ധാരണം, റോഡ് നിര്‍മ്മാണം, അനുബന്ധ സൗകര്യങ്ങളൊരുക്കല്‍ തുടങ്ങിയ പല കാര്യങ്ങള്‍ക്കും സര്‍ക്കാര്‍ ഖജനാവിലെ പണം ചെലവായിട്ടുണ്ടെന്നതും വസ്തുതയാണ്.

ഇതൊന്നും അറിയാതെ അമ്പലങ്ങളെല്ലാം സര്‍ക്കാര്‍ കയ്യടക്കി വച്ചിരിക്കുന്നുവെന്നും വരുമാനം എല്ലാം സര്‍ക്കാര്‍ ഖജനാവിലേക്ക് പോകുന്നു എന്നും മുറവിളി കൂട്ടുന്നവര്‍ ഇതൊക്കെ മനസ്സിലാക്കിയാല്‍ നന്ന്. ഇന്ന് വരുമാനം ഉള്ള അമ്പലങ്ങള്‍ ഒന്നര നൂറ്റാണ്ടോളം കയ്യടക്കി വച്ചിരുന്നത് തിരുവിതാംകൂര്‍ രാജവശത്തിന്റെ അധീനതയിലുള്ള ദേവസ്വം ബോര്‍ഡാണ്. ആ ബോര്‍ഡ് രൂപ്പീകരിക്കുമ്പോള്‍ ഉണ്ടായിരുന്ന ഭൂസ്വത്തൊക്കെ അന്യാധീനപ്പെടാന്‍ കാരണം ബ്രിട്ടീഷുകാരാടുള്ള വിധേയത്വവും കെടുകാര്യസ്ഥതയുമാണ്.

           xx :::::::::::::::::::::::::::::::::::::::::::::::::::: xx

1112 തുലാമാസത്തില്‍ (1936 നവമ്പര്‍) സര്‍ സി പി-യെ കാണാന്‍ പോയ നായര്‍ വിജിലന്‍സ് കമറ്റിയോട് അദ്ദേഹം പറഞ്ഞത് ഇപ്രകാരമാണ്

"പടയാളികളായ നിങ്ങള്‍ കൂലിക്കു വേണ്ടിയല്ല, രാജ്യത്തിനും രാജാവിനും വേണ്ടിയാണ് പ്രവര്‍ത്തിക്കുന്നത്. ആത്മസം‌യമനവും ശിക്ഷണവുമുള്ള സമുദായത്തിന് രാഷ്ട്രീയമായ വിജയമുണ്ടാകും. നായന്മാര്‍ പട്ടാളങ്ങളുടെ നായകന്മാര്‍ എന്ന നിലയില്‍ സൈനീക പാരമ്പര്യമുള്ളവരാകുന്നു. ആ പാരമ്പര്യം ദ്യോതിപ്പിക്കുന്നത്  രാജഭക്തിയും ജീവിതത്തില്‍ ശിക്ഷണവുമാകുന്നു. ഈ ഡപ്യുട്ടേഷന്റെ ഫലമായോ ഗവണ്മെന്റിന്റെ പ്രവൃത്തിയുടെ ഫലമായോ എന്തു സംഭവിച്ചാലും നിങ്ങള്‍ നിസഹകരണം ഭാവിക്കാതെ നിങ്ങളുടെ ഭരണാധികാരിയുടെ ഭാഗത്ത് നില്‍ക്കണമെന്നുള്ള കാര്യം വിസ്മരിക്കയില്ലെന്നു ഞാന്‍ വിശ്വസിക്കുന്നു"

അതിനു ശേഷം ഇരുപത് ദിവസത്തിനകം ക്ഷേത്രപ്രവേശനവിളംബരം ഉണ്ടാകുന്നു. അന്ന് സര്‍ സി പി പറഞ്ഞ വാക്കുകള്‍ ഇപ്പോഴും അനുസരിക്കുന്നവരാണ് തിരുവിതാംകൂറിലെ ഒരു വിഭാഗം നായര്‍ തറവാട്ടുകാര്‍. അവര്‍ക്ക് ഇപ്പോഴും പൊന്നു തമ്പുരാന്‍ കഴിഞ്ഞേ എന്തും ഉള്ളൂ.

          xx :::::::::::::::::::::::::::::::::::::::::::::::::::: xx

അനുബന്ധം 1: മണ്‍റോ സായിപ്പിന്റെ കാലത്താണ് കല്ലടയിലെ തുരുത്ത് മിഷണറി സംഘത്തിന് വിട്ടുകൊടുക്കുകയും അത് പിന്നീട് മണ്‍‌റോ തുരുത്താകുകയും ചെയ്തത്. അതേ കാലഘട്ടത്തിലാണ് പൂഞ്ഞാര്‍ കൊട്ടാരത്തില്‍ നിന്ന് മൂന്നാര്‍ കുന്നുകള്‍ മണ്‍റോ കൈക്കലാക്കുന്നതും ടര്‍ണറും ഷാര്‍പ്പും ഒക്കെ തെയിലത്തോട്ടം ഉണ്ടാക്കുന്നതും. കണ്ണന്‍ ദേന കമ്പനിയും സ്വാതന്ത്ര്യത്തിനു ശേഷം പിന്നീടത് ടാറ്റാ- ഫിന്‍ലേ കമ്പനിക്ക് കൈമാറിയതും അതിനു ശേഷം നടന്നതുമൊക്കെ ചരിത്രം. 1,36,600 ഏക്കര്‍ സ്ഥലം ഇന്ന് ചുരുങ്ങിയത് ഒരു പതിനായിരം കോടി രൂപ മതിപ്പു വില കാണുമെന്ന് കരുതാം. അതും പൊതുസ്വത്ത് എന്ന പരിധിയില്‍ വരേണ്ടതായിരുന്നു.

അനുബന്ധം 2: മറ്റു പാര്‍ട്ടികള്‍ ക്രിസ്ത്യന്‍ മിഷണറികള്‍ക്ക് അതിരു വിട്ട സഹായം ചെയ്യുന്നു എന്നു പറഞ്ഞ് കരയുകയും അതേ സമയം പൊന്നു തമ്പുരാനെ സ്രാഷ്ടാംഗം പ്രണമിക്കുകയും ചെയ്യുന്ന സംഘപരിവാര്‍ ശക്തികള്‍ ഏറ്റവും കൂടുതല്‍ കൃസ്ത്യന്‍ പ്രീണനം നടന്നത് 1812 മുതലിങ്ങോട്ട് രാജഭരണത്തിന്റെ അവസാനം വരെയാണെന്നുള്ള വസ്തുതകള്‍ മറക്കുന്നു.

അനുബന്ധം 3: 1936-നു മുമ്പ് അധ:കൃതരായ ഹിന്ദുക്കള്‍ ജാതീയമായ വേര്‍‌തിരിവ് മൂലവും അയിത്തം പോലെയുള്ള ദുരാചാരങ്ങള്‍ മൂലവും പൊതു സമൂഹത്തില്‍ നിന്ന് തഴയപ്പെട്ടത് മുതലെടുത്ത് കൃസ്ത്യന്‍ മിഷണറിമാരും മുസ്ലിം സമുദായവും അവരെ മതം മാറ്റിയിട്ടുണ്ടെങ്കില്‍ അതിന്റെ മുഴുവന്‍ ഉത്തരവാദിത്വവും അന്നത്തെ സവര്‍ണ്ണമേധാവിത്വത്തിനും ഭരണകര്‍ത്താക്കളും തന്നെയല്ലേ?

           xx :::::::::::::::::::::::::::::::::::::::::::::::::::: xx

വിവരങ്ങള്‍ക്ക് അവലംബം: ദേവസ്വം ഭരണവും ഹിന്ദുമതവും;  ആറ്റുങ്ങല്‍ കെ ഗോപാലന്‍ നായര്‍ (1936-37-ല്‍ പ്രസിദ്ധീകരിച്ചത്)
ചില വിവരങ്ങള്‍ക്ക് കടപ്പാട് : ബാബുരാജ് ഭഗവതി (ബ്ലോഗില്‍ നിന്ന്)
സാങ്കേതികമായി തെറ്റുണ്ടെങ്കില്‍ പറയുക. തിരുത്തുന്നതായിരിക്കും.

Infatuation അഥവാ മോഹിപ്പിക്കല്‍

Infatuation (പണ്ടു വായിച്ച ഒരു ലേഖനത്തിന്റെ ഓര്‍മയില്‍ നിന്നുള്ള പരിഭാഷ)

1. ആദ്യമായി ഒറ്റ നോട്ടത്തില്‍ എതിര്‍ലിംഗത്തില്‍ പെട്ട ആളോട് തോന്നുന്ന ആകര്‍ഷണത്തെ "മോഹിക്കല്‍" അഥവാ ബുദ്ധിമയങ്ങുക (Infatuation) എന്ന് പറയാം. യഥാര്‍ത്ഥമായ സ്നേഹത്തില്‍ നിന്നുണ്ടാകുന്ന ഒന്നല്ല ഈ മോഹിപ്പിക്കല്‍.സ്നേഹം എന്നത് തീപോലെയുള്ള സുഹൃദ് ബന്ധമാണ്. അത് വേരുറക്കുകയും വികസിക്കുകയും ചെയ്യുന്നത് വളരെ സമയമെടുത്തായിരിക്കും.

2. Infatuation-നു ആത്മവിശ്വാസം കുറവായിരിക്കും. അവന്‍/അവള്‍ നിന്നില്‍ നിന്ന് അകന്നു നില്‍ക്കുമ്പോള്‍ അവന്‍/അവള്‍ നിന്നെ വഞ്ചിക്കുന്നോ എന്ന് തോന്നിക്കുകയും രഹസ്യമായി നിരീക്ഷിക്കുകയും ചെയ്യും. മറിച്ച്, സ്നേഹം എന്നാല്‍ വിശ്വാസമാണ്. നിങ്ങള്‍ ശാന്തമായി സുരക്ഷിതമായി ഭീഷണിയില്ലാതെ കഴിയും. നിങ്ങളുടെ സ്നേഹഭാജനവും അതു തന്നെ അനുഭവിക്കുമ്പോള്‍ കൂടുതല്‍ വിശ്വാസമുള്ളവരായി ഭവിക്കുന്നു.

3. മോഹിപ്പിക്കല്‍ സുരക്ഷിതത്വമില്ലാത്തതിന്റെ തെളിവാണ്. നിങ്ങള്‍ സന്ദീപ്തരും  കുതൂഹലരും ആകുമെങ്കിലും തികച്ചും സന്തോഷവാന്മാരാകില്ല. ഉയരുന്ന സംശയങ്ങള്‍ ഉത്തരം കിട്ടാത്ത ചോദ്യങ്ങള്‍, പിന്നെ കമിതാവിന്റെ ചില വ്യക്തമല്ലാത്ത പ്രവൃത്തികള്‍ തുടങ്ങിയവ അടുത്തറിയാന്‍ ശ്രമിക്കില്ല, അത് ഒരു പക്ഷേ സ്വപ്നങ്ങളെ നശിപ്പിച്ചേക്കം. എന്നാല്‍, സ്നേഹം തികച്ചും മനസ്സിലാക്കാവുന്നതും പക്വവുമയതാണ്. അത് ശ്വാശതമാണ്.

4. മോഹിപ്പിക്കലിന് ലൈഗികമായ ഒരു കണ്ണിയുണ്ട്. നിങ്ങള്‍ വിശ്വസ്തയാണെങ്കില്‍ ശരീരികമായ അടുപ്പത്തില്‍ എത്തുമെന്ന ഭയത്താല്‍ നിങ്ങള്‍ക്ക്  കമിതാവിന്റെ കൂടെ കൂട്ടുചേരലിന്  ബുദ്ധുമുട്ടാണെന്ന് സമ്മതിക്കേണ്ടി വരും.

5. മോഹിപ്പിക്കല്‍ അഥവാ ബുദ്ധിയെ മയക്കല്‍ താല്‍ക്കാലികവും കാലക്രമേണ മങ്ങുന്നതുമായിരിക്കും..ഒരു പക്ഷേ അത് പിന്നീട് പശ്ചാത്താപം തോന്നുവനുള്ള കാരണങ്ങളിലേക്ക് നയിച്ചു എന്നു വരാം.

6. മോഹിപ്പിക്കല്‍ , അതു നിങ്ങളെ കൊണ്ട് പറയിക്കും ; "നമുക്ക് പെട്ടെന്ന് വിവാഹിതരാകാം, എനിക്ക് നിന്നെ നഷ്ടപ്പെടുത്തുവാനാവില്ല.

7. മോഹിപ്പിക്കല്‍ നിങ്ങളെ anxious, nervous and jealous ഉള്ളതാക്കി തീര്‍ക്കും. കമിതാവില്ലാതെ ജീവിക്കാനാവില്ല എന്ന് തോന്നിപ്പോകും. നിങ്ങളുടെ കണ്ണില്‍ അയാള്‍ പൂര്‍ണ്ണനായതിനാല്‍ യത്ഥാര്‍ത്ഥത്തില്‍ അയാളാരാണെന്ന് നിങ്ങള്‍ക്ക് മനസ്സിലാക്കാനാവില്ല.

:::::::::::::::::::::::   xxxxxxxxxxxxxxx   :::::::::::::::::::::    xxxxxxxxxxxxxxx  :::::::::::::::::::::::: xxxxxxxxxxxxxxx 

പലപ്പോഴും ഈ പറയുന്ന Infatuation ആണ് പ്രേമം എന്ന് തെറ്റിദ്ധരിക്കപ്പെടുന്നതും പക്വമല്ലാത്ത മനസ്സുള്ളവരുടെ ആത്മഹത്യയില്‍ വരെ എത്തിച്ചേരുന്നതും. അനുദിനം മാറിക്കൊണ്ടിരിക്കുന്ന സാമൂഹിക പശ്ചാത്തലത്തില്‍  ബന്ധങ്ങള്‍ക്ക് മാറ്റം വരുകയും ഒരു വിവാഹേതര ബന്ധം തെറ്റല്ല എന്ന് സാഹിത്യത്തിലൂടെയും ദൃശ്യമാധ്യമങ്ങളില്‍ കൂടെയും മനസ്സില്‍ ഊട്ടി ഉറപ്പിക്കുകയും ചെയ്യുന്ന സ്ത്രീകള്‍ക്കും പുരുഷന്മാര്‍ക്കും തന്നോട് അടുക്കുന്ന എതിര്‍ലിംഗക്കാരോട്  ഈ പറയുന്ന മോഹിക്കല്‍ തോന്നുന്നത് സ്വാഭാവികം. വളരെ ലാഘവത്തോടെ ഈ ബന്ധങ്ങളെ സമീപിക്കുന്നവര്‍ അതേ ലാഘവത്തോടെ തന്നെ അതില്‍ നിന്ന് പിന്മാറുകയും ചെയ്യും. പക്ഷേ തനിക്കു തോന്നുന്ന Infatuation എന്ന വികാരം പ്രേമം ആണെന്ന് ധരിക്കുകയും, എന്നാല്‍ തന്റെ ഈ ബന്ധത്തിലെ പങ്കാളി അങ്ങനെ കരുതാതിരിക്കുകയും ചെയ്യുമ്പോഴാണ് ആത്മഹത്യയിലേക്ക് കാര്യങ്ങള്‍ എത്തുന്നത്. പൂര്‍‌വ്വകാലങ്ങളില്‍ പലപ്പോഴും സ്ത്രീകള്‍ ആണ് ഇരയുടെ സ്ഥാനത്ത് ഉണ്ടായിരുന്നതെങ്കില്‍ ഇന്നിത് ആണുങ്ങള്‍ക്കും പെണ്ണുങ്ങള്‍ക്കും ഒരേ പോലെ ബാധകമാണ്‍.

നാലാമത്തെ പോയിന്റില്‍ പറയുന്ന ഭയം, അത് ഇല്ലാതാകുന്ന ചില അവസരങ്ങള്‍, അതില്‍ ശരീരിക ബന്ധങ്ങള്‍ യാദൃശ്ചികമായി ജീവിതത്തില്‍ സംഭവിച്ചു പോവുകയും അത് ചിലര്‍ക്കെങ്കിലും പശ്ചാതാപം തോന്നുന്ന അവസ്ഥയിലേക്ക്  എത്തുകയും ചെയ്യുന്നു.

അതുപോലെ തന്നെ രണ്ടാമത്തെ പോയിന്റ്. തന്റെ ഈ ബന്ധത്തിലെ പങ്കാളി മറ്റുള്ളവരോട് ഇടപഴകുന്നതും ഇതേ രീതിയിലായിരിക്കും എന്ന മുന്‍‌വിധി സ്വാഭാവികമായും അയാളെ സംശയദൃഷ്ടിയോടെ നിരീക്ഷിക്കാന്‍ ഇടയാക്കുന്നു. ഇത് സ്വയം മാനസിക സംഘര്‍ഷം ഉണ്ടാക്കുകയും ചെയ്യുന്നു.

പലപ്പോഴും വിവാഹേതര ബന്ധങ്ങളും ആരംഭിക്കുന്നതും അസ്വസ്ഥമായ അവസ്ഥയിലേക്ക് അത് നീങ്ങുന്നതും ഈ മോഹിപ്പിക്കല്‍ മൂലമാണ്, അല്ലാതെ സ്നേഹം മൂലമല്ല. ഈ പറഞ്ഞ കാരണങ്ങള്‍ കൊണ്ടാണ് പലപ്പോഴും ഇവയൊക്കെ പരാജയപ്പെടുന്നതും പങ്കാളിയെ ഉത്മൂലനം ചെയ്യാന്‍ പോലും പലരും തുനിയുന്നതും.

ആധാര്‍ കാര്‍ഡും വ്യക്തിവിവരങ്ങളും

ആധാര്‍ കാര്‍ഡ് എടുക്കുന്നതോ എടുക്കാതിരിക്കുന്നതോ ഓരോരുത്തരുടെ ഇഷ്ടം. അതില്‍ അഭിപ്രായം പറയാന്‍ ഞാനില്ല. ആധാര്‍ ഉണ്ടെങ്കിലേ സബ്സിഡി സിലിണ്ടാര്‍ കിട്ടൂ എന്ന് പറയുന്നതും എനിക്ക് ബാധകമല്ല. കാരണം റേഷന്‍ കാര്‍ഡ് ഉണ്ടെങ്കിലേ ഗ്യാസ് ഏജന്‍സി സബ്സിഡി ഉള്ള ഗ്യാസ് തരൂ. പ്രവാസി എന്ന നിലയില്‍ റേഷന്‍ കാര്‍ഡ് തരാനാകില്ല എന്ന് സിവില്‍ സപ്ലൈസ് ഡിപ്പാര്‍ട്ട്മെന്റ് പറഞ്ഞിട്ടുണ്ട്. എങ്കിലും കഴിഞ്ഞ തവണ നാട്ടില്‍ പോയപ്പോള്‍ ആധാര്‍ കാര്‍ഡിന് അപേക്ഷിച്ചിരുന്നു. കഴിഞ്ഞ ദിവസം കാര്‍ഡ് കിട്ടുകയും ചെയ്തു എന്ന് ഇന്നറിയാന്‍ കഴിഞ്ഞു.

ആധാര്‍ കാര്‍ഡ് എടുക്കില്ല എന്ന് പറഞ്ഞ് പലരും ഇട്ട പോസ്റ്റ് ഇന്നു കണ്ടു. അതിന് പറഞ്ഞിരിക്കുന്ന കാരണങ്ങള്‍ വളരെ രസകരമായി തോന്നി. പലര്‍ക്കും പ്രശ്നം ഇത് പ്രൈവറ്റ് കമ്പനികള്‍ ചെയ്യുന്നതിനാല്‍ വ്യക്തിവിവരങ്ങള്‍ സുരക്ഷിതമല്ല എന്നാണ്. ഗള്‍ഫ് രാജ്യങ്ങളില്‍ ജോലി ചെയ്യുന്ന ലക്ഷക്കണക്കിനു പ്രവാസികളുടെ പാസ്പോര്‍ട്ട് പുതുക്കുന്നത് പ്രൈവറ്റ് ഏജന്‍സികളാണെന്ന് ഇവര്‍ക്കറിയാമോ? ഞങ്ങളുടെ പ്രൈവസിക്കൊന്നും ഒരു വിലയുമില്ലേ? എല്ലാ പ്രവാസികളുടേയും വിവരങ്ങള്‍ അമേരിക്കയുടെ കയ്യില്‍ എത്താന്‍ ആധാര്‍ കാര്‍ഡ് വേണമെന്നില്ല എന്നര്‍ത്ഥം.

ഇനി ചിലര്‍ പറയുന്നത്, വിരലടയാളങ്ങളും മറ്റും കൊടുക്കുന്നത് സുരക്ഷിതമല്ല എന്നാണ്. അതിലും ഞങ്ങള്‍ പ്രവാസികള്‍ പരാജയപ്പെടുന്നു. ഇവിടെ യു എ ഇ-യില്‍ വന്നവര്‍ ഒക്കെ എമിറെറ്റ്സ് ഐ ഡി (Emirates ID) എടുക്കണം. അവിടെ എല്ലാ കൈവിരലുകളും രണ്ടു കണ്ണുകളും സ്കാന്‍ ചെയ്തു വയ്ക്കും. ഇവിടെ വന്നിറങ്ങുന്ന ഒരോ വിസിറ്റേഴ്സും കണ്ണിന്റെ സ്കാനിന് വിധേയനാകണം. അതൊക്കെ തന്നെയല്ലേ ആധാറിനും ചെയ്യുന്നത്? പിന്നെന്താണ് ഇന്ത്യയിലുള്ളവര്‍ ഇതിന് ഇത്ര പേടിക്കുന്നതെന്ന് മനസ്സിലാകുന്നില്ല.
---------------------------   ---------------------------------------- -----------------------------
ഒരു ചൈനാ മേഡ് USB ഉപയോഗിക്കുമ്പോള്‍ പോലും നിങ്ങളുടെ പ്രൈവറ്റ് കാര്യങ്ങള്‍ ചൈനയില്‍ എത്താവുന്ന സാഹചര്യത്തില്‍ കുറച്ചു കാര്യങ്ങള്‍ അമേരിക്കയുടെ കയ്യിലും ചെല്ലട്ടെ. പറഞ്ഞു വന്നത് ഒന്നും ഇന്ന് പ്രൈവറ്റ് അല്ല. എല്ലാം പബ്ലിക് തന്നെയാണ്, നിങ്ങളറിയാതെ തന്നെ.

വിദേശ ഇന്ത്യാക്കാരും വീട്ടുജോലിക്കാരും.

വിദേശത്തേക്ക് വീട്ടുജോലിക്കാരെ കൊണ്ടു പോകുന്നത് സാധാരണമാണ്‍. ഭര്‍ത്താവും ഭാര്യയും ജോലിക്കു പോകുന്ന കുടുംബങ്ങളില്‍ പലപ്പോഴും ഇതൊരു ആവശ്യമാണെന്ന് തോന്നുന്നു. ബേബി സിറ്റിങ്, ലോക്കല്‍ ബേബി സിറ്റര്‍ ഒക്കെ അറേഞ്ച് ചെയ്യേണ്ട സാഹചര്യം ഒഴിവാക്കാനാണ് പലപ്പോഴും ആള്‍ക്കാര്‍ നാട്ടില്‍ നിന്ന് തന്നെ ആള്‍ക്കാരെ ഏര്‍പ്പാട് ചെയ്യുന്നത്. ഇതില്‍ ഉള്ള പ്രശ്നങ്ങളും കാഴ്ചപ്പാടുകളും നോക്കാം.
 
സാധാരണയായി നാട്ടില്‍ നിന്ന് തന്നെ ഒരു മാസശമ്പളം പറഞ്ഞുറപ്പിച്ചാണ് ആള്‍ക്കാരെ ജോലിക്കായി കൊണ്ടു വരുന്നത്. ഗള്‍ഫില്‍ നേരത്തെ ഏഴായിരം, എണ്ണായിരം രൂപ ആയിരുന്നത് ഇപ്പോള്‍ പതിനായിരം-പന്തീരായിരം റേഞ്ചില്‍ എത്തിയിട്ടുണ്ട്. താമസവും ഭക്ഷണവും തികച്ചും സൗജന്യം. നാട്ടില്‍ ആറായിരം മുതല്‍ പതിനായിരം വരെ അല്ലെങ്കില്‍ മെട്രോ നഗരങ്ങളില്‍ പതിനയ്യായിരം വരെ കിട്ടുന്നുണ്ടായിരിക്കാം. അതില്‍ നിന്ന് ചിലവും കഴിഞ്ഞ് എത്ര കാണും എന്ന് കണക്കു നോക്കിയാല്‍ അറിയാം. ഈ സാഹചര്യത്തിലാണ് പതിനായിരം വരെ ശമ്പളം പറഞ്ഞുറപ്പിച്ച് വിദേശത്തേക്ക് വരുവാന്‍ ഒരു ഗാര്‍ഹിക തൊഴിലാളി തയ്യാറാകുന്നത്. നിലവിലുള്ള സാഹചര്യത്തില്‍ വാക്കാലുള്ള എഗ്രിമെന്റാണിത്. ചുരുക്കം ചിലര്‍ എഴുതി ഉണ്ടാക്കാറുണ്ട്.
യു എ ഇ-യില്‍ ഒരു ഇന്ത്യന്‍ തൊഴിലാളിയെ കിട്ടാന്‍ ഇന്ത്യന്‍ എമ്പസിയില്‍ ചെന്ന് അവിടുത്തെ ഒരു ഫോമില്‍ ഒരു കോണ്ട്രാക്ട് ഉണ്ടാക്കണം. ആയിരത്തി ഒരുനൂറ് ദിര്‍ഹമാണ്‍ മിനിമം കൂലി. അതായത് ഇന്നത്തെ നിലയില്‍ പതിനാറായിരത്തി അഞ്ഞൂറ് രൂപ. അതിനു പുറമെ താമസം, ഭക്ഷണം, വര്‍ഷത്തെ ടിക്കറ്റ്, ലീവ് സാലറി, ടെലെഫോണ്‍.. എല്ലാം കൊടുക്കണം. എല്ലാം കൂടി കൂട്ടുമ്പോള്‍ രണ്ടായിരം ദിര്‍ഹത്തോളം വരും. ഒരു ഓഫീസ് തൊഴിലാളിക്ക് കിട്ടുന്നത് രണ്ടായിരം ദിര്‍ഹം മുതല്‍ മുകളിലോട്ടാണ്‍. പകലന്തിയോളം പൊരിവെയിലില്‍ പണിയെടുക്കുന്ന മേസ്തിരി, ആശാരി, ഇലക്ട്റീഷ്യന്‍ തുടങ്ങിയവരുടെ മാസശമ്പളം ആയിരം മുതല്‍ ആയിരത്തഞ്ഞൂറ് വരെ ആണ്‍.

വിദേശത്ത് എത്തിയാല്‍ അതാത് സ്ഥലത്തെ തൊഴില്‍ നിയമം അനുസരിച്ച് ഒരു ലേബര്‍ കോണ്ട്രാക്റ്റ് ഉണ്ടാക്കുന്നു. വിസ സ്റ്റാമ്പ്  ചെയ്യാന്‍ ഇത് ആവശ്യമായതിനാല്‍ പലരും ഇതിനെ ഒരു ഫോര്‍മാലിറ്റി ആയി കാണുന്നു. എന്നിട്ട്, നാട്ടില്‍ നിന്ന് പറഞ്ഞുറപ്പിച്ച ശമ്പളം മാസാമാസം ഇവരുടെ ബാങ്കിലേക്ക് അയക്കുന്നു. ഇതാണ്‍ സാധാരണ നടക്കുന്നത്.


ഇനി ഇവരുടെ പണിസമയവും പണികളേയും പറ്റി നോക്കാം. കൂടുതലും കുട്ടികളെ നോക്കുക എന്നതാണ്‍ പ്രധാന പണി. അതിന്റെ കൂടെ വീട്ടുപണികളും ചെയ്യണം. സാധാരണ ഒരു വീട്ടമ്മ നാട്ടില്‍ ചെയ്യുന്ന പണികള്‍ തന്നെ. ഭക്ഷണം ഉണ്ടാക്കുക, അടിച്ചു വാരുക (ഒരു ബെഡ്‌റൂം ഉള്ള ഫ്ലാറ്റ് അല്ലെങ്കില്‍ മാക്സിമം 3-ബെഡ്‌റൂം ഫ്ലാറ്റ്), തുണി കഴുകുക (വാഷിങ് മെഷീന്‍ ഉപയോഗിച്ച്) തുടങ്ങിയവയാണ് പ്രധാന പണികള്‍. ഇത്രയും പണി, ചെയ്യാന്‍ പരിചയം ഉള്ളവര്‍ക്ക് മൂന്നു മണിക്കൂര്‍ കൊണ്ട് എല്ലാം തീരും.  കൊച്ചു കുട്ടികള്‍ ഉള്ള വീടാണെങ്കില്‍ ഇത്തിരി കൂടി ബുദ്ധിമുട്ട് തന്നെ. അപ്പോള്‍ പലപ്പോഴും വീട്ടമ്മ തന്നെ കുറെ പണികള്‍ ചെയ്യുന്നു എന്നതാണ് കണ്ടിരിക്കുന്നത്. സ്കൂളില്‍ പോകുന്ന കുട്ടികളാണെങ്കില്‍ സ്കൂള്‍ ബസ് വരുമ്പോള്‍ കുട്ടിയെ വഴിയില്‍ നിന്ന് കൂട്ടി കൊണ്ടു വരണം. കുട്ടി സ്കൂളില്‍ പോകുന്ന സമയം മിക്കവാറും തൊഴിലാളിക്ക് വിശ്രമിക്കാം. ഒരു ഫ്ലാറ്റില്‍ താമസിക്കുന്ന ഫാമിലിയില്‍ ഒരു ഗാര്‍ഹിക തൊഴിലാളിക്ക് ജോലി ചെയ്യേണ്ടി വരുന്നത് (കുട്ടികളെ നോക്കുന്നതൊഴിച്ച്) കേവലം നാല്‍-അഞ്ച്-ആറ് മണിക്കൂര്‍ ആണ്‍.


ഇന്ത്യന്‍ കുടുംബങ്ങളുടെ കൂടെ ജോലിക്കു നില്‍ക്കുന്ന ഏകദേശം അറുപത് എഴുപത് ശതമാനം ഗാര്‍ഹിക തൊഴിലാളികളും അസംതൃപ്തരാണ് എന്നാണ് മനസ്സിലാക്കിയത്. അതുപോലെ തന്നെ ഏകദേശം എണ്‍പത് ശതമാനം തൊഴില്‍ ദാതാക്കളും അസംതൃപ്തരാണ്‍. കാരണങ്ങള്‍ പലതാണ്‍. തൊഴിലാളികളുടെ കാര്യമെടുത്താല്‍, പല സാഹചര്യങ്ങള്‍ മൂലമാണ് പലരും വിദേശത്തേക്ക് വരാന്‍ "നിര്‍ബന്ധിതരാ"കുന്നത്. പലര്‍ക്കും ഇവിടെ എത്തിപ്പെട്ടു കഴിഞ്ഞുള്ള ഏകാന്തതയുമായി താദാമ്യം പ്രാപിക്കാനാകുന്നില്ല. അയല്‍‌പക്കത്ത് പോകുകയും കുറച്ച് ലോകകാര്യങ്ങളും കുന്നായ്മയും പറയുകയുമൊക്കെ ചെയ്തിരുന്നവര്‍ പെട്ടെന്ന് ആരും സംസാരിക്കാനില്ലാത്ത ഒരിടത്തേക്കു വരുമ്പോഴുള്ള അസ്വസ്ഥത. അതുപോലെ സ്വതന്ത്രരായി നടന്നവര്‍ക്ക് പെട്ടെന്ന് സ്വാതന്ത്രയം നഷ്ടപ്പെട്ട ഒരു തോന്നല്‍. ഇതെല്ലാം കഴിഞ്ഞ് അടുത്ത ഫ്ലാറ്റിലെ തൊഴിലാളിക്ക് തന്നേക്കാള്‍ കൂടുതല്‍ ശമ്പളം കിട്ടുന്നു എന്നറിയുമ്പോഴേക്കും ഈ അസ്വസ്ഥത അതിന്റെ മൂര്‍ദ്ധന്യാവസ്ഥയില്‍ എത്തുന്നു. അവസാനം കോണ്ട്രാക്റ്റ് കാലാവധി കഴിയാതെ തന്നെ ക്യാന്‍സലാക്കി തിരികെ നാട്ടിലേക്ക് പോകുന്നു.


യു എ ഇ-യിലേക്ക് ഒരാളെ കൊണ്ടുവരുന്നതിനുള്ള എംബസിയിലെയും എമിഗ്രേഷനിലെയും ചിട്ടവട്ടങ്ങള്‍ ഇതിലും ബ്രഹതാണ്‍. ഒരു ആളെ ജോലിക്കു കൊണ്ടു വരാന്‍ വിസ എടുക്കണെമെങ്കിലുള്ള ചടങ്ങുകള്‍ അറിഞ്ഞു കഴിയുമ്പോള്‍ തന്നെ ചിലര്‍ ആ തീരുമാനം വേണ്ടെന്ന് വക്കുന്നു.

ആദ്യമായി രക്തബന്ധത്തില്‍ ഉള്ളയാളല്ല എന്ന സര്‍ട്ടിഫിക്കറ്റ് എംബസിയില്‍ നിന്ന് വാങ്ങണം. അതും വാങ്ങി, കമ്പനി ലെറ്റര്‍ (സാലറി സര്‍ട്ടിഫികറ്റ്), ഫ്ലാറ്റിന്റെ കരാര്‍, സ്വന്തം തൊഴില്‍ കരാര്‍ എന്നിവയെല്ലാം ഹാജരാക്കി വിസ എടുക്കണം. അതിനു ശേഷം എംബസിയില്‍ പോയി അവിടുത്തെ "തൊഴില്‍ കരാര്‍" ഇംഗ്ഗ്ലിഷിലും അറബിയിലും അടിച്ച്, ഷാരിയ കോര്‍ട്ടില്‍ പോയി അറ്റസ്റ്റ് ചെയ്ത്, ഫോറിന്‍ അഫ്ഫയേഴ്സില്‍ പോയി അറ്റസ്റ്റ് ചെയ്ത് വീണ്ടും എംബസിയില്‍ ചെല്ലുമ്പോള്‍  അവിടെ സെക്യൂരിറ്റി ഡിപ്പോസിറ്റ് ആയി 9200 ദിര്‍ഹം (ഏകദേശം ഒന്നര ലക്ഷം രൂപ) അടക്കുമ്പോള്‍ അവര്‍ സ്റ്റാമ്പ് ചെയ്തു തരും. അതു നാട്ടില്‍ കൊണ്ടു വന്ന് പോകേണ്ട ആളെയും കൂട്ടി അവരുടെ ഇന്‍ഷുറന്‍സ് തുക അടച്ച് ഫീസും അടച്ചാല്‍ മാത്രമേ എമിഗേഷന്‍ ക്ലീയറന്‍സ് കിട്ടു. പ്രായം മുപ്പതിന്‍ മേല്‍ ആകണം. അങ്ങനെ നാട്ടില്‍ നിന്ന് വരുന്ന ആളിനെ പതിനഞ്ച് ദിവസത്തിനകം എംബസിയില്‍ ഹാജരാക്കണം. അവര്‍ തൊഴിലാളിക്ക് വേണ്ട ഉപദേശമൊക്കെ കൊടുക്കും. നമ്മള്‍ പീഢിപ്പിച്ചാല്‍ എംബസിയില്‍ അറിയിക്കണം എന്ന രീതിയില്‍. അവര്ക്ക് ഒരു മൊബൈല്‍ കൊടുക്കണം (ആ നമ്പര്‍ എംബസിയില്‍ എഴുതി വക്കുമെങ്കിലും, എന്തു കൊണ്ടോ ആരെയും എംബസിയില്‍ നിന്ന് വിളിച്ച് സുഖവിവരം അന്വേഷിക്കാറില്ല) നാട്ടിലേക്ക് വിളിക്കാനുളള കാശും കൊടുക്കണം. ഇതെല്ലാം കഴിഞ്ഞ് അവര്‍ എത്ര വര്‍ഷം കഴിഞ്ഞു നാട്ടില്‍ പോകുന്നോ, അതിന്‍ മുമ്പ് അവരെ എംബസിയില്‍ ഹാജരാക്കി അവര്‍ക്കു കുഴപ്പമൊന്നും ഇല്ല എന്ന് ഉറപ്പു വരുത്തണം. ഈയിടെയായി അതും പോരാ, അവര്‍ക്ക് ശമ്പളം കൊടുത്തതിന്റെ തെളിവ് ഹാജരാക്കണമെന്ന് ശഠിക്കുന്നു എന്നും കേട്ടു. അതെല്ലാം കഴിഞ്ഞ് ആള്‍ ക്യാന്‍സല്‍ ചെയ്തു പോയാല്‍ മാത്രമേ മുകളില്‍ പറഞ്ഞ സെക്യൂരിറ്റി തുകക്കുള്ള ചെക്ക് (ഒരു മാസത്തിനകം) കിട്ടുകയുള്ളു. അതും വര്‍ഷം എത്ര കഴിഞ്ഞായാലും ഒരു പലിശയുമില്ലാതെ.


വിസ  പാസ്പോര്‍ട്ടില്‍ സ്റ്റാമ്പ് ചെയ്യാന്‍, മെഡിക്കല്‍ ടെസ്റ്റ്, ഐഡന്റിന്റി കാര്‍ഡ്, ഇവിടുത്തെ ഇന്‍ഷുറന്‍സ് എന്നിവക്ക് വീണ്ടും പണം ചെലവാക്കണം. അതിനു ശേഷം 5000+200 ദിര്‍ഹം ഒരു വര്‍ഷത്തേക്ക് അടച്ച് വിസ അടിക്കണം. ഇത് ഫീസ് ആണ്‍, തിരികെ കിട്ടില്ല.

നേരത്തെ പറഞ്ഞല്ലോ എണ്‍പത് ശതമാനം തൊഴില്‍ ദാതാവും തൃപ്തരായിരിക്കില്ല എന്ന്. കാരണങ്ങള്‍ പലതാണ്‍. നാട്ടില്‍ നിന്ന് പോരുമ്പോള്‍ ഉള്ള ആളായിരിക്കില്ല ഇവിടെ എത്തുന്നത്. സ്വന്തം പ്രശ്നങ്ങള്‍ കൊണ്ട് അസ്വസ്ഥരായ തൊഴിലാളികള്‍ അവരുടെ അസ്വസ്ഥതകള്‍ കാണിക്കുന്നതു മൂലം പ്രശ്നങ്ങള്‍  ഉടലെടുക്കുന്നു. മിക്കവാറും താന്‍ നാട്ടില്‍ നിന്ന് പോന്നു കഴിയുമ്പോള്‍  നാട്ടിലോ വീട്ടിലോ ഉണ്ടാകുന്ന ചെറിയ പ്രശ്നങ്ങള്‍ വരെ അവരെ അസ്വസ്ഥരാക്കുന്നു. പുറമേ നിന്നുള്ള ഉപദേശങ്ങളും ചില പുറംബന്ധങ്ങളും തൊഴില്‍ ദാതാവ്-തൊഴിലാളി ബന്ധത്തെ ബാധിക്കുന്നു. കുട്ടിയെ സ്കൂള്‍ ബസില്‍ കയറ്റി വിടാന്‍ പോകുമ്പോള്‍ കാണുന്നവര്‍ വരെ തൊഴിലാളിയോട് അടുക്കാന്‍ ശ്രമിക്കുന്നതായി കാണാറുണ്ട്. പലയിടങ്ങളിലും മൊബൈല്‍ തന്നെ ഇതിലും വില്ലന്‍ കഥാപാത്രം. പല കേസിലും തൊഴിലാളികള്‍ കബളിക്കപ്പെടുമ്പോള്‍ ചില കേസുകളില്‍ തൊഴിലാളികള്‍ മുതലെടുപ്പ് നടത്തുകയും ചെയ്യുന്നുണ്ട്. (ചോദ്യം വേണ്ട, ഇതിന് രണ്ടിനും സാക്ഷിയായിട്ടുണ്ട്.). ഇതിന്റെ എല്ലാം തലവേദന അനുഭവിക്കുന്നത് "സ്പോണ്‍സര്‍"എന്ന പാവം തൊഴില്‍ ദാതാവ്.


എന്റെ അറിവില്‍ പെട്ടവയില്‍ വലരെ കുറച്ച് കേസില്‍ മാത്രമേ തൊഴിലാളികള്‍ പീഢിക്കപ്പെടുന്നുള്ളു. (പീഢനം എന്നാല്‍ മാനസിക ശരീരിക പീഢനം, ലൈംഗിക പീഢനം അല്ല). നിയമങ്ങള്‍ കര്‍ശനമായതിനാലും, ഇത്രയും കടമ്പകള്‍ കടന്നു വരുന്നതിനാലും, കുറെ പണനഷ്ടം വരുന്നതിനാലും തൊഴില്‍ ദാതാക്കള്‍ കഴിവതും "അഡ്ജസ്റ്റ്"ചെയ്തു പോകാറാണ്‍ പതിവ്.

:::::::::::::::: x x :::::::::::::::: x x :::::::::::::::: x x :::::::::::::::: x x

 

ഇതെല്ലാം ഗള്‍ഫ് രാജ്യങ്ങളിലെ കാര്യം. ഇവിടെ സ്പോണ്‍സറിന്റെ പക്കല്‍ നിന്ന് ചാടി പോകുന്നത് കുറവാണ്‍. ചാടി പോയി ആജീവനാന്തം പണി ചെയ്താലും ഇവിടെ സിറ്റിസണ്‍ഷിപ്പ് കിട്ടില്ല. എവിടെ വച്ചെങ്കിലും പിടിക്കപ്പെട്ടാല്‍ ജയില്‍വാസവും നാടു കടത്തലും. ജോലിക്കു നിര്‍ത്തുന്നവന്‍ 50000 ദിര്‍ഹം പിഴയും. ഇതു കൊണ്ട് തന്നെ ആ സാഹസം ചെയ്യാന്‍ ആരും മെനെക്കെടാറില്ല.

എന്നാല്‍ പാശ്ചാത്യനാടുകളില്‍  അങ്ങനെയല്ല എന്നാണ് കേട്ടിരിക്കുന്നത്. അഞ്ചു വര്‍ഷം ആ രാജ്യത്ത് പിടിക്കപ്പെടാതെ കഴിഞ്ഞു കൂടിയാല്‍ പോലും സിറ്റിസണ്‍ഷിപ്പ് കിട്ടും എന്നൊക്കെ കേട്ടിട്ടുണ്ട്. അങ്ങനെയാനെങ്കില്‍ എങ്ങനെയെങ്കിലും ഒരു ഗാര്‍ഹിക തൊഴിലാളി വിസ സംഘടിപ്പിക്കാന്‍ എത്ര കുറഞ്ഞ ശമ്പളം ആണെങ്കിലും ഏത് കരാറിലും ഒപ്പുവക്കാന്‍ പലരും തയ്യാറാകും.  ഒരു മാസം വീട്ടു പണിയെടുക്കാന്‍ രണ്ടേമുക്കാല്‍ ലക്ഷം രൂപ ശമ്പളം കൊടുക്കാന്‍ എത്ര ഇന്ത്യാക്കാര്‍ തയ്യറാകും? അപ്പോള്‍ മുകളില്‍ പറഞ്ഞ പോലെ പരസ്പരം സമ്മതിച്ച തുകക്ക് മറ്റൊരു കരാര്‍ ഉണ്ടാക്കും. അതായിരിക്കില്ലേ ദേവയാനി കേസിലും സംഭവിച്ചിരിക്കുക. അതെ എന്ന് എല്ലാവര്‍ക്കും അറിയാം. എങ്കിലും കുറഞ്ഞ കൂലി കൊടുത്ത് തൊഴിലാളിയെ വഞ്ചിച്ചു എന്നാണ്‍ പലരും പലയിടത്തും എഴുതി കണ്ടത്. ആ തൊഴില്‍ ദാതാവിന്റെ പക്ഷത്ത് നിന്ന് നോക്കിയാല്‍ അതെത്രമാത്രം ശരിയാണെന്ന് സംശയമുണ്ട്. അമേരിക്കന്‍ നിയമങ്ങളുടെ ലംഘനമാണ്‍ ദേവയാനി നടത്തിയത് എന്ന് പറയുമ്പോഴും അതിനെ ന്യായീകരിക്കാന്‍ പറ്റില്ലയെങ്കിലും മറ്റു പലരും  ചെയ്യുന്ന  കുറ്റമാണ്‍ ദേവയാനി ചെയ്തതെന്ന് പറയേണ്ടിയിരിക്കുന്നു.


ഇനി ഇവിടെയാണ് എംബസിയുടെ ഇരട്ടത്താപ്പ്. യു എ ഇ-യിലെ ഒരു സാധാരണ ഇന്ത്യാക്കാരന്‍ കൊണ്ടു വരുന്ന തൊഴിലാളിക്ക് ഇന്ത്യന് ഗവണ്മെന്റ് നിശ്ചയിച്ചിരിക്കുന്നത് മിനിമം 1100 ദിര്‍ഹം ആണ്‍. പരസ്പര ധാരണയില്‍ വരുന്ന ആള്‍ക്ക് കൊടുക്കുന്നത് പതിനായിരമോ പന്തീരായിരമോ ആണെന്നറിയാവുന്ന എംബസിക്കാര്‍  സെക്യൂരിറ്റി തുകയുടെ ബലത്തില്‍ 1100 ദിര്‍ഹം തൊഴിലാളിയുടെ അക്കൗണ്ടിലേക്ക് ട്രാന്‍ഫെര്‍ ചെയ്തതിന്റെ തെളിവുകള്‍ ചോദിക്കുന്നു. നേരെ മറിച്ച് അവരുടെ തന്നെ ഉദ്യോഗസ്ഥ പരസ്പരം ഉണ്ടാക്കിയ കരാറില്‍ പറഞ്ഞ ശമ്പളം കൊടുക്കുന്നതിനെ അനുകൂലിക്കുന്നു.

ഇങ്ങനെ വിദേശ ഇന്ത്യാക്കാരുടെ ഗാര്‍ഹിക തൊഴിലാളി പ്രശ്നം കുറെയേറെ കുരുക്കുകള്‍ നിറഞ്ഞതാണ്‍. അത് മാറി മാറി വരുന്ന നിയമങ്ങളും നയങ്ങളും കൊണ്ട് കൂടുതല്‍ കൂടുതല്‍ സങ്കീര്‍ണ്ണമാകുന്നുമുണ്ട്. ഭാവിയില്‍ ഇന്ത്യയില്‍ നിന്ന് ഗാര്‍ഹിക തൊഴിലാളികളെ കൊണ്ടു പോകുന്നത് വിദേശ ഇന്ത്യാക്കാര്‍ നിര്‍ത്തും എന്നാണ്‍ തോന്നുന്നത്.

:::::::::::::::: x x :::::::::::::::: x x :::::::::::::::: x x :::::::::::::::: x x

 

ഈ ലിങ്ക് കൂടി നോക്കൂ... ഒരാളെ കൊണ്ടു വരാന്‍ ഉള്ള മാസക്കണക്ക് ഇതില്‍ കാണാം. 
 

അഭിനന്ദനങ്ങള്‍ ദുബായ് - World Expo 2020

World Expo 2020 ദുബായില്‍ നടക്കുമെന്ന് കേട്ടപ്പോള്‍ പലരും സന്തോഷത്തോടെ അഭിനന്ദന പോസ്റ്റുകള്‍ ഫേസ്‌ബൂക്കില്‍ ഇട്ടു. ചുരുക്കി പറഞ്ഞാല്‍ ഇന്നലെ വൈകിട്ട് യു എ ഇ പ്രവാസികളുടെ സ്റ്റാറ്റസുകളില്‍ തൊണ്ണൂറ് ശതമാനവും ഇതുമായി ബന്ധപ്പെട്ടതായിരിക്കും എന്ന് തോന്നുന്നു.

എന്താണ് എക്സ്പോ...
The Great Exhibition, held in London in 1851, inaugurated World Expos as the hallmark events of a world aspiring to strengthen its connections, celebrate its cultural diversity and marvel at its technological wonders.

Every five years and for a period of six months, World Expos attract millions of visitors. The World Expo has never been held in the Middle East, Africa and South East Asia in the history of the event.

The UAE was bidding to host the World Expo 2020 in Dubai under the theme ‘Connecting Minds, Creating the Future’.

World Expo 2020 കൊണ്ട് ഉണ്ടായേക്കാവുന്ന ഗുണങ്ങള്‍

  1. ഇവിടെ ജോലി ചെയ്യുന്ന പലര്‍ക്കും തങ്ങളുടെ ജോലി 2020 വരെ എങ്കിലും "തെറിക്കില്ല" അല്ലെങ്കില്‍ ഈ ജോലി പോയാലും വേറൊന്നു "തരപ്പെടുത്താം" എന്ന ആശ്വാസമാണ്‍ ഇന്നലത്തെ അറിയിപ്പോടെ ലഭിച്ചിരിക്കുന്നത്.

2.483 ഹെക്ടര്‍ സ്ഥലത്ത് ഒരു ചെറിയ സിറ്റി തന്നെ ഇതിനായി നിര്‍മിക്കപ്പെടും. അതിനോട് അനുബന്ധിച്ച് നിരവധി റോഡുകളും പാലങ്ങളും നിര്‍മ്മിക്കപ്പെടും. അതിനു വെളിയില്‍ ഹോട്ടലുകള്‍ പോലെയുള്ള പല കെട്ടിടങ്ങളുടേയും പണി നടക്കും. ഇതിലൊക്കെ കുറെ പേര്‍ക്ക് ജോലി കിട്ടും. ഹോട്ടലുകള്‍ തുടങ്ങിക്കഴിഞ്ഞാല്‍ അനേകം പേര്‍ക്ക് ആ ഫീല്‍ഡില്‍ ജോലി കിട്ടും. (എല്ലാം മലയാളികള്‍ക്കാണ്‍ നേട്ടം എന്നൊന്നും അര്‍ത്ഥമില്ല.)

3. ആറുമാസം നീണ്ടു നില്‍ക്കുന്ന World Expo 2020-യില്‍ രണ്ടു കോടി സന്ദര്‍ശകര്‍ എങ്കിലും എത്തും എന്നാണ്‍ സംഘാടകര്‍ കരുതുന്നത്. അതില്‍ നിന്ന് തന്നെ ഇത് എത്ര വലിയ ഒരു "പരിപാടി"ആണെന്ന് ഊഹിക്കം.

4. ജോലി സാധ്യതെയെ പറ്റി പുറത്തു വന്ന ഊഹക്കണക്ക് അനുസരിച്ച് 270,000 നേരിട്ടുള്ള അവസരങ്ങളും അതിന്റെ 50 മടങ്ങ് നേരിട്ടല്ലാതെയുള്ള അവസരങ്ങളും സൃഷ്ടിക്കപ്പെടും. എത്രത്തോളം ശരിയാണെന്ന് അറിയില്ല. (ഒരു സ്മാര്‍ട്ട് സിറ്റിക്ക് തൊണ്ണൂറായിരം എന്ന കണക്കനുസരിച്ക്‍ കൂടുതലല്ല എന്ന് തോന്നുന്നു )

  ---------------- ------------------ ------------------------

കുറച്ച് വിവരങ്ങള്‍ World Expo 2020 വെബ്‌സൈറ്റില്‍ നിന്നും.http://www.expo2020dubai.ae/en/

യുഗങ്ങളും മഹാഭാരതവും

ശിലായുഗം (Stone Age)

  പ്രപഞ്ചോല്പത്തി മുതല്‍ ബി സി അയ്യായിരം വരെയുള്ള നീണ്ട കാലയളവിനെ നമുക്ക് ശിലായുഗം എന്ന് വിശേഷിപ്പിക്കാം അന്ന് മനുഷ്യനും അവന്റെ പൂര്‍‌വ്വികരും കല്ലുകൊണ്ടുള്ള ആയുധങ്ങളും മറ്റുമാണ്‍ ഉപയോഗിച്ചു കൊണ്ടിരുന്നത്.

വെങ്കലയുഗം (Bronze Age)

ഏകദേശം BC 3300-ഓടു കൂടി വെങ്കലത്തിന്റെ ഉപയോഗം തുടങ്ങി. ആഭരണങ്ങള്‍ക്കും പാത്രനിര്‍മ്മാണത്തിനുമൊക്കെ വെങ്കലം ഉപയോഗിച്ചു വന്നു. ആവശ്യത്തിന്‍ ബലമില്ലാതിരുന്നതിനാല്‍ ആയുധം ഉണ്ടാക്കാന്‍ വെങ്കലം ഉപയൊഗിച്ചിരുന്നില്ല. ആ കാലഘട്ടം ഏകദേശം BC1300 വരെ നീണ്ടു എന്നു പറയാം.

അയോയുഗം (Iron Age)

BC 1700-ഓട് കൂടി ഇരുമ്പ് കണ്ടു പിടിക്കപ്പെട്ടു. അതുനു മുമ്പ് തന്നെ ഉല്‍ക്കാശകലങ്ങളില്‍ നിന്ന് ഇരുമ്പ് വേര്‍ തിരിച്ചെടുത്തിരുന്നു എന്ന് പറയപ്പെടുന്നുണ്ട്. ഇതൊക്കെയാണെങ്കിലും BC 1200-നു ശേഷമാണ്‍ ഇരുമ്പ് വ്യാപകമായി ഉപയോഗിക്കാന്‍ തുടങ്ങിയതെന്ന് ഗവേഷകര്‍ പറയുന്നു. ഇന്ത്യയില്‍ ഇരുമ്പ് ഉപയോഗിക്കാന്‍ തുടങ്ങിയതും ഈ കാലഘട്ടത്തില്‍ ആണെന്ന് പറയപ്പെടുന്നു. BC 1100-ഓട് കൂടി എത്തിയ ആര്യന്മാര്‍ ആണ്‍ ഇരുമ്പിന്റെ ഉപയോഗം ഇന്ത്യയില്‍െത്തിച്ചതെന്നും ചിലര്‍ പറയുന്നു. കൗടില്യന്റെ അര്‍ത്ഥശസ്ത്രത്തില്‍ ഇരുമ്പിനെ പറ്റി പറഞ്ഞിട്ടുണ്ട്. അത് BC മൂന്നാം നൂറ്റാണ്ടിലെ കാര്യം. പിന്നീടീങ്ങോട്ട് ഇരുമ്പ് ആണ്‍ എല്ലാ കാര്യത്തിനും കൂടുതല്‍ ഉപയോഗിക്കുന്ന ലോഹം.

  ************************ *************************

മുകളില്‍ ഇത്രയും ചുരുക്കി പറഞ്ഞ കാര്യങ്ങള്‍ ചില സംശങ്ങള്‍ തീര്‍ക്കാനാണ്... മഹാഭാരതകഥ നടക്കുന്നത് എന്നാണ് എന്ന ചോദ്യത്തിന്‍ ഉത്തരം തേടിയുള്ള യാത്ര ആയിരുന്നു. പലയിടത്തും പലതും കണ്ടു. ലോജിക്കലി കഥ നടക്കാന്‍ സാധ്യതയുള്ളത് BC 1000-നു ശേഷമായിരിക്കണം. കാരണം മഹാഭാരതത്തില്‍ ഇരുമ്പിനെ കുറിച്ചുള്ള പല പ്രസ്ഥാവനകളുമുണ്ട് എന്നത് തന്നെ. അമ്പ് ഉപയോഗം തന്നെ ഏറ്റവും വലിയ ഉദാഹരണം. പിന്നെ, ധൃതരാഷ്ട്രാലിംഗനം, ആ ഇരുമ്പുലക്കയും പിന്നെ ശ്രീകൃഷ്ണന്റെ അന്ത്യവും ഒക്കെ ഇരുമ്പുമായി ബന്ധപ്പെട്ടതാണ്‍.


നിഗമനങ്ങള്‍ :

1: ഇപ്പോള്‍ പ്രചരിക്കുന്നതു പോലെ ശ്രീകൃഷണന്‍ ജനിച്ചതും മഹാഭാരത കഥ നടന്നതും അയ്യായിരം വര്‍ഷങ്ങള്‍ക്ക് മുമ്പല്ല.

2: ത്രേതായുഗത്തില്‍ ശ്രീരാമന്‍ ഉപയോഗിച്ചതും അമ്പ് തന്നെയാണെന്നതിനാല്‍ ആ കഥയും മുകളീല്‍ പറഞ്ഞ കാലഘട്ടത്തില്‍ തന്നെ നടന്നതാവണം..

ചുരുക്കം: പുരാണ കഥകള്‍ കഥകളായി തന്നെ വിശ്വസിക്കണം, അതിലെ സാരാംശം ഗ്രഹിക്കണം, അതില്‍ പറയുന്ന നല്ലതെല്ലാം മനസ്സിലാക്കണം. അതല്ലാതെ ഇന്നു പ്രചരിക്കുന്നതും പ്രചരിപ്പിക്കുന്നതുമായ "കഥകളും" നടപ്പില്‍ വരുത്താന്‍ ചിലര്‍ ശ്രമിക്കുന്ന "അജണ്ടയും" മനസ്സിലാകാതെ ഇതെല്ലാം വള്ളി പുള്ളി വിടാതെ വിഴുങ്ങുന്ന വിഡ്ഡികള്‍ ആകാതിരിക്കുക..

ജസീറയുടെ സമരം - ഭാവുകങ്ങള്‍

ജസീറ സമരപ്പന്തല്‍ എന്തിന് ഡല്‍ഹിയിലേക്ക് മാറ്റി എന്ന് ചോദിച്ചവരുണ്ട്. സ്വന്തം നാട്ടില്‍ നടത്തിയ സമരത്തിനു ശേഷം രണ്ടു മാസം തിരുവനന്തപുരത്തു സമരം നടത്തിയിട്ടും ഒരു രാഷ്ട്രീയ പാര്‍ട്ടിയും ( ഇടതു വലതു പക്ഷാഭേതം ഇല്ല) ആ സമരം ഏറ്റെടുത്ത് നടത്താന്‍ തയ്യാറായില്ല. എന്തു കൊണ്ടെന്ന് ചോദ്യത്തിനുള്ള ഉത്തരം എല്ലാവര്‍ക്കും അറിയാം എന്ന് കരുതാം. ഡല്‍ഹിയിലേക്ക് സമരം മാറ്റി മനുഷ്യാവകാശ കമ്മീഷന്‍ ഇടപെട്ടതോടെ ചിത്രം മാറി (കേരളത്തില്‍ മനുഷ്യാവകാശ കമ്മീഷന്‍ ഓഫീസ് പ്രവര്‍ത്തിക്കുന്നില്ലേ എന്ന ചോദ്യം തല്‍ക്കാലം ചോദിക്കുന്നില്ല). രമേശ് ചെന്നിത്തല സമരപ്പന്തലില്‍ എത്തി. കുട്ടികളുടെ വിദ്യാഭ്യാസത്തെ പറ്റിയാണ്‍ അങ്ങേര്‍ക്കും ആകുലത. (പഠിക്കാന്‍ പോകാത്ത അല്ലെങ്കില്‍ അതിന്‍ കഴിവില്ലാത്ത അനേകം കുട്ടികള്‍ കേരളത്തിലുണ്ടെങ്കിലും അവരെ ഒന്നും ആരും കാണുന്നില്ലേ എന്നത് മറ്റൊരു ചോദ്യം). വി ഡി സതീശനോ വേണു ഗോപാലോ മറ്റാരൊക്കെയോ സമര പന്തലില്‍ ചെന്ന് സുഖവിവരം തിരക്കി പോലും. കേരളത്തില്‍ വച്ച് അത് ചെയ്തു കൂടായിരുന്നോ? ജസീറക്ക് കൊടുത്ത ഉറപ്പ് പാലിക്കുന്നുണ്ടോ എന്നെങ്കിലും അന്വേഷിച്ചോ ഈ മാന്യന്മാര്‍? സാക്ഷര കേരളം, പ്രബുദ്ധ കേരളം എന്നൊക്കെ പറയുമ്പോഴും ഏതെങ്കിലും യുവജന സംഘടനകളോ വിദ്ധ്യാര്‍ത്ഥി പ്രസ്ഥാനങ്ങളോ ജസീറയെ പിന്താങ്ങുവാന്‍ (എന്റെ അറിവില്‍) കേരളത്തില്‍ ഇല്ലായിരുന്നു എന്നത് എടുത്തു പറയേണ്ടതാണ്‍. ഇടക്ക് ചില ഒറ്റപ്പെട്ട ഇടപെടലുകള്‍ ഉണ്ടായിരുന്നു എന്നത് മറക്കുന്നില്ല. ഡല്‍ഹിയിലെ അക്രമങ്ങളെ കുറ്റം പറയുമ്പോഴും അവിടെയുള്ള വിദ്ധ്യാര്‍ത്ഥി സംഘടനകള്‍ ജസീറക്ക് പിന്തുണയുമായി എത്തുന്നു എന്നത് ഒരു നല്ല ലക്ഷണമായി കാണുന്നു. ജസീറയുടെ സമരത്തിന് എല്ലാ ഭാവുകങ്ങളും നേരുന്നു.

കണ്‍‌വെണ്‍ഷന്‍ സെന്റര്‍ - ബോള്‍ഗാട്ടി

എന്താണ് ലുലു കണ്‍‌വെന്‍ഷന്‍ സെന്റര്‍ എന്നോ, എന്താണ് ആ പ്രോജക്റ്റ് എന്നൊ ഒന്നും അറിയാത്തവരാണ് കേരളത്തിലെ തൊണ്ണൂറ് ശതമാനം ആള്‍ക്കരും. അതില്‍ ഉള്‍പ്പെടുന്നവനാണ് ഞാനും. യൂസഫലി പത്രസമ്മേളനം നടത്തി " എന്നെ കയ്യേറ്റകാരന്‍ എന്നു വിളിച്ചില്ലേ, അതിനാല്‍ ഞാന്‍ കൂട്ടുവെട്ടി, ഞാന്‍ എന്റെ സെന്ററും കൊണ്ട് നാടു വിടുന്നു" എന്ന് പറയുന്ന നിമിഷം,  കേരളത്തിന്റെ വികസനത്തിനു വിലങ്ങുതടിയായി ആരോ പ്രവര്‍ത്തിക്കുന്നു എന്ന് നാട്ടുകാര്‍ക്ക് മുഴുവന്‍ മനസ്സിലായി.

വായിച്ചറിഞ്ഞിടത്തോളം ഒരു കണ്‍‌വെന്‍ഷന്‍ സെന്ററും, അതിന്റെ കൂടെ ഗ്രാന്റ് ഹയാത്ത് ഹോട്ടലും ആണ് ആ പ്രോജക്ട്. ആ പ്രോജക്റ്റ് ആണ് ഇപ്പോള്‍ കേരളത്തിന് നഷ്ടപ്പെടുന്നത്. കേരളത്തിന്റെ വികസനത്തിന് വിലങ്ങു തടിയാകുന്നവര്‍, അതായത് ഇടതുപക്ഷം ജനങ്ങളോട് മാപ്പു പറയണം. മാപ്പു പറയുന്നതിന് മുമ്പ്,,,,

ഈ സെന്റര്‍ കൊണ്ട് എന്താണ് ഉദ്ദേശിക്കുന്നത്. അതു കൊണ്ട് കേരളത്തിന് എന്തൊക്കെയാണ് നഷ്ടപ്പെടുന്നത് എന്നൊക്കെ ആരെങ്കിലും ജനങ്ങളെ പറഞ്ഞു മനസ്സിലാക്കണം. പതിനാലായിരം തൊഴിലവസരം, ഇരുപതിനായിരം തൊഴിലവസരം, അമ്പതിനായിരം ഇന്‍‌ഡയറക്റ്റ് തൊഴിലവസരം എന്നൊക്കെ ആര്‍ക്കും പറയാവുന്നതാണ്.

ഒരു കണ്‍‌വെന്‍ഷന്‍ സെന്റര്‍ പണി തീരുന്നതു വരെ പല കമ്പനികള്‍ക്കും അവിടെ പണി കിട്ടും, പലര്‍ക്കും ആ കമ്പനികളില്‍ ജോലി കിട്ടും എന്നതൊക്കെ ഏത് പ്രോജക്ടിലും ഉള്ളതാണ്. അത് കൂടുതലും മലയാളികള്‍കാവില്ല എന്നത് കേരളത്തിലെ ഇന്നത്തെ തൊഴില്‍മേഘലയെ അറിയുന്നവര്‍ക്കറിയാം. ആതൊന്നുമല്ലാതെ സ്ഥിരം തൊഴിലവസരങ്ങള്‍ എത്ര കാണും എന്നതാണ് ഒരു സ്ഥാപനത്തിന്റെ തൊഴിലവസരം എന്നതു കൊണ്ട് ഉദ്ദേശിക്കുന്നത്.

കണ്‍‌വെണ്‍ഷന്‍ സെന്റര്‍ എന്നത് എക്സിബിഷന്‍സ് നടത്താനുള്ള പല ഹാളുകളാണ്. അവിടെ നടക്കുന്ന എക്സിബിഷനുകളില്‍ കൂടുതലും പൊതു ജനങ്ങള്‍ക്ക് ഉള്ളതാകില്ല. ലോകത്തിന്റെ പല ഭാഗത്തു നിന്ന് ക്ഷണം സ്വീകരിച്ചെത്തുന്ന പല കമ്പനികളിലെ ആളുകള്‍ക്കു വേണ്ടിയുള്ള എക്സിബിഷനുകള്‍ ആയിരിക്കും അവയില്‍ ഭൂരിഭാഗവും. അങ്ങനെ ഗസ്റ്റുകള്‍ വന്നാല്‍ നമ്മുടെ ഹോട്ടലുകള്‍ക്കൊന്നും ഉപയോഗം ഉണ്ടാകാതിരിക്കാനാണ് ആ കണ്‍‌വെന്‍ഷന്‍ സെന്ററിന്റെ കൂടെ ഹയാത്ത് ഹോട്ടല്‍ കൂടി തുടങ്ങുന്നത്.

ഒരു എക്സിബിഷന്‍ സെന്റര്‍ തുടങ്ങിക്കഴിഞ്ഞാല്‍ അതില്‍ നിന്നുള്ള വരുമാനം സാധാരണക്കാരന് പ്രതീക്ഷിക്കാവുന്നതിലും അപ്പുറമാണ്. അത് ദുബായിലും അബു ദാബിയിലും ഉള്ള എക്സിബിഷന്‍ സെന്ററുകള്‍ ദിനേന കാണുന്ന ഒരു ഗള്‍ഫ് വ്യവസായി ആയ യൂസഫലിക്ക് നല്ലവണ്ണം അറിയാം. ഇങ്ങനെയുള്ള ഒരു എക്സിബിഷന്‍ സെന്ററില്‍ പതിനാലായിരമോ അതിലധികമോ സ്ഥിരം തൊഴിലവസരം കാണും എന്നത് ഒരു മിഥ്യയാണ്. ഉള്ളതില്‍ തന്നെ ഭൂരിഭാഗവും നാലാംതരം തൊഴിലവസരങ്ങള്‍ ആയിരിക്കും. ഉദാഹരണമായി ക്ലീനേഴ്സ്, ഓഫിസ് ബോയ്സ് തുടങ്ങിയവ. അതിനൊട് ചേര്‍ന്നു തുടങ്ങുന്ന ഹയാത്ത് ഹോട്ടല്‍ ഫൈവ് സ്റ്റാര്‍ ഹോട്ടല്‍ ആണ്. അതില്‍ ഉണ്ടാകുന്ന തൊഴിലവസങ്ങള്‍ അത് ഹോട്ടലുകാര്‍ തീരുമാനിക്കും.

ഈ ഒരു എക്സിബിഷന്‍ സെന്ററും ഹോട്ടലും തുടങ്ങി ആ വ്യവസായ ഗ്രൂപ്പിനും മാത്രം ലാഭം ഉണ്ടാക്കാന്‍ വേണ്ടി ബോള്‍ഗാട്ടി ദ്വീപില്‍ ചെറിയ പാട്ടത്തിന് സ്ഥലം വിട്ടുകൊടുക്കുക എന്നത്
ആത്മഹത്യാപരം തന്നെയാണ്. അത് ഇടതുപക്ഷം ആയാലും വലതു പക്ഷം ആയാലും. എല്ലാത്തിനും എന്റെ പക്കല്‍ ഗവണ്മെന്റ് കടലാസുകള്‍ ഉണ്ടെന്ന് പറയുന്ന യൂസഫലി നാട്ടുകാരെ കളിയാക്കുകയാണോ എന്ന് സംശയം. കാരണം ഇത്രയും മുതല്‍ മുടക്കുന്ന ഒരാള്‍ക്ക് പേപ്പറുകള്‍ ഒപ്പിക്കാന്‍ ഒരു വിഷമവും ഉണ്ടാകില്ല എന്ന് ഏത് കൊച്ചു കുട്ടിക്കും അറിയാം. തീരദേശ നിര്‍മ്മാണ നിയമങ്ങളും മാറ്റി മറിച്ച പേപ്പറുകളും അതില്‍ കാണും. ആ പേപ്പര്‍ വര്‍ക്കുകളില്‍ എന്തോ തരികിട ഉള്ളതു കൊണ്ടല്ലേ ഇടതുപക്ഷത്തിന്റെ പിടലിയില്‍ കുറ്റം ചാര്‍ത്തി യൂസഫലി പ്രോജക്റ്റ് അവസാനിപ്പിക്കുന്നതെന്നാണ് എന്റെ സംശയം. അതായത്, ആരെങ്കിലും കുത്തിപ്പൊക്കിയാല്‍ ആ പ്രോജക്ടിന് സ്റ്റേ വരുവാനുള്ള സാധ്യത മുന്നില്‍ കണ്ടു കൊണ്ടൂള്ള ഒരു രക്ഷപെടല്‍ . ഒരു പ്രശ്നവുമില്ലാതെ വെറുതെ ഒരു പ്രോജക്ട് ഉപേക്ഷിക്കാന്‍ മാത്രം വിഡ്ഡിയാണൊ മിസ്റ്റര്‍ യൂസഫലി???

 

ഉമ്മന്‍ ചാണ്ടിയും ഞാനും

ഉമ്മന്‍ ചാണ്ടിയെന്ന വിഗ്രഹം എന്റെ മനസ്സില്‍ ഉടഞ്ഞു കഴിഞ്ഞു. രാഷ്ട്റീയക്കാരന്‍ എന്ന് പറയാന്‍ പോലും കൊള്ളാത്ത രാഹുല്‍ ഗാന്ധിയുടേയും സോണിയാ ഗാന്ധിയുടേയും ഏറാന്‍ മൂളികളായി സ്വന്തം വ്യക്തിത്വത്തെ പോലും തിരിച്ചറിയാന്‍ വയാത്ത കോണ്‍ഗ്രസ് നേതാക്കളുടെ ഇടയില്‍ ഉമ്മന്‍ ചാണ്ടിയെ വേറിട്ട് കാണാന്‍ രാഷ്ട്രീയമല്ലാത്ത ചില കാരണങ്ങള്‍ നേരത്തെ ഉണ്ടായിരുന്നു.


കൊച്ചു പ്രായത്തില്‍, അതായത് നാലാം ക്ലാസിലും അഞ്ചാം ക്ലാസിലും ഒക്കെ പഠിക്കുമ്പോള്‍ ഉമ്മന്‍ ചാണ്ടി എന്നത് അച്ചന്റെ അനിയന്റെ കൂടെ പഠിച്ച ഒരു മന്ത്രിയായിരുന്നു. അതു കൊണ്ട് തന്നെ അന്ന് അങ്ങേരോട് ഭയങ്കര സ്നേഹവും ബഹുമാനവും ഒക്കെ ആയിരുന്നു.

പിന്നെ ഇത്തിരി കൂടി വലുതായപ്പോള്‍ നാട്ടില്‍ ആരു മരിച്ചാലും, അല്ലെങ്കില്‍ ഒരു കല്യാണമുണ്ടെങ്കില്‍ അവിടെയൊക്കെ ഓടിയെത്താന്‍ ശ്രമിക്കുന്ന ഒരു എം.എല്‍.എ എന്ന നിലയില്‍ ആ ബഹുമാനം കൂടിവന്നു. പിന്നീട് ഇത്തിരി കൂടി വലുതായപ്പോള്‍ രാഷ്ട്രീയം ഇത്തിരി ഒക്കെ മനസ്സില്‍ കടന്നു വന്നപ്പോള്‍ എതിര്‍ ചേരിയിലാണെങ്കിലും ഞങ്ങളുടെ മണ്ഢലത്തില്‍ അജയ്യന്‍ എന്ന നിലയില്‍ ഉമ്മന്‍ ചാണ്ടിയോട് എന്നും ബഹുമാനം ആയിരുന്നു.

പക്ഷേ, ഈ ഗവണ്മെന്റിന്റെ സാരഥി ആയതിനു ശേഷം ആ ബഹുമാനം ഒക്കെ പോയി. പത്തു മാസം കൊണ്ട് ഉമ്മന്‍ ചാണ്ടി എന്ന നല്ല രാഷ്ട്രീയക്കാരന്‍, എന്റെ മനസ്സില്‍ കേരളം കണ്ട ഏറ്റവും നാണം കെട്ട മുഖ്യമന്ത്രി ആയി. സ്വന്തം കസേര നില നിര്‍ത്താന്‍ ആരുടെയൊക്കെ കാലു നക്കാനും അങ്ങേര്‍ക്ക് മടിയില്ല എന്ന്‍ മനസ്സിലാക്കിയതിനാലാണത്.

അഞ്ചാം മന്ത്രി എന്ന ലീഗിന്റെ ആവശ്യത്തിന് വഴങ്ങുകയും, അവരുടെ ആവശ്യം നിറവേറ്റി തന്റെ ആവശ്യം സഫലമാക്കന്‍ ആ നാണം കെട്ട മനുഷ്യന്‍ മന്ത്രി സഭയില്‍ നടത്തിയ അഴിച്ചു പണി ഒരു മുഖ്യമന്ത്രിക്ക് എത്ര മാത്രം താഴാന്‍ കഴിയും എന്നതിന്റെ തെളിവായി ഞാന്‍ കാണുന്നു. സാമുദായിക സന്തുലനം എന്നത് പേരിലെങ്കിലും വരുത്താന്‍ വേണ്ടിയെന്ന പോലെ (സാധിക്കുന്നില്ലയെങ്കിലും) സമുദായ സ്ംഘടനകളെ തൃപ്തിപ്പെടുത്താനുള്ള ആ ശ്രമം തികച്ചും അല്പത്തമായി പോയി.

ഇന്നിപ്പോള്‍ മുസ്ലിം ലീഗിന്റെ ഔദാര്യമാണ് ഉമ്മന്‍ ചാണ്ടിയുടെ മുഖ്യമന്ത്രിക്കസേര എന്ന് അവര്‍ തന്നെ വിളിച്ചു പറഞ്ഞിട്ടും യാതൊരു ഉളുപ്പുമില്ലാതെ അതില്‍ ഇരിക്കാനുള്ള ശ്രമം തുടരുന്ന ഉമ്മന്‍ ചാണ്ടീ, നിങ്ങള്‍ എന്നില്‍ അവശേഷിച്ചിരുന്ന ബഹുമാനവും കൂടി കളഞ്ഞു കുളിച്ചു... ഒന്നോ രണ്ടോ ജില്ലകളില്‍ മാത്രം എം എല്‍ എ-മാരെ സൃഷ്ടിക്കാന്‍ കഴിവുള്ള, ഒരു മത സംഘടന പോലെ പ്രവര്‍ത്തിക്കുന്ന രാഷ്ട്രീയ പാര്‍ട്ടിയായ ഇന്ത്യന്‍ നാഷനല്‍ മുസ്ലിം ലീഗ് എന്ന പാര്‍‍ട്ടിയുടെ കുഴലൂത്തുകാരനഅയി താങ്കള്‍ അധ:പതിച്ചു പോയതില്‍ പണ്ടൊക്കെ നിങ്ങനെ ബഹുമാനിച്ചിരുന്ന എനിക്ക് പോലും സഹതാപം തോന്നുന്നു. ആര്യാടന്‍ പറഞ്ഞതു പോലെ സ്വന്തമായി എം എല്‍ എ മാരെ ജയിപ്പിക്കാന്‍ കഴിവുള്ളവരായി ഇന്ന് സി.പി.എമ്മും കോണ്‍ഗ്രസും മാത്രമേ ഉള്ളൂവെന്ന് ഇനി എന്നാണാവോ ഉമ്മന്‍ ചാണ്ടി മനസ്സിലാക്കുന്നത്?


ഇറ്റാലിയന്‍ കപ്പല്‍ കൊലയാളികളെ വിട്ടു കൊടുക്കാന്‍ ഇറ്റാലിയന്‍ മദാമ്മ നടത്തുന്ന നാടകത്തിലെ വിദൂഷകന്റെ വേഷം കൂടി കെട്ടിയാടി തീര്‍ത്താല്‍ പിന്നെ ഉമ്മന്‍ ചാണ്ടിക്ക് മലയാളികളുടെ മനസ്സില്‍ എവിടെയാകും സ്ഥാനം എന്ന് അങ്ങേരുടെ ചുറ്റും നില്‍ക്കുന്ന മനകുണാപ്പന്മാര്‍ എങ്കിലും പറഞ്ഞു കൊടുത്തിരുന്നെങ്കില്‍!

അടുത്ത പ്രാവശ്യം എങ്കിലും ഏതെങ്കിലും നട്ടെലുള്ള ജീവിയെ പുതുപ്പള്ളിയില്‍ നിന്ന് ജയിപ്പിക്കണേയെന്ന് പഴയൊരു പുതുപ്പള്ളീ മണ്ഢലക്കാരനായ ഞാന്‍ പുതുപ്പള്ളിക്കാരോട് അപേക്ഷിച്ചു കൊള്ളുന്നു.

*******************     XX       *******************

അടിക്കുറിപ്പ്:

ശബനം മൗസി എം.പി ആയെങ്കില്‍ അതേ ഗണത്തില്‍ പെട്ട ഒരു മുഖ്യമന്ത്രിയെ ആദ്യമായി സൃഷ്ടിച്ചതില്‍ കേരള ജനതക്ക് അഭിമാനിക്കാം...

മകരവിളക്ക് അപകടം ??

മകരവിളക്ക് മഹോത്സവത്തിനിടയില്‍ ഉണ്ടായ അപകടം നാടിനെയാകെ നടുക്കിയിരിക്കുന്ന ഈ അവസരത്തില്‍ മരിച്ചവരുടെ ബന്ധുക്കളോടുള്ള അനുശോചനങ്ങള്‍ അറിയിക്കട്ടെ.


അതോടൊപ്പം എനിക്കുണ്ടായ ചിന്തകള്‍ പങ്കു വയ്ക്കുന്നു. ഇത് ഇപ്പോള്‍ പറയുന്നത് അനുചിതമായി പോയി എന്ന് പറയുവാന്‍ ഉദ്ദേശിക്കുന്നവരോട് ഒരു അപേക്ഷ... ദയവായി വായിച്ചിട്ട് കമന്റ് ഇടാതിരിക്കുക.

ദിനം തോറും (മണ്ഠല കാലത്ത്) ലക്ഷക്കണക്കിന് ഭക്തര്‍ വരുന്ന കേരളത്തിലെ ഒരേ ഒരു പുണ്യസ്ഥലമാണ് ശബരിമല. സര്‍കാരിനും, പൊതുജങ്ങള്‍ക്ക് പല രീതിയിലും, വരുമാനം ലഭിക്കുന്ന ഒരു തീര്‍ത്ഥാടനമാണ് ശബരിമലയിലേത്. (നാട്ടിലെ നോണ്‍-വെജ് ഹോട്ടലുകള്‍ പോലും "വെജിറ്റേറിയന്‍" ആകുന്ന കാലം) എന്നിട്ടും അടിസ്ഥാന സൗകര്യങ്ങള്‍ ഉള്‍പ്പെടെയുള്ള പലതും സ്ഥാപിക്കുന്നതില്‍ അവിടെ സര്‍ക്കരും, ദേവസ്വം ബോര്‍ഡും അലംഭാവം കാണിക്കുന്നു എന്നൊക്കെയാണ് പല മാധ്യമ റിപോര്‍ട്ടുകളീല്‍ നിന്നും മനസ്സിലായിട്ടുള്ളത്. സുരക്ഷ എന്നാല്‍ 'തീവ്രവാദി' ആക്രമണങ്ങളില്‍ നിന്നുള്ള സുരക്ഷ മാത്രമല്ല എന്ന് ഇപ്പോഴെങ്കിലും മനസ്സിലാക്കിയാല്‍ നന്ന്.

മലയിടിഞ്ഞ് വീണോ, ഉരുള്‍ പൊട്ടലില്‍ അകപ്പെട്ടോ ഭക്തര്‍ മരിച്ചാല്‍ അത് ആരുടെയെങ്കിലും വീഴ്ചയായി കണക്കാക്കാന്‍ കഴിയില്ല. പക്ഷേ ഇന്നലെ നടന്ന പോലെയുള്ള ദുരന്തങ്ങള്‍ ഒരു പരിധി വരെയെങ്കിലും ഒഴിവാക്കാവുന്നതാണ്. വണ്ടിപ്പെരിയാറില്‍ നിന്നും 30-40 ആളുകളെ അകത്തും പുറത്തുമായി ഇരുത്തി ട്രിപ് അടിക്കുന്ന ജീപ്പുകള്‍ അധികാരികളുടെ മുമ്പില്‍ കൂടി തന്നെയാണ് പോകുന്നത്. എന്നിട്ടും അവ യധേഷ്ടം ഓടിക്കൊണ്ടിരിക്കുന്നു. സൗകര്യങ്ങള്‍ ഒന്നുമില്ലാത്ത പുല്‍‌മേട്ടിലേക്ക് എത്ര പേര്‍ കയറി പോകുന്നു എന്നൊന്നും ആരും കണക്കാക്കുന്നില്ല. അഗാധമായ ഗര്‍ത്തങ്ങളിലേക്ക് പതിക്കാതിരിക്കാന്‍ സുരക്ഷ വല്ലതും ഉണ്ടോ എന്നൊന്നും എനിക്കറിയില്ല.

ഇനി, മകരവിളക്ക് എന്നത് ദിവ്യാത്ഭുതം അല്ല എന്ന് കാലാകാലങ്ങളായി പലരും പറയുന്നു. ആദിവാസികള്‍ അനുഷ്ടിച്ചു വന്നിരുന്ന ഒരു ഉത്സവം, അത് 'ആരൊക്കെയോ' ഏറ്റെടുത്ത് നടത്തി ജ്യോതി തെളിയിക്കുന്നു എന്നാണ് ആരോപണം. ആ ആരോപണങ്ങള്‍ നില നില്‍ക്കെ തന്നെ, ലക്ഷക്കണക്കിന് ഭക്തര്‍ അയല്‍ സംസ്ഥാനങ്ങളില്‍ നിന്ന് ഇത് കാണാന്‍ എത്തുന്നു. അവരൊന്നും ഈ ആരോപണങ്ങളെ പറ്റി അറിയുന്നില്ല എന്നാണ് എന്റെ വിശ്വാസം. മകരവിളക്ക് എന്നത് ദൈവീക പ്രഭാവത്താല്‍ തനിയെ തെളിയുന്ന എന്തോ അത്ഭുതം ആണെന്ന് കരുതി തന്നെയാണ് അവര്‍ അവിടെ തടിച്ചു കൂടുന്നത്. ഇനിയെങ്കിലും ഈ ആരോപണങ്ങളെ കുറിച്ച് അന്വേഷണം നടത്തി ആരോപണം ശരിയാണെങ്കില്‍ അത് നിര്‍ത്തലാക്കാനുള്ള നടപടികള്‍ സര്‍ക്കാര്‍ സ്വീകരിക്കണം. ഇനി, ഈ ആരോപണങ്ങള്‍ തെറ്റാണെങ്കില്‍ അത് ഭക്തര്‍ക്കുള്ള ഒരു അനുഗ്രഹമായി കണക്കാക്കമല്ലോ. അത് ഭക്തിയെ കൂടുതല്‍ ഊട്ടിയുറപ്പിക്കുവാന്‍ സഹായകമാകും. പിന്നെന്തിന് ഭക്തര്‍ ഇങ്ങനെ ഒരു അന്വേഷണത്തെ എതിര്‍ക്കണം?

തീര്‍ത്ഥാടനം നിര്‍ത്തണമെന്നൊന്നും ആരും പറയില്ല, പക്ഷേ പോകുന്നവര്‍ തങ്ങളുടെയും കൂടെയുള്ളവരുടേയും കൂടി സുരക്ഷയെ പറ്റി ബോധവാന്മാരായില്ലെങ്കില്‍ ഇനിയും അപകടങ്ങള്‍ ആവര്‍ത്തിച്ചു കൊണ്ടേയിരിക്കും. സര്‍കാരിനും അധികാര കേന്ദ്രങ്ങള്‍ക്കും, പ്രവര്‍ത്തകര്‍ക്കും നിയന്ത്രിക്കാന്‍ കഴിയാത്ത പലതും സ്വയം തടയാന്‍ തീര്‍ത്ഥാടകര്‍ ശ്രമിക്കണം. ഉയരമുള്ള മരങ്ങളിലും, അഗാധമായ കൊക്കയുടെ വക്കത്തും ഒക്കെയിരുന്ന് ജ്യോതി ദറ്ശിക്കാന്‍ പാടു പെടുന്നവര്‍ സ്വയം ശവക്കുഴികള്‍ ഒരുക്കുകയാണെന്ന് കൂടി പറയേണ്ടിയിരിക്കുന്നു. ഭക്തി ആവാം, പക്ഷേ "അന്ധമായ" ഭക്തി അപകടം വരുത്തും.

സര്‍ക്കാര്‍ ജുഡീഷ്യല്‍ അന്വേഷണം എന്ന പ്രഹസനം നടത്താന്‍ ഒരുങ്ങുന്നുണ്ട്. നാലു വര്‍ഷം കഴിയുമ്പോല്‍ കിട്ടുമായിരിക്കും എന്ന് കരുതുന്ന ഒരു സിറ്റിങ് ജഡ്ജ്ജിയേക്കൊണ്ട്  നമുക്ക് അങ്ങനെയൊരു പരിപാടി എന്തിനു നടത്തുന്നു എന്ന് കൂടി ആലോചിക്കുക.

അടുത്ത മണ്ഠല കാലത്തെങ്കിലും നല്ല റോഡുകളും നല്ല സുരക്ഷാ സം‌വിധാനങ്ങളുമായി മല കയറുവാന്‍ അയ്യപ്പ ഭക്തര്‍ക്ക് കഴിയട്ടെ എന്ന് ആത്മാര്‍ത്ഥമായി ആഗ്രഹിച്ചു പോകുന്നു.

അടിക്കുറിപ്പ്

പ്ലാസ്റ്റിക് നിരോധിത മേഖല എന്ന് പറയുന്ന ശബരിമലക്കാടികളിലൂടെ ഇരുമുടിക്കെട്ടിന്റെ മുകളില്‍ കൂടി പ്ലാസ്റ്റിക് മഴക്കോട്ടുമിട്ട്, പ്ലാസ്റ്റിക് കുപ്പിയില്‍ മിനറല്‍ വാട്ടറുമായി പോകുന്ന അയ്യപ്പന്മാരെയും ടെലിവിഷനില്‍ കണ്ടു.

വിവാഹപ്രായം 30 ആക്കണം (എന്റെ വിവാഹം കഴിഞ്ഞതാ..)

കുറെ നാള്‍ കൂടി ഒരു പോസ്റ്റ് ഇടണമെന്ന് തോന്നിയത് വനിതാ കമ്മീഷന്റെ പുതിയ കണ്ടുപിടുത്തത്തെ പറ്റി കേട്ടപ്പോഴാണ്. വിവാഹപ്രായം ഇരുപത്തഞ്ചാക്കണമെന്ന് ദേശീയ വനിതാ കമ്മീഷനോട് ഇവര്‍ ആവശ്യപ്പെടുവാന്‍ തീരുമാനിച്ചിരിക്കുന്നു.


ഇരുപത്താറാം വയസില്‍ ഞാന്‍ കല്യാണം കഴിക്കുമ്പോള്‍ എന്റെ ഭാര്യക്ക് ഇരുപത് വയസ്സായിരുന്നു പ്രായം. നാളുകള്‍ കുറെ കഴിഞ്ഞു. പക്വത കുറഞ്ഞു പോയി എന്ന കാരണത്താല്‍ ഞങ്ങള്‍ക്കിടയില്‍ പ്രശ്നങ്ങള്‍ ഒന്നുമുണ്ടായതായി എനിക്കിതു വരെ തോന്നിയിട്ടില്ല. ഇതു വരെ ഒരു വിവാഹ മോചനത്തെ പറ്റി ചിന്തിച്ചിട്ടുമില്ല.

ഇരുപത്തഞ്ച് വയസാകാതെ പക്വത വരില്ല എന്നാണ് വനിതാ കമ്മീഷന്‍ അംഗങ്ങളുടെ കണ്ടെത്തല്‍. ഈ കണ്ടെത്തല്‍ നടത്തിയ കമ്മീഷന്‍ അംഗങ്ങളില്‍ എത്ര പേര്‍ വിവാഹം കഴിച്ചിട്ടുണ്ടെന്നോ അതില്‍ എത്ര പേര്‍ ഇരുപത്തഞ്ച് വയസ്സിനു ശേഷം വിവാഹം കഴിച്ചു എന്നോ എനിക്കറിയില്ല. ഏതായാലും ഇതിലും ബാലിശമായ ഒരു തീരുമാനം ഞാന്‍ ഈയിടെ ഒന്നും കേട്ടിട്ടില്ല.

ഒരാള്‍ക്ക് വിവാഹം കഴിക്കാന്‍ പക്വത വന്നോ എന്ന് തീരുമാനിക്കാന്‍ ആര്‍ക്കാണ് അവകാശം? ബാല വിവാഹം തടയാന്‍ നിയമങ്ങള്‍ ഇപ്പോള്‍ തന്നെ നമ്മുടെ നാട്ടിലുണ്ട്. പതിനെട്ട് എന്നുള്ളത് ഇരുപത് എന്നാക്കി മാറ്റാന്‍ ശുപാര്‍ശ ചെയ്താല്‍ കുറച്ചൊക്കെ മനസ്സിലാക്കാമയിരുന്നു. ഇരുപത്തഞ്ച് എന്ന് പറയുന്നതാണ് മനസ്സിലാക്കാന്‍ ബുദ്ധിമുട്ടുള്ളത്. ഇരുപത്തി നാലു വയസ്സു വരെ വരാത്ത എന്ത് പക്വത ആണ് ഇരുപത്തഞ്ച് ആകുമ്പോള്‍ കിട്ടുക?

ഇരുപത്തഞ്ച് വയസ്സില്‍ കല്യാണം കഴിഞ്ഞ് ഇരുപത്തെട്ടിലോ, മുപ്പതിലോ കുട്ടികളുണ്ടായി അവര്‍ക്ക് കല്യാണ പ്രായമാകുമ്പോഴേക്കും സ്വന്തം ജീവിതം അവസാന ഘട്ടത്തില്‍ എത്തിയിരിക്കും. ഇനി മുതല്‍ മുത്തശ്ശി-മുത്തശ്ശന്മാര്‍‍ എന്നൊരു സംഭവം ഉണ്ടാകാന്‍ സാധ്യത ഇല്ല എന്നു തോന്നുന്നു. കുട്ടികളുടെ കുട്ടികളുടെ കല്യാണം കാണാനുള്ള ഭാഗ്യം ആര്‍ക്കൊക്കെ കാണുമോ എന്തോ?

ഈ തീരുമാനം എടുത്ത അംഗങ്ങള്‍ എല്ലാവരുടെയും കാര്യങ്ങള്‍ കഴിഞ്ഞവരാണ് എന്നു വിശ്വസിക്കുന്നു. അവരുടെ മക്കളുടെ വിവാഹം എത്ര വയസ്സില്‍ കഴിഞ്ഞു എന്നും അവരില്‍ എത്ര പേര്‍ വിവാഹമോചനം നേടി വീട്ടിലിരിക്കുന്നു എന്നു കൂടി വെളിപ്പെടുത്തിയാല്‍ നന്നായിരുന്നു. ഇനി അതല്ല അവരുടെ വീടുകളില്‍ പക്വതയില്ലായ്മ കൊണ്ടുണ്ടായ പ്രശ്നങ്ങള്‍ എന്തൊക്കെയായിരുന്നു എന്നെങ്കിലും പറയാമായിരുന്നു.

പറഞ്ഞു വന്നത്, പ്രായമല്ല മറിച്ച് വളര്‍ന്നു വരുന്ന സാഹചര്യവും, വളര്‍ത്തുന്ന രീതിയും, മാതാപിതാക്കളുടെ സമീപനവും ഒക്കെയാണ് ഒരു കുട്ടിയുടെ സ്വഭാവത്തെയും പക്വതയെയും ഒക്കെ രൂപപ്പെടുത്തുന്നതും അത് സമൂഹത്തിനു മുമ്പില്‍ എത്തിക്കുന്നതിനും മൂല കാരണമായി വരുന്നത്. വളര്‍ത്തു ദോഷം ഉള്ള കുട്ടികള്‍ ഇരുപത്തഞ്ചല്ല, മുപ്പതായാലും പക്വത ആര്‍ജ്ജിക്കില്ല.

വിവാഹ പ്രായം കൂട്ടുന്നതിനല്ല, മറിച്ച് നിലവിലുള്ള പ്രായത്തില്‍ തന്നെ പെണ്‍ കുട്ടികള്‍ക്കും ആണ്‍ കുട്ടികള്‍ക്കും വിവാഹത്തെ കുറിച്ചും കുടുംബ ജീവിതത്തെ കുറിച്ചും സമൂഹ ജീവിതത്തെ കുറിച്ചും വ്യക്തമായ അറിവ് നേടി കൊടുക്കാന്‍ വേണ്ട കാര്യങ്ങള്‍ ചെയ്യുകയാണ് വേണ്ടത്.

ഇങ്ങനെയും ഫത്വ...

ജനങ്ങള്‍ക്ക് മുഴുവന്‍ (പ്രത്യേകിച്ച് പുരുഷന്മാര്‍ക്ക് ) ഉപകാരപ്രദമായ  ഒരു ഫത്വ സൗദി സ്ത്രീകള്‍ മുതലാക്കാന്‍ ഒരുങ്ങുന്നു എന്നു വാര്‍ത്ത. Shaikh Abdul Mohsin Bin Nasser Al Obaikan എന്ന പണ്ഠിതന്‍ പുറപ്പെടുവിച്ച ഫത്വ എന്തെന്നു വച്ചാല്‍ "സ്ത്രീകളും അവരുടെ പെണ്‍‌മക്കളുമായി അടുത്തിടപഴകാന്‍ തങ്ങളുടെ ഡ്രൈവര്മാരെ പ്രാപ്തരാക്കാന്‍ സ്ത്രീകള്‍ ഡ്രൈവര്‍മാരെ സ്വന്തം മുലയൂട്ടണം" എന്നാണ്. അങ്ങനെ ചെയ്യുക വഴി ഡ്രൈവര്‍മാര്‍ ആ സ്ത്രീകള്‍ക്ക് മകനെ പോലെയാകും പോലും.. ഓരോരോ നിയമങ്ങളേ.. അങ്ങനെയായാല്‍ പിന്നെ പെണ്മക്കള്‍ക്ക് അയാള്‍ ആങ്ങളയായി. അപ്പോള്‍ പിന്നെ അവര്‍ക്ക് അയാളുമായി തുറന്നിടപെടുന്നതിന് ഇസ്ലാം നിയമത്തില്‍ വിലക്കുകളില്ലല്ലൊ...

സൗദിയില്‍ സ്ത്രീകള്‍ക്ക് ഈ ഇരുപത്തൊന്നാം നൂറ്റാണ്ടിലും ഡ്രൈവിങ് ലൈസന്‍സ് നിഷിദ്ധമാണ്. സ്ത്രീകള്‍ക്ക് ഡ്രൈവര്‍മാരോടൊപ്പം പുറത്തു പോകാന്‍ വിലക്കുകളും ഉണ്ട്. അപ്പോള്‍ പിന്നെ ഇതല്ലാതെ ഒരു മാര്‍ഗ്ഗവും ആ പണ്ഠിതന്‍ കണ്ടില്ല. ഇങ്ങനെ ചെയ്താലും കുഴപ്പമില്ല, "സ്ത്രീകള്‍ക്ക് ലൈസന്‍സ് കൊടുക്കുന്ന പ്രശ്നമേ ഇല്ല".

സ്ത്രീകളും അടങ്ങിയിരിക്കാന്‍ പോകുന്നില്ല എന്നാണ് അറിഞ്ഞത്. ഇനിയെങ്കിലും ലൈസന്‍സ് കിട്ടിയില്ലെങ്കില്‍ തങ്ങളുടെ ഡ്രൈവര്‍മാര്‍ക്ക് മുല കൊടുത്ത് മക്കളാക്കും എന്നാണവര്‍ ഭീഷണി മുഴക്കിയിരിക്കുന്നത്. അതിനായി മുദ്രാവാക്യം തന്നെ ഉണ്ടാക്കിയിരിക്കുന്നു.. "We either be allowed to drive or breastfeed foreigners,". നല്ല മൂവ്‌മെന്റ്...

ഗള്‍ഫ് ന്യൂസില്‍ വന്ന വാര്‍ത്തയില്‍ പറഞ്ഞിരിക്കുന്നത് ഈയൊരു ഫത്വ തികച്ചും പരിഹാസ്യമാണെന്നാണ്. സൗദി പൗരന്മാരുടെ തന്നെ സംശയം കേട്ടാല്‍ ഇതു തികച്ചും ശരിയാണെന്നാണ് തോന്നുന്നത്. ഒരാളുടെ സംശയം 'ഇങ്ങനെ മുല കൊടുക്കുന്നത് ഭര്‍ത്താവിന്റെ മുമ്പില്‍ വച്ചു വേണോ അതോ ഭര്‍ത്താവില്ലാത്തപ്പോള്‍ വേണോ' എന്നാണ്. ഇനിയൊരാളുടെ പേടി ഭര്‍ത്താവില്ലാത്തപ്പോള്‍ ഇതു ചെയ്യുന്നതിനിടയില്‍ ഭര്‍ത്താവ് കയറി വന്നാല്‍ ആ ഭാര്യയെ ആരു രക്ഷിക്കും എന്നാണ്.

കലികാലം... അല്ലാതെന്തു പറയാന്‍?..

ഇതൊക്കെ കേള്‍ക്കുമ്പോള്‍ ഒരു സംശയം. ഭാര്യമാരുടെ മുല കുടിച്ചിട്ടുള്ള ഭര്‍ത്താക്കന്മാര്‍ ഈ നിയമ പ്രകാരം ഭാര്യമാര്‍ക്ക് മകനായി മാറുമോ? അങ്ങനെ വന്നാല്‍..................

സ്വകാര്യ ഇന്‍ഷുറന്‍സ് മേഖല കെണിയോ ?

കഴിഞ്ഞ ആഴ്ച മനോരമയില്‍ വന്ന ഒരു ലേഖനവും - "എന്നാലും എന്റെ ഇന്‍ഷുറന്‍സ് സുന്ദരീ...". (ലേഖനം എന്നു പറയാമോ അതോ കഥ എന്ന് പറയണോ എന്നറിയില്ല ) അതിലെ കമന്റുകളും വായിച്ചപ്പോള്‍ ഇന്‍ഷുറന്‍സ്‌ ഏജന്റുമാര്‍ ആണ് കേരളത്തിലുള്ളതില്‍ വച്ചേറ്റവും നികൃഷ്ടരെന്നു തോന്നി. ഒരാള്‍ ഒരു കഥ എഴുതിയതായാണ് എനിക്ക്‌ തോന്നിയത്‌. പക്ഷേ ഗള്‍ഫില്‍ ജീവിക്കുന്ന ചിലര്‍ അതിനെഴുതിയ കമന്റ്‌ വായിച്ചപ്പോഴാണ് ജിവിക്കാന്‍ വേണ്ടി തങ്ങളുടെ ജോലി ചെയ്യുന്ന ഏജന്റുമാരെ അടച്ചാക്ഷേപിച്ചിരിക്കുന്നത്‌ കണ്ടത്‌.

അവധിക്കു നാട്ടില്‍ ചെല്ലുന്ന പ്രവാസികള്‍ക്ക്‌ പലപ്പോഴും ഇത്തരം ഏജന്റുമാര്‍ ഒരു ബുദ്ധിമുട്ടായി തോന്നാറുണ്ടെന്നത്‌ നേരു തന്നെ. പക്ഷേ ആവശ്യവും കഴിവുമുണ്ടെങ്കില്‍ മാത്രമേ ഇത്തരം ഇന്‍ഷുറന്‍സ്‌ എടുക്കേണ്ടതുള്ളു. തങ്ങള്‍ക്ക്‌ ആവശ്യമില്ലെങ്കില്‍ അല്ലെങ്കില്‍ പ്രീമിയം അടക്കാന്‍ കഴിയില്ല എന്ന് തോന്നിയാല്‍ അവരെ നല്ല വാക്ക്‌ പറഞ്ഞ്‌ ഒഴിവാക്കമല്ലോ.

ഇന്‍ഷുറന്‍സ്‌ മേഖല ഇന്ന് ഒരു ഇന്‍വെസ്റ്റ്‌മന്റ്‌ മേഖലയായി മാറിയിരിക്കുന്നു എന്നത്‌ വസ്തുതയാണ്. സ്വകാര്യ-വിദേശ ഇന്‍ഷുറന്‍സ്‌ കമ്പനികള്‍ അധികവും മാര്‍ക്കറ്റ്‌ ബേസ്ഡ്‌ ഇന്‍വെസ്റ്റ്‌മന്റ്‌ പോളിസികള്‍ ആണ് ഉപഭോക്താക്കള്‍ക്ക്‌ നല്‍കുന്നത്‌. അത്‌ എപ്പോഴും റിസ്ക്‌ അടങ്ങിയതായിരിക്കും. ഒരു റിസ്കും ഇല്ലാതെ വെറുതെ ഇരട്ടി കാശ്‌ തരാം എന്നാരെങ്കിലും പറഞ്ഞാല്‍ വിശ്വസിക്കുന്നവരെ പറഞ്ഞിട്ട്‌ കാര്യമില്ല. അവര്‍ പിന്നീട്‌ കാശ്‌ പോയി എന്ന് വിലപിച്ചിട്ട്‌ കാര്യമില്ല. അതിന്‍ ഏജന്റുമാരെ കുറ്റം പറഞ്ഞിട്ടും കാര്യമില്ല എന്നാണ്‍ എനിക്കു തോന്നുന്നത്‌.

പ്രസ്തുത ലേഖനത്തില്‍ പറഞ്ഞിരിക്കുന്ന പ്രകാരം പോളിസി എടുത്തവന് കാശ് പോയതില്‍ ഒരു സങ്കടവും തോന്നേണ്ടതില്ല. അതു പോലെ എല്ലാ ഏജന്റുമാരും അയാള്‍ പറയുന്ന തരക്കാരുമല്ല.
 
പലപ്പോഴും ഏജന്റുമാര്‍ മുഴുവന്‍ കാര്യങ്ങളും പറഞ്ഞു തരുന്നില്ല എന്നത്‌ കാര്യമാണ്. അവര്‍ക്ക്‌ അതിലുള്ള അജ്ഞത ആണ് അതിന്റെ കാര്യം. പലര്‍ക്കും നെറ്റ്‌ വഴി ഈ ഫണ്ട്‌ എങ്ങനെ കൈകാര്യം ചെയ്യാം എന്ന് പോലും അറിയില്ല. ഐ.സി.ഐ.സി.ഐ പോലെയുള്ള സ്വകാര്യ ഇന്‍ഷുറന്‍സ്‌ സ്ഥാപനങ്ങള്‍ സ്വന്തം ഫണ്ട്‌ തങ്ങള്‍ക്കിഷ്ടമുള്ള രീതിയില്‍ "സ്വിച്ച്‌" ചെയ്യാനുള്ള സ്വാതന്ത്ര്യം ഉപഭോക്താവിനു നല്‍കുന്നുണ്ട്‌. കുറച്ചൊരു ശ്രദ്ധ മാര്‍ക്കറ്റില്‍ ഉണ്ടെങ്കില്‍ സ്വന്തം കാശ്‌ നഷ്ടമാകാതെ നോക്കാം. ഇതൊന്നും നോക്കാന്‍ കഴിയാതെ കാശ്‌ ഇരട്ടിയാകും എന്നൊക്കെ വിചാരിച്ചിരുന്നാല്‍ മാര്‍ക്കറ്റില്‍ ഇടിവുണ്ടാകുമ്പോള്‍ ചിലപ്പോള്‍ കാശ്‌ പോയെന്നിരിക്കും. പക്ഷേ തിരികെ പഴയപോലെ ആകുകയും ചെയ്യും. ആഗോള തലത്തില്‍ സാമ്പത്തിക മാന്ദ്യം ബാധിച്ച കഴിഞ്ഞ വര്‍ഷം പലര്‍ക്കും ഇങ്ങനെ കാശ്‌ പോയിട്ടുണ്ടാകാം. പക്ഷേ അവര്‍ക്കൊക്കെയും തന്നെ ഇപ്പോള്‍ പഴയ നിലയിലേക്ക്‌ എത്തിയിട്ടുണ്ടാകാം. അല്ലെങ്കില്‍ എത്താറായിട്ടുണ്ടാകാം. ആ നഷ്ടം ഏജന്റുമാരുടെ തലയില്‍ കെട്ടി വയ്ക്കുന്നത്‌ ശരിയല്ല. കാരണം ഇങ്ങനെ ഒരു തകര്‍ച്ച ആരും മുന്നില്‍ കണ്ടതല്ലല്ലോ.

ഇങ്ങനെ ഒക്കെ ആണെങ്കിലും ഒന്നു വച്ചാല്‍ പത്തു കിട്ടുമെന്ന വാക്ക്‌ വിശ്വസിച്ച്‌ എടുത്തു ചാടരുത്‌ എന്ന് കൂടി പറയട്ടെ. എടുക്കുന്ന പോളിസിയെ കുറിച്ചു അത്‌ എങ്ങനെ കൈകാര്യം ചെയ്യാം എന്നും സ്വയം മനസ്സിലാക്കാന്‍ ശ്രമിക്കുക. എന്നിട്ട്‌ മാത്രം യൂണിറ്റ്‌ ലിങ്ക്ഡ്‌ പോളിസികള്‍ എടുക്കുക.

ഇന്‍ഷുറന്‍സ്‌ പോളിസി എടുക്കുന്നതിനെ വരെ നിശിതമായി വിമര്‍ശിച്ചവരെ അതിന്റെ കമന്റുകള്‍ക്കിടയില്‍ കണ്ടു. തന്റെ മൂന്നു തലമുറക്കു വരെ സമ്പാദിച്ചു വച്ചിരിക്കുന്നവരെ ഒഴിച്ചു നിര്‍ത്തിയാല്‍ ഒരു ഇന്‍ഷുറന്‍സ്‌ എങ്കിലും എടുത്തിട്ടില്ലാത്തവര്‍ ബുദ്ധിശൂന്യതയാണ് ചെയ്യുന്നത്‌ എന്ന് തോന്നുന്നു. പെട്ടെന്നുള്ള ഒരു അത്യാഹിതം സകല കണക്കു കൂട്ടലുകളും പിഴപ്പിക്കുന്ന ചില സന്ദര്‍ഭങ്ങള്‍ ഉണ്ട്‌. ആ സന്ദര്‍ഭത്തില്‍ തന്റെ ഉറ്റവര്‍ക്ക്‌ ഒരു സഹായം ആകും എന്നുറപ്പുണ്ടെങ്കില്‍ ഒരു പോളിസി എടുക്കുന്നതില്‍ എന്താണ് തെറ്റ്‌ എന്ന് മനസ്സിലാകുന്നില്ല.

ഏതായാലും സ്വകാര്യ ഇന്‍ഷുറന്‍സ് മേഖല കെണിയാനെന്ന് എനിക്കു തോന്നുന്നില്ല... കാരണം തീരുമാനമെടുക്കാന്‍ നമുക്ക് സ്വാതന്ത്ര്യം ഉണ്ടല്ലോ !!!!

::::::::::::::::::  അടിക്കുറിപ്പ്‌  :::::::::::::::::::

ഞാന്‍ ഒരു ഇന്‍ഷൂറന്‍സ്‌ ഏജന്റല്ല. മൂന്നാലു പോളിസികള്‍ കയ്യില്‍ ഉണ്ട്‌. വലിയ നഷ്ടമൊന്നും ഉണ്ടായിട്ടില്ല. എന്നാല്‍ ചെറിയ ലാഭം ഉണ്ടുതാനും..

IPL - കേരള ടീം കേരളത്തിന്റെ സ്വത്ത് ??

ഐ പി എല്‍ കേരള ടീം കേരളത്തിന്റെ ആവശ്യമോ അതോ ശ്രീ തരൂരിന്റെ ആവശ്യമോ എന്നത്‌ ഇപ്പോള്‍ സംശയമായിരിക്കുന്നു. കാരണം കേരളത്തിന്റെ ആവശ്യമാണെന്ന് ശശി തരൂരിന്റെ ആരാധകരും അദ്ദേഹത്തിന്റെ അടുത്ത സുഹൃത്തുക്കളും സ്റ്റാഫും ഒക്കെ പറയുന്നു. കേരള ടീം എങ്ങനെ കേരള ജനതയുടെ ആവശ്യമായെന്ന് എനിക്കൊട്ടും മനസ്സിലാകുന്നില്ല. കേരള ടീം വന്നാല്‍ വികസനം വരുമെന്നൊക്കെ പറയുന്നത് കേട്ടു. പട്ടിണി അകറ്റാനും തൊഴിലില്ലായ്മ ഇല്ലാതാക്കനും ഈ ടീം വരുന്നതു കൊണ്ടായെങ്കില്‍ നല്ലതു തന്നെ.

ഈ ടീമുകൊണ്ട് കേരളത്തിനുണ്ടാകുന്ന ലാഭത്തെ പറ്റി പുറമെ ചിന്തിച്ചാല്‍,
1. കേരളത്തിന്റെ പേരില്‍ ഒരു ടീം ഉണ്ടായാല്‍ നാം മലയാളികള്‍ക്ക്‌ സപ്പോര്‍ട്ട്‌ ചെയ്യാന്‍ ഒരു ടീം ആകും,

2. കളി നടക്കുന്ന സീസണില്‍ കൊച്ചിയിലും പരിസരത്തുമുള്ള ബിസിനസ്സുകാര്‍ക്കും കച്ചവടക്കാര്‍ക്കും കുറച്ച്‌ ലാഭം ഉണ്ടാകും.

3. സര്‍ക്കാരിനു നികുതി ഇനത്തില്‍ കുറച്ച്‌ പൈസ കിട്ടും.

4. നമ്മുടെ കളിക്കാരില്‍ നാലഞ്ച്‌ പേര്‍ക്ക്‌ അന്താരാഷ്ട്ര നിലവാരത്തിലുള്ള കളിക്കാരോടൊപ്പം കളിക്കാനും കുറച്ച്‌ കാശ്‌ സമ്പാദിക്കാനും കഴിയും.

ഇനി നഷ്ടങ്ങളെ കുറിച്ചാണെങ്കില്‍,

1. കളി നടക്കുന്ന ദിവസങ്ങളില്‍ കൊച്ചിയിലുള്ള ജനങ്ങള്‍ ട്രാഫിക്‌ ജാമിലും തിരക്കിലും വലയും.

2. തുടര്‍ച്ചയായി കളി നടക്കുന്നതിനാല്‍ ആ നാളുകളില്‍ പല മേഘലകളിലും പ്രൊഡക്റ്റിവിറ്റി കുറയും. (ഇത്‌ ഇല്ലെങ്കില്‍ കൂടുമോ എന്നൊന്നും ചോദിക്കരുത്‌.)

3. നികുതി കിട്ടുമെങ്കിലും സെക്യൂരിറ്റി ഇനത്തിലും മറ്റു ചിലവുകള്‍ക്കായും കുറെയേറെ ചിലവാകും.

ഇതൊക്കെയാണ്‍ ഒറ്റ നോട്ടത്തില്‍ എനിക്ക്‌ മനസ്സിലായത്‌. 1533 കോടി രൂപ മുടക്കി ഒരു ടീം വാങ്ങിയവര്‍ അത്‌ കേരളത്തിന് വേണ്ടിയാണ് വാങ്ങിയതെന്നൊന്നും വിശ്വസിക്കാന്‍ ഞാനില്ല. ഇപ്പോഴത്തെ അവസ്ഥയില്‍ വടക്കേ ഇന്ത്യക്കാര്‍ കേരളത്തിനെതിരെ പടക്കു വന്നിരിക്കുന്നു എന്നൊക്കെയാണ് വരുത്തി തീര്‍ത്തിരിക്കുന്നതെന്ന് തോന്നുന്നു. അവരുടെ സമരം ശശി തരൂരിനെതിരെയല്ല, മറിച്ച്‌ കേരളത്തിനെതിരെ ആണെന്നാണ് ഇന്നത്തെ പത്രത്തില്‍ ഒരു വാര്‍ത്ത കണ്ടത്‌.

ഏതായാലും 1533 കോടി രൂപ കേരളത്തിനു വേണ്ടി എവിടെ നിന്നു വന്നുവെന്നൊന്നും അഭ്യസ്ഥ വിദ്യരായ, സമ്പന്നരായ മലയാളികള്‍ ചിന്തിക്കുന്നില്ല എന്നത്‌ നല്ലതു തന്നെ !! പക്ഷേ അത്‌ മുടക്കിയവരും അതിനു പിന്നില്‍ പ്രവര്‍ത്തിച്ചവരും ലാഭം കിട്ടാനല്ലാതെ മലയാളികളെ ക്രിക്കറ്റിന്റെ ആവേശ കൊടുമുടിയില്‍ എത്തിക്കാനാണെന്നൊക്കെ പറയുന്നത്‌ വെറുതെയാണെന്ന് എനിക്കു തോന്നുന്നു.

ഒരു പൊതുപ്രവര്‍ത്തകന്റെ ജീവിതം തുറന്ന പുസ്തകമായില്ലെങ്കിലും ഇടക്കൊക്കെ തുറന്നു നോക്കാവുന്നതായിരിക്കണം എന്നാണ് എനിക്ക് തോന്നുന്നത്.

എം എഫ് ഹുസൈന്‍... കഷ്ടം! ! .. ഇത് വേണ്ടായിരുന്നു.

എം എഫ് ഹുസൈന്‍ .. നിങ്ങളെ ഞാന്‍ എഴുതി തള്ളുന്നു. തൊണ്ണൂറ്റഞ്ചാം വയസ്സില്‍ ഇന്ത്യന്‍ പൗരത്വം ഉപേക്ഷിച്ച ആ മനസ്സിനെ ഓര്‍ത്ത് ഞാന്‍ ലജ്ജിക്കുന്നു. താങ്കളുടെ ജീവന് ഇനി എന്ത് ഭീഷണി. ജീവിച്ച് കൊതി തീരാത്ത മനസ്സായിരുന്നോ അത്? ഇനിയും സമയമുണ്ട്. താങ്കള്‍ക്ക് ആ തീരുമാനം മാറ്റാം.

എന്തൊക്കെ പ്രതി ബന്ധങ്ങള്‍ ഉണ്ടായാലും എം എഫ് ഹുസൈന്‍ ഇന്ത്യന്‍ പൗരന്‍ ആയിരുന്നാല്‍ അദ്ദേഹത്തെ ഞാന്‍ ബഹുമാനിക്കും. സ്വന്തം ഇഷ്ടപ്രകാരം ജോലി സംബന്ധമായി ജീവിതം പറിച്ചു നടുന്നവരും, പാശ്ചാത്യ ജീവിതം ഇഷ്ടപെടുന്നതിന്റെ പേരില്‍ വിദേശത്ത് കുടിയേറുന്നവരും ധാരാളം ഉണ്ട്. പക്ഷേ ഇത് അങ്ങനെ ആണെന്ന് തോന്നുന്നില്ല. ഒരു കലാകാരന്‍ എന്ന നിലയില്‍ ഇന്ത്യയില്‍ ഇത്ര നാളും അറിയപ്പെട്ടിരുന്ന എം. എഫ് ഹുസൈന്‍ ഇനി എന്തായിരിക്കും ഇന്ത്യാക്കാര്‍ക്ക്? എന്റെ നാടിനെ തള്ളീപ്പറയുന്നതിന് തുല്യമായി,ഉപേക്ഷിച്ച ഒരാള്‍.

രണ്ടര വര്‍ഷം മുമ്പ് അദ്ദേഹത്തെ എതിര്‍ത്ത് രാഹുല്‍ ഒരു പോസ്റ്റ് ഇടുമ്പോള്‍ എം എഫ് ഹുസൈന്‍ എന്ന കലാകാരനെ തള്ളിപ്പറയാന്‍ തോന്നിയിരുന്നില്ല. അതൊക്കെ അദ്ദേഹത്തിന്റെ ആവിഷ്കാര സ്വാതന്ത്ര്യം എന്നു കരുതി. അന്ന്‍ അദ്ദേഹം വരച്ച ചിത്രങ്ങള്‍ ആരെയും അപമാനിക്കുന്നതായി തോന്നിയിരുന്നില്ല. പക്ഷേ ഇന്ന് അദ്ദേഹം എന്നെ പോലെ ചിന്തിച്ച പലരെയും അപമാനിതനാക്കിയിരിക്കുന്നു എന്ന് തോന്നിപ്പോകുന്നു. തന്റെ സൃഷ്ടികളുടെ പേരില്‍ ഉണ്ടായിരിക്കുന്ന വിവാദങ്ങളെ നേരിടാന്‍ വയ്യെങ്കില്‍ പിന്നെന്തിന് ഈ പണിക്ക് പോയി? അതും ഈ പ്രായത്തില്‍ അദ്ദേഹം എന്തിനെ ഭയക്കണം? സ്വന്തം ജീവനെയോ?

ഗള്‍ഫ് രാജ്യങ്ങളില്‍ ഒരു ജീവിതം മുഴുവന്‍ ഹോമിക്കുന്നവര്‍ക്ക് പോലും അവിടെ പൗരത്വം കിട്ടാത്ത സാഹചര്യത്തില്‍ ഇദ്ദേഹത്തിന് എന്തിനവര്‍ പൗരത്വം കൊടുക്കുന്നു എന്ന് കൂടി ചിന്തിച്ചു പോകുന്നു. അതിലെ രാഷ്ട്രീയം തീരെ മനസ്സില്‍ പിടിക്കുന്നില്ല. നമ്മുടെ രാജ്യം ഇദ്ദേഹത്തെ പോലെയുള്ള കലാകാരന്മാര്‍ക്ക് സുരക്ഷിതമല്ല എന്നാണോ ഇതില്‍ നിന്ന് മനസ്സിലാക്കേണ്ടത് ? ഇദ്ദേഹത്തിന്റെ ഖത്തര്‍ പൗരത്വത്തെ അനുകൂലിക്കുന്ന ധാരാളം ആളുകളുണ്ടാവാം. എനിക്കെന്തോ ദഹിക്കുന്നില്ല, അത്ര തന്നെ.

ഈ പഴയ (ചെറിയ) പോസ്റ്റില്‍‍ ഞാന്‍ പറഞ്ഞത് തന്നെ വീണ്ടും പറയുന്നു.
"എനിക്ക് പ്രിയപ്പെട്ടത് എന്റെ കേരളവും അതുള്‍പ്പെടുന്ന എന്റെ ഇന്ത്യയും തന്നെയാണ്. അതില്‍ ഞാന്‍ അഭിമാനിക്കുന്നു."

:: വാല്‍ക്കഷണം ::

ഇനി ഇവര്‍ തസ്ലീമ നസ്രീന് കൂടി പൗരത്വം കൊടുത്തിരുന്നെങ്കില്‍ !! അവരും ഒരു പാവം കലാകാരിയല്ലേ ..

സമര ഭീഷണിയുമായി വീണ്ടും ..

വൈദ്യന്മാര്‍ വീണ്ടും സമരം ചെയ്യുമെന്ന് ഭീഷണിപ്പെടുത്തിയിരിക്കുന്നു. ഇവര്‍ ഇങ്ങനെ തുടങ്ങിയാല്‍ എന്തു ചെയ്യും? എതിക്സ് എന്നൊന്നും പറഞ്ഞ് ഇവന്മാരെ നിലക്ക് നിര്‍ത്താനാവില്ല. കാരണം കാശിനോടുള്ള വെറി പിടിച്ച ചില ഭ്രാന്തന്മാരുടെ കൂട്ടമാണിവരുടെ സംഘടനാ തലപ്പത്തിരിക്കുന്നവര്‍. അവര്‍ക്കെവിടെ എതിക്സ്? നല്ലവരായ ഡോക്ടര്‍‌മാരുടെ വില കൂടി കളയുന്ന കൂട്ടങ്ങള്‍.

കഴിഞ്ഞ ദിവസം അവരുടെ നേതാവിനെ തന്നെ സസ്പെന്റ് ചെയ്തപ്പോള്‍ ആ മാന്യ ദേഹം പറഞ്ഞത് അദ്ദേഹം അപേക്ഷിച്ചിട്ടു പോലും അദ്ദേഹത്തെ സര്‍‌വിസില്‍ നിന്നും പിരിഞ്ഞു പോകാന്‍ അനുവദിച്ചില്ല എന്നാണ്. പക്ഷേ . മെഡിക്കല്‍ കോളേജ് പ്രൊഫസര്‍ എന്ന പേരുള്ളതു കൊണ്ടാണ് അദ്ദേഹത്തെ കാണാന്‍ രോഗികള്‍ വരുന്നതെന്ന് അദ്ദേഹം മറന്നുവെന്നു തോന്നുന്നു. അല്ലെങ്കില്‍ ഈ പോകുന്ന ജനങ്ങളുടെ പട്ടി പോയെനെ. അതു മനസ്സിലാക്കിയാല്‍ ഈ പറയുന്ന ഭിഷഗ്വര ശ്രേഷ്ടന്മാര്‍ക്കൊക്കെ കൊള്ളാം. അത് ഓര്‍മിപ്പിക്കാന്‍ സര്‍ക്കാരും മടിക്കരുത്. സമരം ചെയ്യും എന്ന് പറയുന്നവര്‍ സമരം തുടങ്ങുമ്പോള്‍ നേതാക്കന്മാരെ തന്നെ പിരിച്ചു വിടണം. എന്നിട്ട് അവരോട് പ്രൈവറ്റ് പ്രാക്ടിസ് ചെയ്തോളാന്‍ പറയുക. അത്ര തന്നെ.

ഇവന്മാരുടെ ഒക്കെ വിചാരം ഡോക്ടര്‍ ആകുന്നതു തന്നെ രോഗികളെ പിഴിഞ്ഞ് കാശ് ഉണ്ടാക്കാനാണ് എന്നാണ്. എല്ലാവരും പഠിക്കുന്ന പോലെ ഒരു കോഴ്സ് തന്നെയല്ലെ ഇവന്മാരും (കുറെയൊക്കെ) സര്‍ക്കാര്‍ ചിലവില്‍ പഠിക്കുന്നത് ?

തന്റെ ജോലി സ്ഥലത്ത് ഒരു രോഗിയെ പൂര്‍ണമായും ചികിത്സിക്കാന്‍ സമയം തികയാതെ വരുന്ന ചില ഡോക്ടര്‍മാര്‍ ചെറിയ ഒരു ഫീസ് വാങ്ങി രോഗിക്ക് വൈദ്യോപദേശം കൊടുക്കുന്നതില്‍ തെറ്റ് പറയാനാവില്ല എങ്കിലും അങ്ങനെ ഒരു ഇളവ് കൊടുക്കുന്നത് മുകളില്‍‍ പറഞ്ഞ ആര്‍ത്തി പണ്ടാരങ്ങള്‍ മുതലെടുത്തു കളയും. വീട്ടില്‍ ചെന്നു കാശ് കൊടുത്താലെ മതിയായ ചികിത്സ കൊടുക്കൂ എന്നു പറയുന്ന (ചില) പരിഷകളെയാണ് തെരുവില്‍ നേരിടേണ്ടതെന്നു തോന്നുന്നു. തൊണ്ണൂറായിരം ശമ്പളം വാങ്ങുന്ന ഇവര്‍ അതിന്റെ ഇരട്ടിയെങ്കിലും മറ്റു വഴികളിലൂടെ ഉണ്ടാക്കണമെന്ന് കരുതുന്നവരാണ്. ജനങ്ങള്‍ ജാഗരൂഗരായി ഇരിക്കുക. ചെരുപ്പു മാലകള്‍ ഇവര്‍ക്കായി കരുതി വയ്ക്കുക. നാളെ ഒരു പക്ഷേ നിങ്ങളുടെ ആരുടെയെങ്കിലും ജീവന്‍ വച്ചാകും ഇവര്‍ വില പേശുന്നത്.

::::::::::::::::::::::: xx ::::::::::::::::::::::::::

ഈ കുറിപ്പില്‍ പറഞ്ഞിരിക്കുന്നത് കാശിനു വേണ്ടി മാത്രം തന്റെ പാവനമായ ജോലിയെ വ്യഭിചരിക്കുന്ന ഡോക്ടര്‍മാരെ പറ്റി മാത്രമാണ്. തന്റെ മുന്നിലിരിക്കുന്ന രോഗിയുടെ രക്ഷ മാത്രം മനസ്സില്‍ കാണുന്ന എനിക്കറിയാവുന്നതും അറിയാത്തതുമായ നല്ലവരായ ഡോക്ടര്‍മാര്‍, ഇങ്ങനെ ഒരു കുറിപ്പെഴുതിയതിന് എന്നോട് ക്ഷമിക്കട്ടെ.

ഇടതു പക്ഷ പാര്‍ട്ടികളും മതവിശ്വാസവും.

ഇടതു പക്ഷ പാര്‍ട്ടികള്‍ മതവിശ്വാസത്തിനോ ദൈവവിശ്വാസത്തിനോ എതിരാണോ? അല്ല എന്ന് വിശ്വസിക്കാനാണിഷ്ടം. എങ്കിലും ഇപ്പോഴത്തെ സംഭവ വികാസങ്ങള്‍ കാണുമ്പോള്‍ അങ്ങനെയല്ല എന്ന് തോന്നിപ്പോകുന്നു. വിശ്വാസം ഉണ്ടായിരുന്ന കാലത്തും ഇടതു പക്ഷ ചിന്താഗതിയുണ്ടായിരുന്ന ഒരാളെന്ന നിലയില്‍ ഇതിനൊരു ശരിയായ ഉത്തരം കിട്ടിയാല്‍ നന്നായിരുന്നു എന്ന് തോന്നുന്നു. പക്ഷേ സി.പി.എം നേതാക്കള്‍ ഇക്കാര്യത്തില്‍ ഉരുണ്ടുകളിക്കുന്നു എന്ന് എനിക്കു വ്യക്തിപരമായി തോന്നിപ്പോകുന്നു. ഒരു ചാനല്‍ ചര്‍ച്ചയിലും ആരും വ്യക്തമായി ഉത്തരം പറയുന്നത്‌ കണ്ടില്ല.

ഒരു ജനാധിപത്യ രാജ്യമായ ഇന്ത്യയില്‍ കമ്യൂണിസം പൂര്‍ണ്ണമായി നടപ്പാവില്ല എന്നറിഞ്ഞു കൊണ്ടു തന്നെ കമ്യൂണിസത്തെ ഇഷ്ടപ്പെടുന്നവനാണ് ഞാന്‍. എന്നെ സംബന്ധിച്ചിടത്തോളം ഇന്ത്യയിലെ കമ്യൂണിസ്റ്റ്‌ പാര്‍ട്ടി ഒരു രാഷ്ട്യീയ പാര്‍ട്ടിയാണ്. ഇന്ത്യന്‍ ഭരണഘടനയുടെ സത്ത ഉള്‍ക്കൊണ്ടു കൊണ്ട്‌ പ്രവര്‍ത്തിക്കേണ്ട ഒരു പാര്‍ട്ടി. ഇന്ത്യയില്‍ ജീവിക്കുന്ന ഓരോ പൗരനും മതവിശ്വാസ സ്വാതന്ത്ര്യം ഉറപ്പുവരുത്തുന്നതാണ് നമ്മുടെ ഭരണഘടന എന്നാണ് ഞാന്‍ ധരിച്ചിരിക്കുന്നത്‌. അതില്‍ നിന്നും വ്യതിചലിക്കുന്ന ഓരോ പാര്‍ട്ടിയും ജനങ്ങളില്‍ നിന്ന് കൂടുതല്‍ അകലുന്നു എന്ന് വേണം കരുതാന്‍. കാരണം ഇന്നത്തെ സാഹചര്യത്തില്‍ മതവിശ്വാസികളല്ലാത്തവരെ മാത്രം കൂട്ടത്തില്‍ നിര്‍ത്തി ഇന്ത്യയില്‍ ഒരു പാര്‍ട്ടിക്കും മുന്നോട്ട്‌ പോകാന്‍ പറ്റില്ല എന്നത്‌ തന്നെ. ഇനി അങ്ങനെ ഒരു പാര്‍ട്ടി തീരുമാനിച്ചാല്‍ തന്നെ അത്‌ ജനാധിപത്യത്തെ അവഹേളിക്കലാകും എന്നും ഞാന്‍ കരുതുന്നു.

മുകളില്‍ പറഞ്ഞ പോലെ ഇന്ത്യയിലെ കമ്യൂണിസ്റ്റ്‌ പാര്‍ട്ടി ഒരു രാഷ്ട്യീയ പാര്‍ട്ടി മാത്രമാണ് എന്നതാണ് ആദ്യമായി നേതാക്കള്‍ മനസ്സിലാക്കേണ്ടത്‌. കമ്യൂണിസ്റ്റ്‌ ചിന്താഗതിയില്‍ ഉറച്ചു നിന്നു കൊണ്ട്‌ ജനാധിപത്യത്തിന് ഉതകുന്ന രീതിയിലുള്ള ഒരു തിരുത്തല്‍ രേഖ ആണ് പാര്‍ട്ടിക്കിന്നാവശ്യം. (ഇപ്പോള്‍ വരുന്നെന്ന് പറയുന്ന ഈ തിരുത്തല്‍ രേഖ എന്താണെന്ന് ഇന്നും എനിക്കു ശരിക്കറിയില്ല കേട്ടോ. സ: മനോജിന്റെ പ്രശ്നത്തില്‍ വായിച്ചുള്ള അറിവേ ഉള്ളു). എന്നാല്‍ മാത്രമേ ജനങ്ങള്‍ക്കിടയില്‍ പാര്‍ട്ടിയോടുള്ള മമത കൂടുകയുള്ളൂ.

ഇന്നലെ ഏഷ്യാനെറ്റ്‌ ന്യൂസ്‌ അവറില്‍ സ: ജയരാജനോട്‌ മതങ്ങള്‍ക്കെതിരെ എന്തെങ്കിലും തിരുത്തല്‍ രേഖയില്‍ പറയുന്നുണ്ടോ എന്ന ചോദ്യത്തിന്‍ അദ്ദേഹം ആവര്‍ത്തിച്ചു പറയുന്ന ഉത്തരം " പാര്‍ട്ടി നേതാക്കള്‍ ആര്‍ഭാടരഹിതമായ ജീവിതം നയിക്കണം, വിവാഹ ചടങ്ങുകള്‍ ചിലവു കുറഞ്ഞ രീതിയില്‍ ആയിരിക്കണം എന്നൊക്കെയുള്ള ചട്ടങ്ങള്‍ പണ്ടു മുതല്‍ തന്നെ നിലവില്‍ ഉള്ളതാണ് " എന്നാണ്. അരിയെത്ര എന്ന് ചോദിച്ചാല്‍ പയറഞ്ഞാഴി എന്ന് പറയുന്ന പോലെ തോന്നി. പിന്നീട്‌ ചോദ്യം ആവര്‍ത്തിച്ചപ്പോള്‍ അദ്ദേഹം പറഞ്ഞത്‌ മനോജിന് പാര്‍ട്ടിയില്‍ വന്നപ്പോള്‍ ഉണ്ടായിരുന്ന വിശ്വാസങ്ങള്‍ തുടരുന്നതില്‍ കുഴപ്പമില്ല എന്നാണ്. അപ്പോഴും നേതാക്കള്‍ മതപരമായ ചടങ്ങുകളില്‍ നിന്ന് വിട്ടു നില്‍ക്കണമെന്നു തെറ്റു തിരുത്തല്‍ രേഖയില്‍ പറയുന്നുണ്ടോ എന്ന ചോദ്യത്തിന് വ്യക്തമായ ഉത്തരം അദ്ദേഹം പറയുന്നില്ല.

മതവിശ്വാസം പാടില്ല എന്ന് പറയാന്‍ ഏതെങ്കിലും പാര്‍ട്ടിക്ക്‌ അധികാരമുണ്ടോ? തീര്‍ച്ചയായും ഇല്ല. അങ്ങനെ ഒരു പാര്‍ട്ടിയുടെ ഭരണഘടനയില്‍ എഴുതി വച്ചാല്‍ അത്‌ ഇന്ത്യന്‍ ഭരണഘടന ഒരു പൗരന് നല്‍കുന്ന മൗലികാവകാശങ്ങളുടെ ലംഘനം ആകില്ലേ... മതത്തിന്റെ പേരില്‍ ഉടലെടുത്തിരിക്കുന്ന പാര്‍ട്ടികളെ എതിര്‍ക്കുന്ന പോലെ തന്നെ വിശ്വാസികള്‍ക്കെതിരായി പ്രവര്‍ത്തിക്കുന്ന പാര്‍ട്ടികളേയും ജനങ്ങള്‍ക്ക്‌ എതിര്‍ക്കേണ്ടി വരും എന്ന് നേതാക്കള്‍ മനസ്സിലാക്കുമെന്ന് കരുതുന്നു. മറ്റു പല പാര്‍ട്ടികളുടേതിനേക്കാളും ഇത്തിരി പ്രവൃത്തി ഗുണം കൂടുതലുണ്ട്‌ എന്ന് തോന്നുന്നതിനാല്‍ മാത്രമാണ് ഇടതു പക്ഷത്തിന് പലരും പിന്തുണ നല്‍കുന്നത്‌ എന്ന് കൂടി ഓര്‍ക്കുക. തമ്മില്‍ ഭേദം എന്ന ലൈന്‍.

ഇതൊന്നും ശ്രീ മനോജിന്റെ പ്രവൃത്തിയെ ന്യായീകരിക്കാനോ അദ്ദേഹം ചെയ്തത്‌ ശരിയാണെന്ന് പറയാനോ അല്ല. വ്യക്തിപരമായി അദ്ദേഹം ചെയ്തത്‌ ന്യായീകരിക്കണ്ടത്‌ അദ്ദേഹത്തിന്റെ മാത്രം കാര്യമാണ്. പാര്‍ട്ടിയില്‍ ചര്‍ച്ച ചെയ്യാതെ പെട്ടെന്ന് ഉണ്ടായ രാജിയാണിതെന്ന് ഞാന്‍ കരുതുന്നു. അതില്‍ അദ്ദേഹത്തിന് വ്യക്തിപരമായ കാര്യങ്ങള്‍ ഉണ്ടാകാം. പാര്‍ട്ടി വിട്ടു പോകുന്നതു കൊണ്ട്‌ അദ്ദേഹത്തിനു വ്യക്തിപരമായ ഗുണങ്ങളും കാണും. അതൊന്നും എന്റെ പ്രശ്നമല്ല. സി.പി. എം എന്ന പാര്‍ട്ടി മതവിശ്വാസത്തെ എതിര്‍ക്കുന്നുണ്ടോ?, ദൈവവിശ്വാസി ഒരിക്കലും കമ്യൂണിസ്റ്റ്‌ ആകില്ല എന്ന് കരുതുന്നുണ്ടോ? മതവിശ്വാസികള്‍ (കീഴ്ഘടകങ്ങളിലെങ്കിലും) നേതൃത്വത്തിലേക്ക്‌ വരുന്നതിനെ പാര്‍ട്ടി എതിര്‍ക്കുമോ ?

ഇതൊക്കെയാണ് എന്റെ മനസ്സില്‍ തോന്നിയ സംശയങ്ങള്‍. ഇതൊക്കെ അറിഞ്ഞിട്ടു വേണം സി.പി. എം എന്ന രാഷ്ട്രീയപാര്‍ട്ടിയെ തുടര്‍ന്നും നിരുപാധികമായി പിന്തുണക്കണമോ എന്ന് ആലോചിക്കാന്‍. പാവങ്ങള്‍ക്കു വേണ്ടി നിലകൊള്ളുന്ന പാര്‍ട്ടി എന്ന പേരുതന്നെ ഈയിടെയായി പാര്‍ട്ടിക്കു നഷ്ടപ്പെടുന്നതായി തോന്നിയിട്ടുണ്ട്‌. നേതാക്കള്‍ തന്നെ ആര്‍ഭാടപൂര്‍ണ്ണമായ ജീവിതത്തിലേക്ക്‌ തന്നെയല്ലേ പോകുന്നത്‌? സ: ജയരാജന്‍ പറഞ്ഞ ആര്‍ഭാടരഹിതമായ പാര്‍ട്ടിക്കല്യാണത്തിന്റെ ഒക്കെ കാലം കഴിഞ്ഞു എന്ന് നമ്മള്‍ പലപ്പോഴും കണ്ടു കഴിഞ്ഞതാണ്. അപൂര്‍വ്വം ചിലതൊക്കെ നടക്കുന്നു എന്ന് മറക്കുന്നില്ല.

ഈ പ്രശ്നത്തില്‍ മറ്റ് ഇടതുപക്ഷ പാര്‍ട്ടികള്‍ക്ക് പല അഭിപ്രായങ്ങള്‍ ആണുള്ളതെന്ന് പത്രങ്ങളില്‍ നിന്ന് മനസ്സിലാകുന്നു.

വാല്‍ക്കഷണം.

എന്റെ മതവിശ്വാസമോ ദൈവവിശ്വാസമോ ഈ പോസ്റ്റിന് കാരണമാകുന്നില്ല. ഇത്‌ സാധാരണ വോട്ടര്‍ക്ക്‌ ഭരണഘടന പറഞ്ഞിരിക്കുന്ന അവകാശത്തെ ഒരു പാര്‍ട്ടി എതിര്‍ക്കുന്നുണ്ടോ എന്ന സംശയത്തില്‍ നിന്ന് ഉണ്ടായ പോസ്റ്റ്‌ മാത്രമാണ്. എ.സി മുറിയില്‍ ജോലി ചെയ്യുന്ന നിനക്കൊക്കെ പാവപ്പെട്ടവരുടെ പാര്‍ട്ടിയെ വിമര്‍ശിക്കാന്‍ എന്തവകാശം എന്ന് ചോദിക്കുന്നവര്‍ക്ക്‌ വേണ്ടി എഴുതിയതല്ല ഇത്‌ എന്ന് അറിയിച്ചു കൊള്ളുന്നു.

പീഢനം എല്ലായിടത്തും ഒരുപോലെ

ഇന്നത്തെ ഗള്‍ഫ്‌ ന്യൂസില്‍ വന്ന ഒരു വാര്‍ത്ത ശരിക്കും ചിന്തിപ്പിച്ചു. ഈജിപ്തിലെ സ്ത്രീകളില്‍ 83% സ്ത്രീകളും ഒരു തവണ എങ്കിലും ഏതെങ്കിലും തരത്തില്‍ ലൈംഗീകമായി പീഢിതയാകുന്നു. ബലാല്‍സംഗം ചെയ്യപ്പെടുന്നു എന്നല്ല ഇതിനര്‍ത്ഥം. വാക്കുകള്‍ കൊണ്ടോ, നോട്ടം കൊണ്ടോ, തലോടലുകള്‍ കൊണ്ടോ ഒക്കെ ആകാം. പൊതുസ്ഥലങ്ങളിലും ജോലിസ്ഥലത്തും, സ്കൂളുകളിലും അപമാനിതയാകുന്ന സ്ത്രീകളുടെ എണ്ണം കൂടി വരുന്നു എന്നാണ് ചില പഠനങ്ങളെയും കെയ്‌റൊയില്‍ നടന്ന ഒരു കോണ്‍ഫറന്‍സിനേയും ആധാരമാക്കിയുള്ള റിപ്പോര്‍ട്ട്‌ പറയുന്നത്‌. പതിനേഴ്‌ അറബ്‌ രാജ്യങ്ങളില്‍ നിന്നുള്ള പ്രധിനിധികള്‍ ആ കോണ്‍ഫറന്‍സില്‍ പങ്കെടുത്തു എന്ന് റിപ്പോര്‍ട്ടില്‍ പറയുന്നു.

നമ്മുടെ നാടിനെ കുറ്റം പറയുന്നവരില്‍ ചിലരെങ്കിലും പറയുന്ന കാര്യങ്ങളിലൊന്ന് സ്ത്രീകള്‍ക്കെതിരെയുള്ള ലൈംഗീക കുറ്റകൃത്യങ്ങള്‍ ആണെന്ന് തോന്നുന്നു. ബസിലും പൊതുസ്ഥലത്തും തങ്ങള്‍ അപമാനിക്കപ്പെടുന്നു എന്ന് സ്ത്രീകളുടെ പരാതികള്‍ എന്നും കേള്‍ക്കാറുണ്ട്‌. ധാരാളം ആളുകള്‍ ഔദ്യോഗികമായി പരാതിപ്പെടാറുണ്ട്‌. പക്ഷേ യാഥാസ്ഥിതിക രാജ്യങ്ങളായ അറബ്‌ രാജ്യങ്ങളില്‍ ഇക്കാര്യത്തില്‍ പരാതി കൊടുത്താലും അതില്‍ പുരുഷന്മാര്‍ക്ക്‌ അനുകൂലമാക്കി തെളിവുകള്‍ നിരത്താനാണ് അധികാരികള്‍ പോലും ശ്രമിക്കുന്നതെന്ന് പറയപ്പെടുന്നു.

പാരമ്പര്യ വസ്ത്രങ്ങളില്‍, നിഖാബും ധരിച്ച്‌ പുറത്ത്‌ പോകുന്ന തങ്ങളെ പരസ്യമായി അപമാനിക്കാന്‍ യുവതലമുറക്ക്‌ യാതൊരു വിധ തടസ്സങ്ങളും ഇല്ല എന്ന് സ്ത്രീകള്‍ തുറന്നു പറയുന്നു. വീട്ടില്‍ നിന്ന് പുറത്തിറങ്ങുമ്പോള്‍ ചൂളം വിളിച്ച്‌ അരികെയെത്തുന്ന "പൂവാലന്‍" തന്റെ കൂടെ ആളൊഴിഞ്ഞ സ്ഥലത്ത്‌ വരാനും മൊബൈല്‍ നമ്പര്‍ തരാനും ആവശ്യപ്പെടുന്നു എന്ന് പറയുന്ന, രണ്ട്‌ കുട്ടികളുടെ അമ്മയായ സ്ത്രീ, വളര്‍ന്നു വരുന്ന തന്റെ പെണ്മക്കളെ ഓര്‍ത്ത്‌ ദു:ഖിക്കുന്നു.

യമന്‍, സിറിയ, ലെബനോന്‍ തുടങ്ങി മറ്റ്‌ അറബ്‌ രാജ്യങ്ങളില്‍ നിന്നുള്ളവരും ഈജിപ്തില്‍ തങ്ങള്‍ക്ക്‌ അനുഭവിക്കേണ്ടി വന്ന അപമാനങ്ങളെ പറ്റി പറഞ്ഞിട്ടുണ്ട്‌ എന്ന് ഈ റിപ്പോര്‍ട്ടില്‍ പറയുന്നു.
യമന്‍, സിറിയ, ലെബനോന്‍ തുടങ്ങിയ രാജ്യങ്ങളിലും സ്ഥിതി വ്യത്യസ്ഥമല്ല എന്നും അവര്‍ കൂട്ടി ചേര്‍ക്കുന്നു. 22 അറബ്‌ രാജ്യങ്ങളില്‍ പകുതിയിലും ഇത്തരം പീഢനങ്ങള്‍ ക്രിമിനല്‍ കുറ്റകൃത്യമായി പരിഗണിക്കുന്നില്ല എന്നതാണ്‍ അത്‌ പെരുകാനുള്ള കാരണമായി പറയപ്പെടുന്നത്‌. പലയിടത്തും ബലാല്‍സംഗങ്ങളും ശാരീരിക പീഢനങ്ങളും മാത്രമേ കുറ്റകൃത്യമാകുന്നുള്ളൂ.

പര്‍ദക്കുള്ളില്‍ സ്ത്രീകള്‍ സുരക്ഷിതരാണെന്ന ധാരണ തിരിത്തുക്കുറിക്കുന്ന പല അനുഭവങ്ങളും ആ കോണ്‍ഫറന്‍സില്‍ പുറത്തു വന്നു. പൂര്‍ണ്ണമായും പര്‍ദക്കുള്ളില്‍ പൊതിഞ്ഞ ശരീരങ്ങളെ തടവാനും ആളുകള്‍ മടിക്കുന്നില്ല എന്നാണ് പലരും പറഞ്ഞിരിക്കുന്നത്‌. മജീദ്‌ അല്‍ ഐസ എന്ന സൗദി സാമൂഹികപ്രവര്‍ത്തകന്‍ പറയുന്നതനുസരിച്ച്‌ മുഖ്യധാരയില്‍ നിന്ന് സ്ത്രീകളെ അകറ്റി നിര്‍ത്തിയിരിക്കുന്ന സൗദിയില്‍ പലപ്പോഴും കയ്യേറ്റങ്ങള്‍ അതിരുകള്‍ വിടാറുണ്ട്‌ എന്നാണ്.

ഇത്ര പരസ്യമായി ഒരു അറബ്‌ രാജ്യ പത്രത്തില്‍ ഒരു ഫുള്‍ പേജ്‌ ഫോട്ടോ ഫീച്ചര്‍ ആയി വന്ന വാര്‍ത്ത ആയതിനാല്‍ മാത്രമാണ് ഇത്‌ ഞാന്‍ ഇവിടെ എഴുതുന്നത്‌. നമ്മുടെ നാട്ടിലെയോ യൂറോപ്പിലെയോ അമേരിക്കയിലെയോ പത്രങ്ങളില്‍ വന്ന ഫീച്ചറായിരുന്നെങ്കില്‍ ഞാന്‍ ഇത്‌ എഴുതുന്നതിന് മുമ്പ്‌ ഇങ്ങനെ ഒരു കോണ്‍ഫറന്‍സ്‌ നടന്നോ എന്നെങ്കിലും ഒന്നു കൂടി ഉറപ്പ്‌ വരുത്തിയേനെ.( അല്ലെങ്കില്‍ എന്റെ പല സുഹൃത്തുക്കളും ഇതൊക്കെ പര്‍ദക്കെതിരെയുള്ള പ്രചരണം ആണെന്ന് പറഞ്ഞു കളയും. :) )